1Sinyu sa mga pangulu hu mga tumutuu, tumenged ta sabuwa a daan ha pangulu daw naahà ku gayed sa pag-antus hi Cristo daw makaambit a daan asem hu pagkagamhanan din, aghangyuen ku inyu ha
2alimahan nuy gayed sa mga tumutuu ha insalig inyu hu Dios iling hu magbalantay ha tag-alima hu mga karniro din. Sa pagtanul nuy kandan kenà pineges ba inyu ha pagbayà ha iyan agkabayà-bayaan hu Dios, kenà daan tumenged hu kabayà nuy hu suhul ba tumenged ta agkabayà kaw agbulig,
3kenà daan pagpalabaw hu mga kaugalingen nuy duun hu mga etaw ha insalig inyu ba kinahanglan ha maayad kaw ha sampitan diyà ta kandan.
4Ku lumikù si Jesu Cristo sa labaw ha magbalantay balesan kaw kandin ta makaambit kaw hu harì en gayed agkahanaw ha pagkagamhanan din.
5Sinyu daan sa mga manguhed pa, magmatinumanen kaw hu mga magulang. Alan kaw magpaubus duun hu mga duma nuy ta sa insulat ha lalang hu Dios tagyanaen “Agsupaken hu Dios sa tagpalabaw-labaw ba agbuligan din sa tagpaubus.”
6Aman magpaubus kaw duun hu gamhanan ha Dios ta daw ipatangkaw kaw kandin ku mauma sa natugun ha panahun.
7Itugyan nuy sa alan ha mga kasamukan nuy diyà ta kandin ta iyan en haena tag-alima inyu.
8Magpugung kaw hu kaugalingen nuy daw magpangandam kaw ta sa kuntra nuy ha si Satanas taglibut-libut diyan ta inyu iling hu taghinigel ha liyon ta tagpan-ahà hu makagat din.
9Sukuli nuy haena ha malig-en sa pagtuu nuy ta natun-an nuy ha sa alan ha mga suled taw duun hu pagtuu dini ta tibuuk ha kalibutan nakaagi daan taini ha alantusen.
10Ku mapengahan sa mababà ha mga alantusen sa Dios maghimpit inyu daw makapalig-en hu pagtuu nuy ta daw harì kaw madaeg hu bisan inu, ta sa Dios tag-ila hu grasya daw iyan mighimu inyu ha tumutuu ta daw makaambit kaw duun hu hurà din katapusan ha pagkagamhanan hi Cristo.
11Dayeen gayed sa Dios ha gamhanan ha Harì hu hurà din katapusan.
12Si Silas sa kasaligan ha suled ku migbulig kanak hu pagsulat taini ta daw madasig ku inyu duun hu pagtuu daw matun-an nuy ha iyan haini laus ha grasya hu Dios. Aman paniguruwan nuy haini.
13Agpangamusta inyu sa mga tumutuu dini ta Babilonia ha pinilì daan hu Dios, daw agpangamusta daan inyu si Marcos sa batà ku duun hu pagtuu.
14Magkinamustahay kaw gayed ha malipayen. Sa Dios mag-ila inyu hu kalinaw sinyu sa nakigsabuwa ki Cristo.
