2 ቆሮንቶሳ 5

1

2

3

4

5

6

7

8

9

10

11

12

13

¹ኣዪሲ ጎፔ፥ ኑኒ ዴዒያ ሃ ሳዓ ዱንካኒ ኮሌቶፔ፥ ኑሲ ኣሳይ ኬፂቤና ጎሊ፥ ፆሳይ ኬፄዳዌ፥ ሳሉዋን ሜꬊናው ዴዒያዋ ኑኒ ኤሬቶ።

²ኑኒ ሃ ኣላሚያን ዴዒዴ ዳሮ ኦሌቶኔ ሳሉዋን ዴዓና ኑ ጎሊያ ማያናው ሎይꬂ ኣሞቴቶ።

³ኑኒ ሄዋ ማዪዴ፥ ካሎቶኮ፤

⁴ኑኒ ሃ ሳዓ ዱንካኒያን ዴዒዴ፥ ዴፄቲዴ ኦሌቶ፤ ኣዪሲ ጎፔ፥ ሃዪቂያ ኣሳቴꬃይ ዴዑዋን ሚቴታና ማላ፥ ኑኒ ማያናው ኮዬቶፔ ኣቲን፥ ካሎታናው ኮዮኮ።

⁵ኑና ሃዎ ጊጊሴዳዌ ፆሳ፤ ቃሲ ኢ ባሬ ጌሻ ኣያና ዋሴ ኡዲዴ፥ ኢሜዳዌ ኣ።

⁶ሄዋ ዲራው፥ ኑኒ ኡባ ዎዴ ኣማኔቴቶ፤ ቃሲ ኑኒ ኑ ጎሌን ሃ ኣሳቴꬃን ዴዔዳ ኬናን፥ ጎዳፔ ሻኬቲዴ ዴዒያዋካ ኤሬቶ።

⁷ኣዪሲ ጎፔ፥ ኑኒ ኣማኑዋን ዴዔቶፔ ኣቲን፥ ቤዒያዋን ዴዖኮ።

⁸ኑና ኣማንꬄ፤ ቃሲ ሃ ኣሳቴꬃን ኑ ጎሊያ ኣጊ ጎሌ ቢዴ ጎዳና ኢቲፔ ዴዒያዌ ኑና ናሼቼ።

⁹ሄዋ ዲራው፥ ኑኒ ቃሲ ኣሹዋን ዴዒና ዴዓና ꬋዪና፥ ኑ ቆፋይ ኣ ናሼቻናሳ።

¹⁰ኣዪሲ ጎፔ፥ ኑኒ ሁጲያን ሁጲያን ኦꬄዳ ኦሱ ሎዓ ጊዲና፥ ዎይ ኢታ ጊዲና፥ ኑሲ ቤሲያዋ ኣካናው፥ ኪሪስቶሳ ፒርዳ ኦይዲያ ሲንꬃን ኡባይካ ሺቃናው ቤሴ።

¹¹ሄዋ ዲራው፥ ኑኒ ፆሳው ያዩሳይ ኣዬንቶ ኤሪዴ፥ ሄዋዳን ቃሲ ኣሳካ ኣማንꬄቶ፤ ፆሳይ ኑና ኡባና ኤሬ፤ ቃሲ ሂንቴካ ሂንቴ ዎዛና ቆፋን ኑና ኤሪታ ያጋዴ ቆፓይ።

¹²ቤቲያባን ጬቄቲያዋንቱፔ ኣቲን፥ ዎዛናን ዴዒያዋን ጬቄቴና ኣሳቶ ሂንቴ ኦዲ ዛሪያባይ ዴዓና ማላ፥ ሂንቴ ኑናን ጬቄታናዳን፥ ኑኒ ሂንቴንቶ ጋሱዋ ጊዳናው ኮዪያዋፔ ኣቲን፥ ኑና ጋላታናው ኮዮኮ።

¹³ኑኒ ጎዪያዋ ጊዶፔ፥ ፆሳ ቦንቹዋሳ፤ ዎይ ቃሲ ዎዛናና ዴዒያዋ ጊዶፔካ፥ ሂንቴና ጎዓናሳ።

¹⁴ኪሪስቶሳ ሲቁ ኑና ጊዴ፤ ኣዪሲ ጎፔ፥ ኢቲ ኣሳይ ኣሳ ኡባው ሃዪቄዳዋ ኑኒ ኣኬኬዶ፤ ሄዋ ጊዶፔ ኣሳይ ኡባይ ኣናና ሃዪቄዳ።

¹⁵ፓፃ ዴዒያዋንቱ ባሬንቱ ዲራው ሃዪቄዳዎኔ ቃሲ ሃዪቁዋፔ ዴንዴዳዎ ዴዓናፔ ኣቲን፥ ሲንꬃፔ ባሬንቱ ሁጴው ዴዔና ማላ፥ ኢ ኣሳ ኡባ ዲራው ሃዪቄዳ።

¹⁶ሄዋ ዲራው፥ ኑኒ ሃዋፔ ሲንꬃው ኦናኔ ኣሳ ቆፋን ፒርዶኮ፤ ሃራይ ኣቶ፥ ኑኒ ኪሪስቶሳ ካሴ ኣሳ ቆፋን ፒርዴዳዋ ጊዶፔካ፥ ሲሚ ሲንꬃፔ ሄዋዳን ፒርዶኮ።

¹⁷ሄዋ ዲራው፥ ኦኒኔ ኪሪስቶሳና ዴዖፔ፥ ኦራꬃ ሜꬌታ፤ ጪማይ ኣꬌዳ፤ ቤዒቴ፥ ኡባባይካ ኦራፄዳ።

¹⁸ኪሪስቶሳ ባጋና ኑና ባሬናና ሲጌꬄዳ ፆሳይ ኡባባካ ኦꬄዳ፤ ቃሲ ኢ ኑሲ ሃራቱዋ ባሬናና ሲጌꬂያ ኦሱዋ ኢሜዳ።

¹⁹ፆሳይ ኪሪስቶሳ ባጋና ኣሳ ኡባ ባሬናና ሲጌꬄ፤ ኣሳ ናጋራካ ኣሳ ቦላ ፓይዴና፤ ቃሲ ኣሳ ባሬናና ሲጌꬂያ ኪታካ ኑሲ ኢሜዳ።

²⁰ሲሚ ፆሳይ ኑ ባጋና ሂንቴንቶ ሃሳዪያዋዳን፥ ኑኒካ ኪሪስቶሳ ዲራው ሃሳዪያ ኢ ኪቴዳዋንታ፤ ቃሲ ኑኒ ሂንቴና፥ «ፆሳና ሲጌቲቴ» ጊዴ፥ ኪሪስቶሳ ዲራው ዎሴቶ።

²¹ኑኒ ፆሳ ፂሎቴꬃ ኪሪስቶሳ ባጋና ኣካና ማላ፥ ናጋራ ኤሬና ኪሪስቶሳ ኑ ዲራው፥ ፆሳይ ናጋራንቻ ኦꬄዳ።