1Ijihuni hahi vea kaꞌene nú areri pakirasahunaꞌe henareja nú vwihajajaho maijaho areme iki Atenisi hiꞌipisana ronareꞌe hiju.
2ꞌEne hu Timoti núni vwea kaꞌene nú puꞌúmo Godoni kaukara vejiꞌina kaꞌene Keriso oni vuꞌa maa maiuꞌina ꞌwaraviꞌina ranavuꞌe ja niꞌajihe joni nimairoa kisinaꞌe reꞌamarono vuꞌu.
3ꞌEjakame jara siseisei hijujara ja patanuꞌurihuna. Ijihuni maijaho ja niheju nú nikaꞌina hihunaꞌe iji pijúhana.
4Núra ja puꞌúmo hijajino nú ja puꞌúmo siseꞌi ꞌahúhunaka ꞌwaravajaho ja nihejaraꞌomo iviamaa ijaꞌina renu.
5Ijihunihahi na areri pakairahunaꞌe henarejo joni nimaa roijí heꞌi ꞌahiuꞌe ranavuꞌe vuꞌu. Ijihuni maijaho na oja hianimujaho vejuroꞌi pisivisaviꞌinijara pisimiakame núra kaukara kaꞌene vejajaho maa paꞌanaꞌe rena veꞌamarono ranavuꞌe vuꞌu.
6Iviamai Timotiho ijí joni rene joni pinana maa apene ꞌunama núni roana. ꞌEne jara Godi nimaa rone oja mahe ija kisi apene joni unaꞌi saname vejujaho ro ꞌwarumana. Jara naꞌia mapoka nú vwihanúe nú ura ja kiꞌi ꞌahúu jaꞌinaꞌe areri ja ꞌuꞌo ura nú kúꞌi ꞌahiu.
7Vwehu núne nú ijihuni hahi iki hijujaho sisea piuname ahisina apejiꞌi hijura kaivo jara nihoꞌo nimaa rojujihunaꞌe nú oja sonahúu.
8Jara Natohwi jihuni vaji kirasahe namijujara rejuꞌe nú hami hiju.
9Nú icháꞌinaꞌe jonijihunaꞌe Godi teimani ꞌwaꞌeja? Ijihuni maijaho núra temara kaꞌene jonunaꞌi ꞌekajihuni hahi nú Godoni unaꞌi jonijihunaꞌe temarasahura.
10ꞌEne nú naꞌia ꞌee veiriꞌa majaa hine joni niura kihunaꞌe siporua ꞌojuraꞌomo roe kime raka kaꞌene joni nimairoa vaji panavujaho niꞌajihe areri rehuna.
11Godi kaꞌene núni Omijara Huhusune ꞌee Jesu kaꞌene núni Natohwijiꞌo núni ꞌunama venuhakame nú vuꞌe ja kihuna.
12Natohwijara venae jara ea kwinu kwino oja ꞌekaravura ꞌee emaa mahoꞌo oja ꞌekaujaho emarene ꞌee ameurahe arihama areri núra jonunaꞌi vejujaꞌinaꞌe renama.
13ꞌEne Hu ja venaꞌe joni oja Godi kaꞌene núni Omijihuni unaꞌi ariramaa rene panamaꞌeje núni Natohwa Jesuho ꞌee Huni ea ariramaijipo Hu huꞌúmo roavari veijaho matauma namihuna.
