1Tʉyꞌa̱jtʉnʉꞌʉ tya̱dʉ ayuk: Pʉn ja pʉ́n ttseky es tyúnʉt ja mʉbʉjkpʉtʉjk kwentʉꞌa̱jtpʉ, oyʉ tadʉ tuunk diꞌibʉ tsyejpy.
2Diꞌibʉ kwentʉꞌa̱jtp ma̱ mʉbʉjkpʉtʉjk ñaymyúkʉdʉ, jikyꞌátʉp wa̱ꞌa̱ts es éxtʉm kyaj mba̱a̱t yajpekymyoꞌoy, diꞌibʉ myʉda̱jtypy tiꞌigyʉ ñʉdoꞌoxy, diꞌibʉ jikyꞌa̱jtp tudaꞌaky es ñayꞌaguwítsʉty, diꞌibʉ naymyayꞌa̱jt naywyindsʉꞌkʉp, diꞌibʉ oyña̱ꞌa̱jʉty ꞌyaxá̱jʉp ja ja̱ꞌa̱y yajxón ma̱ ja tyʉjk, diꞌibʉ mba̱a̱t yaꞌʉxpeky,
3diꞌibʉ kyaj myʉꞌiiky, diꞌibʉ kyaj tsyiptʉjkʉty, diꞌibʉ oyjyaꞌay, diꞌibʉ tudaꞌaky amumduꞌuk jot, diꞌibʉ kyaj myeeñꞌoogʉty,
4diꞌibʉ yajxón anaꞌamp ma̱ tyʉjk es dʉꞌʉn tmoꞌoyʉt ja ijxpajtʉnʉ ꞌyuꞌunk ꞌyʉna̱ꞌk es myʉmʉdówʉdʉt es wyindsʉꞌʉgʉdʉt;
5pes pʉn tuꞌuk kyaj tjaty ꞌyanaꞌamʉt ma̱ yʉ kyʉꞌʉmdʉjk, ¿wiꞌix mba̱a̱t tkwentʉꞌaty ja myʉmʉbʉjkpʉty ma̱ ñaymyúkʉdʉ?
6Kyaj tyúnʉt mʉbʉjkpʉtʉjk kwentʉꞌa̱jtpʉ diꞌibʉ na̱a̱mnʉm tmʉmʉbʉjktsooñ ja Dios, mʉt kooxyʉp dʉꞌʉmbʉ tsojk nʉjx ñapʉdsemy mʉj kʉjxm es tsojk nʉjx ñajaty éxtʉm ja mʉjkuꞌugópk oj yajka̱jxpéky.
7Nandʉꞌʉn koonʉm tsyékyʉty es ñaywyindsʉꞌʉgʉdʉt ma̱ yʉ diꞌibʉ kyaj yʉꞌʉdyʉ Diosʉ myʉduumbʉ, kʉdiibʉ pʉ́n kyawindsʉꞌʉgʉdʉt es ja mʉjkuꞌugópk yajpekykya̱ꞌa̱dʉt.
8Es nandʉꞌʉn diꞌibáty pyudʉjkʉdʉp ja mʉbʉjkpʉtʉjkʉ kywentʉꞌa̱jtpʉty, yʉꞌʉ diꞌibʉ naymyayꞌa̱jt naywyindsʉꞌkʉp, diꞌibʉ kyaj kyoꞌoyꞌʉ́y kyoꞌoygyajxy, diꞌibʉ kyaj myʉꞌiiky myʉmiꞌigyʉty, diꞌibʉ kyaj myeeñꞌoogʉty.
9Nandʉꞌʉn koonʉm tsyékyʉty es tmʉꞌoꞌktʉ́wʉt ja tʉyꞌa̱jtʉn diꞌibʉ Dios tʉ dyaꞌíxyʉty diꞌibʉ nmʉbʉjkʉm, es myʉdátʉt wa̱ꞌa̱ts ja jyot wyinma̱ꞌa̱ñ,
10es jawyiin yaꞌijxmátsy; es pʉn kyaj tmʉdaty ja pyeky, waꞌan ttuñ ma̱ ja mʉbʉjkpʉtʉjk ñaymyúkʉdʉ.
11Es nandʉꞌʉn koonʉm ja ñʉdoꞌoxyʉty ñaymyayꞌát ñaywyindsʉꞌʉgʉdʉ, kyaj ꞌyabiꞌtsꞌáttʉt, es ʉygyupʉk kyajxykyupʉ́ktʉt.
12Pes tuꞌuk diꞌibʉ pyudʉjkʉp ja mʉbʉjkpʉtʉjkʉ kywentʉꞌa̱jtpʉ, yʉꞌʉ túnʉp diꞌibʉ myʉda̱jtypy tuꞌuk jeꞌeyʉ ñʉdoꞌoxy es diꞌibʉ jyajtypy tꞌanaꞌamʉt ja ꞌyuꞌunk ꞌyʉna̱ꞌk ma̱ yʉ jyʉʉn tyʉjk.
13Mʉt ko yʉ pudʉjkʉbʉty diꞌibʉ yajxón tuundʉp, pátʉdʉp tuꞌugʉ windsʉꞌkʉn es dʉꞌʉn amumduꞌuk jot tmadya̱ꞌa̱ktʉt ja mʉbʉjkʉn diꞌibʉ myʉda̱jtypy ma̱ Jesukristʉ.
14Tim tsojk nʉjx nguꞌixa̱ꞌa̱ndʉ, per tyam nduknigaxtʉ ma̱ tya̱dʉ neky ja̱a̱ybyéty,
15es pʉn akwʉꞌʉmʉpts, mnijáwʉp wiꞌix mnayyaꞌítyʉty ma̱ Diosʉ jyaꞌayʉty, pʉ́nʉty myʉbʉjktʉp ja Diosʉ jiikypyʉ es dyaꞌittʉ ja tʉyꞌa̱jtʉn. Es ja tʉyꞌa̱jtʉn, dʉꞌʉn yʉꞌʉ éxtʉm tuꞌugʉ pila̱a̱r diꞌibʉ pyattʉnaapy ja tʉjkniꞌx, es nandʉꞌʉn éxtʉm ma̱ tsondaꞌaky ja tʉjk.
16Tʉyꞌa̱jtʉnʉꞌʉ ko niꞌigʉ mʉj ja Diosʉ jyaꞌa diꞌibʉ ijty kyaj yajnijáwʉ: Miin ja̱jt ja Kristʉ mʉdʉ ja̱ꞌa̱yʉ ñiniꞌx, yaꞌijxʉ ja Espíritʉ Santʉ ko wa̱ꞌa̱ts yʉꞌʉ, ijxʉdʉ ja ánklʉsʉty, yajnimaydyák ma̱ naxwíñʉdʉ ja̱ꞌa̱yʉty, mʉbʉjkʉdʉ ja̱ꞌa̱y ya̱ naxwiiñ, yaꞌꞌaxa̱jʉ jam tsa̱jpótm.
