11 Mɛm̀mɛ ò kùɔmɛ̀ Akɑbu cĩ́ɛ̃̀tɛ̀ kɔbɛ bɛ̀ɛ̀ do kpɑɑ́ Sisedɛɛdi ɛì miɛkɛ kɛ tú bɛnitidiɛbɛ̀, o cĩ́ɛ̃̀tɛ̀ kɔbɛ kó dimɑ̀ɑ̀ nɛ̀ bɛ̀ɛ̀ tú ikuɔ́ nìùbɛ̀, òmɔù í nsùɔ́ nwèè tu Akɑbu cĩ́ɛ̃̀tɛ̀ kou.
12 Kɛ̀ Yeuu ítɛ́ dɛborɛ̀ kɛ́kò nkɛ́nkɔri Sɑmmɑrii kɛ́kétɛ́ kɛ́mberínɛ̀ Bɛti-Ekɛdi dinɑɑcɛ̃nhòò.
13 Ò dɛ nyɑ̀ Aɑsiɑ Sudɑɑ kɔbɛ kóo kpɑ̀ɑ̀tì tebìí kɛ́ bɛ̀ bekɛ kɛ dɔ̀: Di tú ɔ̃mbɛ? Kɛ̀ bɛ̀ dɔ̀: Ti tú Aɑsiɑ tebìí nsi ti kɔri kɛ bo dɔu nhokpɑ̀ɑ̀tì Akɑbu bí nyi nɛ̀ onitipokpɑ̀ɑ̀tì Sesɑbɛɛdi kpɛyi.
14 Kòo pɛ́i nkɛ̀ bɛ̀ɛ bɛ̀ pĩ̀ḿmú kòo bɛ̀ fìé Bɛti-Ekɛdi tɛbintɛ borɛ̀ bɛmɔu. Bɛ̀ do bo bɛnìtìbɛ̀ sipísìnɑ̀ɑ̀ nɛ̀ bɛ̀dɛ́bɛ̀ ndi. Ò í nsùɔ́ nhòmɔù.
15 Kɛ̀ Yeuu ítɛ́ dɛborɛ̀ kɛ́conɛ̀ Dekɑbu birɛ Yonnɑdɑbu kóò bekɛ kɛ dɔ̀: A yɛ̀mmɛ̀ n nɑɑtinɛ̀ n kɔ̃mɛ dɑ nɑɑtinɛ̀mɑ̀ɑ̀? Kɛ̀ Yonnɑdɑbu dɔ̀: N yɛ̀mmɛ̀ dɑ nɑɑtinɛ̀mu. Kòo dɔ̀: Kɑ̀ɑ yɛ̀mmɛ̀ n nɑɑtinɛ̀mu, youtɛní ɑ nɔ̀ùtɛ̀! Kɛ̀ Yonnɑdɑbuu youtoo kòo ò dèenko o kpɑrìnɑɑsɑ̃ntɛ̀ miɛkɛ,
16 kóò nɑ̀kɛ́ kɛ dɔ̀: Yóu kɛ̀ tí nɛi kɑ̀ɑ yɑ̀ m mɔkɛ tìì kɔ̃nyɑuti ti Yiɛ̀ nKuyie nkpɛ́í. Mɛm̀mɛ kɛ̀ bɛ̀ɛ nɛi.
17 Bɛ̀ tùɔ̀kɛ dìì mɔ̀nnì Sɑmmɑrii kɛ́potɛ́ Akɑbu cĩ́ɛ̃̀tɛ̀ kɔbɛ kɛ́ bɛ̀ dèè, kɛ́ndonnɛ̀ ti Yiɛ̀ nKuyie ndo tì nɑ̀kɛ́mɛ̀ ku pɑ̃ɑ̃nɑ́ɑǹtì nɑ́ɑǹtò Edii kòo tì bɛ́i.
18 Kɛ̀ Yeuu tíí nyIsidɑyɛɛribɛ bɛmɔu kɛ́ bɛ̀ nɑ̀kɛ́ kɛ dɔ̀: Akɑbu do fìé dibɔɔ̀ Bɑɑdi sɑ́m̀pɔ́ nwe, kɛ̀ m bo dì fìé kɛ̀ dɛ̀ɛ pɛ̃ɛ̃tɛ́ mɛmmɛ.
19 N yúǹní dibɔɔ̀ Bɑɑdi kó bɛpɑ̃ɑ̃bɛ̀ bɛmɔu nɛ̀ bɛ̀ɛ̀ kó dimɑ̀ɑ̀ dì tũ̀. N yóó ɑ̃nnɛ́ dibɑnni diɛrì ndi, òmɔù bɑ́ nkpɑ, kɛ̀ wèè kpɑ bɛ̀ɛ ò kùɔ. Ò do dɔɔrinɛ̀ mɛciì mmɛ kɛ bo kuɔ Bɑɑdi kɔbɛ bɛmɔu.
20 Kòo bɛ́i nkɛ dɔ̀: Ikúnɛ̀ dibɔɔ̀ Bɑɑdi kó muféù kó diyiè. Kɛ̀ bɛ̀ɛ ikú.
