1 Pita 5

1

2

3

4

5

¹Nookoot nga au i lok be apamedang ang sema tooltool yo kayei kuto maimai pang di tooltool yo tigaua ye bareme ke sungunu nga. Ngan au i tool kuto mai atu lapau, inbe au tauk i akamata Kirisi ye matak ye yo isolo masngana nga. Inbe au lapau, pang dama ni ye kene yo be Kirisi imulu a isi pombe mallangana a di tooltool tikamata ben ya in ene mai san ke be tipayiti ye nga, ngan nunngana ole idukau le ipa ye di tooltool yo ki nga. Ngan la lok be apamadit lomim ye urata nen.

²Maro itarang be kayei urata ben di tooltool yo matadi kala di asara yo edi sipsip nga. Nen le kin matamim kala di tooltool yo ke Maro nga dook. Ole kayei urata i, yesoo di tooltool kapala la titarang be kayei urata i nga tiap, bong kayeii, yesoo ang tapmim la lomim dook mata be kayeii i. Kumata be kayei nen nga, ngan Maro ole lon ponana yang. Nen le kin lomim tar be kayei urata a nen ngan kakap pat ye urata kootoonoo kiang, leu be, bong karai lomim le imot be kalon di.

³Inbe di tooltool tina yo Maro itar di la baemim nga, ngan kin kayei di dawa ben ang ngan di tooltool maimai a kadada podi be. Bong kapatnaia dada dook mata pang di a be titoo ang ye.

⁴Ole kayei nen, ngan la be ye lal tani yo be tool kuto mai kidi tooltool yo matadi kala di sipsip i, in be pombe mallangana ye in nga, ngan ole kakaua balingi yo ke be ilene tiap i, yesoo ole kayepe ye nunngana yo iken nen le taukan motingi i.

⁵Inbe dada gaongo leu ben ye noonoongoo yo akap pang di kuto maimai nga, le ang di kakase yo paunu nga, ngan ole kalongo betanga ke di kuto maimai ke bareme ke sungunu a kayepe parmadi. Inbe ang tina ngan le imot ole katoo dada yo be karautoo ang le kadu lopo ye di diemim, yesoo Rau ke Maro iwete nen, “Di tooltool yo di tapdi tiyitmak di nga, ngan Maro lono dook tiap pang di. Bong di tooltool yo tapdi tirautoo di le tidu lopo nga, ngan Maro lono pang di le iyei dada dook mata pang di.”

⁶Ngan la ang tapmim ole karautoo ang le du kayepe Maro yo gurana ki mai mata i, in parmana, a be nen ngan ye soo lal yo lon taru i, in ole iyitmakang le kalo ete.

⁷Le soo so yo lomim modoko ye nga, ngan kasuk la Maro baene, yesoo ya la lono pang mai san le matan kalang i.

⁸Ole kakaptutang dook ye yepongo kiang, inbe matamim kalang dook, yesoo koi kiang yo tool kuto mai kidi so sadi i, in ya la ipa be isere di tooltool yo be igarung di i. Ngan ya in dawa ben asara gok yo ene laion i, le ipa be isere so yo be ikan i.

⁹Bong ang ngan ole kakodo le kamede ye lomim medana yo kataru pang Maro i, inbe kanganga le ila diki. Yesoo, lomim galanga nen, di diemim kapala ke Maro yo tiyepe ye tana mai i le imot nga, ngan di lapau tikodo le timede inbe tisolo masngana dawa ben tina yo ang kasolo nga.

¹⁰Inbe lomim tut, ang ngan ole kasolo masngana nen ye manga modono kasin leu, lo ngan be Maro yo kanakana ngan lono pang mai san a iyei dada dook mata pang i, in ole iyei ang le kayepe dook mata mulu. Inbe ole ikata suanga yang, inbe ipamedang a kakodo le kamede nen a tala. Ngan Maro tani yo ene mai san ke be di tooltool tipayiti i, in ipootang be kayei ben di tooltool ke Kirisi, nen le ang ngan ole kalo kaye kayepe ye nunngana yo iken nen le taukan motingi i.

¹¹Ngan ya in gurana nga le imot iken ye a iken nen le taukan motingi. Moolmool.

¹²Selas, yo itara lono medana pang Kirisi i, in akamata ngan ben au ek moolmool. Ya in ilonau ye rau modono i, inbe awode pang. Ngan awode pang be apamedang, inbe awete betanga moolmool pang ye dada dook mata yo Maro lono paidi a iyeii paidi i. Nen le katara lomim medana ye le iken so.

¹³Di diemim kapala yo tiyepe malala mai Babilon a Maro ipootoo di panga ya taunu dawa ben ipootang panga nga, ngan tiyawar lo ponana kidi pang. Inbe Maka yo dawa ben natuk i, in iyawara lo ponana ki pang lapau.

¹⁴Inbe kawete lo ponana kiang pang di diemim tina ngan atu atu le imot, inbe kapatnaia lomim yo mai san in pang di a kawarara di, inbe katoo momo kiidi a kasom pangadi. Nen le apatarau pang Maro nen, be ikaua lo silene ki pang ang di tooltool yo katara lomim medana pang Kirisi nga.