2 Baṉara 14:3-13

³Taveti sa gua sapu toṉoto pa dinoṉo te Zihova, ba lopu gugua e Devita, sa tamana kenuna; taveti tu sa saripu gua tavetaveti e Zoasi sa tamana.

⁴Lopu huara gore ni sa sari na vasidi tana vinahesi tomate koari na toqere, ke sari na tie si lamo sa vina vukivukihi na va uququ oto huda humaṉa lea koa rina vasidi arini.

⁵Sipu ele turu va nabu pa nana ṉiniraṉira se Amazaea koasa binaṉara, si va matei sa sari na koimata saripu va matena sa tamana, sapu sa baṉara,

⁶ba lopu va matei sa sari na tudia. Lulia mo sa gua sapu zama nia e Zihova koasa Tinarae te Mosese, “Sari na tiatamadia rina koburu si lopu kaqu tava mate koari na sinea tadi na tudia meke sari na tudia ba lopu kaqu tava mate koari na sinea tadi na tiatamadia. Ba hopeke tie si kaqu tava mate koari nana sinea sapu tavete sotia sa telena.”

⁷Va matei e Amazaea si ka manege puta tina tie varipera pa Edomu koasa Lolomo Soloti; tuqe vagia sa pa vinaripera sa vasileana lavata pa Sela meke poza nia Zokohili, korapa asa tugo si ta pozae nia sa kamahire.

⁸Meke garunu la tie palepaleke inavoso se Amazaea koe Zehoasi sa baṉara pa Izireli, tepatepa ia sa pude varipera.

⁹Ba garunu pule la nia Zehoasi sa baṉara sa inolaṉa hie: “Keke huda rakihi pa toqere Lebanoni si garunu la inavoso koa keke huda sida pa Lebanoni meke zama, ‘Va haba nia sa tumu vineki koasa tuqu koreo,’ gua. Meke ene hola si keke kurukuru pinomo meke neti va ṉozo gore nia sa huda rakihi asa.

¹⁰Ego, Amazaea, ele va kilasi goi sari na tie pa Edomu, meke ta siṉie vinahesi pule si goi. Mamu qetu nia mo sa mua inavoso leana asa, mamu koa mo pa mua vetu. Na venagua ke hata tinasuna sapu kote va kaleana pule nigo si goi meke sari na mua tie pa Ziuda?”

¹¹Ba korona va avosia Amazaea si asa, ke vura la raza ia e Zehoasi sa baṉara pa Izireli meke sari nana tie, meke pa Beti Semesi pa Ziuda si vari tia i sari karua.

¹²Tava kilasa sa qeto minate te Amazaea, meke govete pule pa dia vetu si arini.

¹³Vagia meke pusia e Zehoasi se Amazaea. Beto asa si hola la pa Zerusalema, meke huara gore nia sa sa gobana sa vasileana lavata pa Zerusalema podalae pa sasada ta pozae Iparemi kamo koasa sasada bara ta pozae na Sasada iio, pada karua gogoto mita gelena si asa.