1a de Corintios 12

1

2

3

4

5

6

7

8

9

10

11

12

13

14

15

16

¹Nal wech nu bzan, nzhekla na za na kwent, zee ne gu chep xomod nak kwaan nzelazh Mbi Naban cheen Dios lo re be, xaa nak xaa Jesús.

²Nzhaal ne gu leezha zer gak gu xaa Xaa Nabeyy, mbill gu lo re maj kwaan nambant.

³Kwaanzee nal, nzhekla na ne gu nik tub xaa kwaan nzho Mbi Naban lextoo, nyent mod né: “Jesucrist nak Maxuu”. Nu nixa nik tub xaa nyent mod né: “Jesucrist nak Xaa Nabeyy na”, cheleeya nanzhot Mbi Naban cheen Dios lextoo xaa.

⁴Xa nak kwaan nzaa Mbi Naban cheen Dios lo tub be nu lo stub be, nel lee Mbi Naban tubka nak.

⁵Zyen doo mod nkee be xchiin Dios per lo tubka Xaa Nabeyy nkee be zhiin.

⁶Xa kwaan nzelazh Dios lo kad tub be zee kee be xchiin xaa, per lee xaa nak xaa nkee zhiin kwent cheen be.

⁷Lo kad tub be nzelazh Dios Mbi Naban cheen xaa, zee nzho mod le be yudar re xaa Jesús.

⁸Nu kwaan Mbi Naban nzelazh Dios re kwaane: zee tub naz xaa nii kwaan yalnzhak, nu stub naz xaa labeyy cho kwaan nzhekla Dios,

⁹nu stub naz xaa nzho mod wii cho kwaan nzhekla Dios le, nu stub naz xaa sekwen re xaa ne nzak,

¹⁰nu stub naz xaa nzho mod le zyen doo kwaan gro, nu stub naz xaa nzho mod zaa kwent kwaan nzhé Dios lo lee xaa, nu stub naz xaa ne xana kwaan nroo lo mbi mal nu lo Mbi Naban, nu stub naz xaa nii stub diizh kwaan nagakt xaa, nu stub naz xaa nzho mod zaa kwent cho kwaan ngunii xaa ba,

¹¹Per tubka Mbi Naban nzelazh rese kwaane, nu nzaa xaaya lo kad tub be mod nzhekla xaa zaa xaaya.

¹²Nu lee kwerp cheen myet nixa nkanoya zyen pa (kwenta nii xaa, yaa xaa, nzha xaa), per tubka kwerp naka. Nu seeka nak kwerp cheen Jesucrist.

¹³Nu leeka snee rese be, xaa Israel o xaa nanakt xaa Israel, xaa nak mos o xaa nanakt mos, mrubnis be kwaan tubka Mbi Naban zee gak be tubka kwerp, nu leeka Mbi Naban nabeyy leen lextoo rese be.

¹⁴Lee kwerp nanakta tubka pa, leeya nak zyen pa.

¹⁵Chol yé nii tub xaa: “Nel nanakt na yaa xaa, nanakt na cheen kwerp”. Nixa sbaa yéya, seetaka naka tub pa cheen kwerp cheen xaa.

¹⁶Nu chol nzha xaa yé: “Nel nanakt na zaalo xaa, nanakta na cheen kwerp”. Nixa sbaa yéya, seetaka naka tub pa cho kwerp cheen xaa.

¹⁷Chelee dubse kwerp nak nebse zaalo xaa, nyent mod gon xaa. O chelee dubse kwerp nak nebse nzha xaa, nyent mod koob xaa bech.

¹⁸Per lee Dios mzob kad pa kwerp cheen be paro mas wen nzhaala nzak xaa.

¹⁹Cheleeya tubka kwaan ngak dubse xaa, zee nyent kwerp.

²⁰Per kwaan wli nak, lee kwerp nkano zyen pa choya per tubka kwerp naka.

²¹Zee lee zaalo xaa nyent mod yé lo yaa xaa: “Nankint na lu”; nixa yek xaa nyent mod yé lo nii xaa: “Nankint na lu”.

²²Per lee re pa cho be, pa nzak be nanont, leeya nak kwaan mas nkin be.

²³Nu lee cho be paro nzak be sbaasa, nak paro nzob be kwaan chul nlu. Noka lee cho be pa nanzheklat be luu mas nsegak beya ler,

²⁴nu lee pa mas chul nlu nankint tant kanap beya. Per Dios mdexkwaa cho be zee lee paro nzak be mas nachult mas nkanap beya.

²⁵Zee nayiit tub pa ne stub pa, zee rese pa cho be kanap stub pa cho.

²⁶Chelee tub pa cho be ne nzak, dubse cho be ne; nu chelee tub pa cho be wen nzak, dubse cho be wen nzak.

²⁷Nu sbaa nak be mod kwerp cheen Jesucrist, nel kad tub be nak mod tik cho kwerp cheen xaa.

²⁸Kwaanzee Dios mzaa lo re xaa Jesús pa nzhaal kee xaa zhiin. Xaa mas non nak xaa mkayaa yalnabeyy lo Jesucrist, nu zeera xaa nzaa kwent kwaan nzhé Dios lo lee xaa, nu zeera re xaa nseed xtizh Dios, nu gwluzh xaa nle kwaan gro kwaan nyent mod le re myet, xaa nsekwen re xaa ne nzak, xaa nle yudar re xaa nkin kwaan, xaa nabeyy lo re xaa Jesús, xaa nzhedizh stub naz diizh kwaan nagakt xaa.

²⁹Naret xaa nak xaa mkayaa yalnabeyy lo Jesucrist, nu nixa naret xaa nzaa kwent kwaan nzhé Dios lo lee xaa. Naret xaa nseed xtizh Dios, nu nixa naret xaa nle re kwaan gro.

³⁰Nu nixa naret xaa nsekwen re xaa ne nzak, nu nixa naret xaa nzhedizh stub diizh kwaan nagakt xaa nu nixa naret xaa nzho mod nzaa kwent cho kwaan nzhé xaa zee.

³¹Kwaanzee re gu nzhaal yula gu kayaa gu re kwaan mas wen, kwaan nzelazh Dios. Nal luu na stub naz kwaan mas chul lo re gu.