2 Baṉara 19:20-34

²⁰Meke garunu la inavoso se Aisea, sa tuna Emosi, koe Hezikaea; “Hiera gua si zama nia e Zihova, sa Tamasa pa Izireli: Ele avosia Rau sa mua vinaravara mae koa Rau pa guguana e Senakeribi sa baṉara pa Asiria,

²¹Hiera sa zinama sapu zama la nia e Zihova koasa: ‘Sa Vasileana Zaione sapu guana vineki vaqura si doṉo gore nigo meke va sisire nigo sa. Sa vasileana Zerusalema, guana tuna vineki, si hiruhiru nia sa batuna totoso govete taloa si agoi.

²²Esei si va karikari ia meke paraparaṉa la ia agoi? Na koe sei si kukukili va noma la si agoi meke va eṉeṉa sage la matamu pa vina titie? Na koa Sa pu Hopena pa Izireli mo!

²³Koari na mua tie paleke inavoso si soku zinama va karikari la koe Zihova si ipa ni goi. Meke zama guahe si agoi, “Koari na qua totopili varipera sokudi si kamoa rau sa vasina sapu ululu gua ri na toqere, kamo pa batu toqere pa Lebanoni. Sari na huda sida ululudi vasina si maho gore ni rau, gua tugo sari na huda paeni ta okoraedi. Kamoa rau sa vasina sapu seu hola la, koari na hudahuda sapu leleadi hola.

²⁴Ele geli berukehe si rau pa popoa seu meke napoa sa kolo vasina. Koari ola nenequ si ene va popa pani rau sari doduru tototolo pa Izipi. ”

²⁵Vea, lopu ele avosia tu goi? Nake pukerane tu zama veko nia Rau. Koari na rane ele hola la tu si balabala i Rau sari tinavete, meke kamahire va gorevura i Rau, pude agoi kote huari sari na vasileana ta gobadi meke vata evaṉae ni na kobi remoremo patu.

²⁶Gua ke sari dia tinoni si loke dia ṉiniraṉira, matagutu si arini meke kurekure. Guana linetelete si arini pa inuma, guana liho buma vaqura, guana duduli sapu toa vura pa batu vetu, sapu harahara mate sipu raza i na givusu maṉini.

²⁷Ba tumae nia Qua sa vasina koa si agoi meke totoso mae meke taloa si goi meke gua sapu hoke ta ṉaziri guni Nau goi si Arau.

²⁸Sina ta ṉaziri Nau goi si Arau meke sina ele kamo mae pa taliṉaqu sari na mua vinahesi pule, ke kote va rita nia Rau sa Qua vinetuṉu pa isumu meke vekoa Rau pa ṉuzumu sa Qua aeana kalakalahana hose, meke kote va ene pule igo Rau koasa siraṉa tugo sapu ene mae ia goi.’ ”

²⁹Meke zama se Aisea koe Hezikaea, “Hezikaea, hie sa vina sosode tamugoi: Vuaheni hie si kote henai gamu sari linetelete sapu toa sage teledia, meke pa vuaheni vina rua si kote henai gamu sapu tuvulu sage koari na linetelete arini. Ba pa vuaheni vina ṉeta si kote lelete meke pakepakete si gamu, kote lete inuma vaeni meke henai gamu sari vuadi.

³⁰Ka visavisa tie pa butubutu Ziuda si keke totoso pule si kote va gore karoso pana gore meke vua katakata panaulu.

³¹Ura kote koa hola pa Zerusalema si ka visavisa tie, meke kote vura pa toqere Zaione sa puku tie saripu lopu tava mate. Sa inokoro ṉiṉirana te Zihova Tadi na Qeto Minate si kote va gorevura ia si asa.

³²Hiera gua si zama nia e Zihova pa guguana sa baṉara lavata pa Asiria: ‘Lopu kote nuquru ia sa sa vasileana lavata hie babe gona nia si keke tupi tani. Lopu kote paleke kamo mae nia lave sa si tani babe mae tavete buturu pa kali goba pude rapata na haele sage.

³³Sa siraṉa sapu ene mae ia sa si asa tugo si kote pule ia sa; na lopu kote nuquru ia sa sa vasileana lavata hie,

³⁴Arau kote lavelave nia sa vasileana lavata hie meke harupu ia, pa laequ Arau meke pa laena e Devita sa Qua nabulu!’ ”