1Saimon rongada me Tripo kapokonepenehr lapalahn karis ehu oh e koasoakoasoane en mahweniong Sudia oh kauwehla douluhl.
2E tehkada me rohng wet kahredahr aramas akan ar masepwehkadahr oh rerrer, ih eri kohla Serusalem oh kapokonepene aramas akan,
3oh song en kakehlahda nan kepehdirail kan ni eh ndaiong irail, “Kumwail ese soahng kan me ngehi, ei peneinei, oh riei ko, wiadahr pwe se en doarehla Kosonned en Moseso oh Tehnpas Sarawio. Kumwail pil ese duwen mahwen kan me se wiahier oh apwal akan me se lelohng.
4Riei ko koaros mehkihla ar mahwenki atail Kosonnedo, atail Tehnpas Sarawio, oh atail wehi, oh ngehite me momour.
5Ahpw emen en dehr nda me I song I en pein doarehla ei mour ni ahnsou apwal; I sohte wiahki me I kesempwal sang riei ko.
6Mehlelete pwe wehin liki koaros sang ni ar kailongkin kitail, re ehupenehr pwe re en kamwomwkitailla, ahpw ngehi I uhdahn pahn doarehla ei wehi, Tehnpas Sarawio, oh amwail pwoud kan oh noumwail seri kan.”
7Koasoi pwukat ahpw mwadangete kamarahda nan kapehden aramas ako,
8re ahpw sapeng ni ngihl laud, ndinda, “Met komwi wiliandier Sudas oh Sonadan, oh wialahr at kaun.
9Komw mahwenkin kitail, pwe se pahn kapwaiada mehkoaros me komwi pahn mahsanihong kiht.”
10Saimon eri kapokonepene sounpei koaros oh mwadangete kohla kanekehla kehl kan en Serusalem oh kakehlakahda wasahn poadoandoar kan.
11E ahpw kadarala Sonadan nein Apsalom Sopa, iangahki lapalahn karis ehu. Sonadan eri pwakihpeseng tohn wasao oh mihla mwo.
12Tripo eri mweselsang Tolemais iangahki lapalahn karis ehu pwehn mahweniong Sudia, e wa Sonadan rien Saimon, nin duwen aramas selidi men.
13Saimon eri kauwada eh kahnimpwal kan nan Adida ni keilen patapato.
14Ni ahnsou me Tripo rongada me Saimon wiliandier rie Sonadan, oh e onopadahr en mahweniong, e ahpw kadaralahng mahsen wet:
15“I salihdier oh kolokol riomw pwutak Sonadan, pwehki eh sohte kapwungala mwohni me e pweipwandkihong wehi.
16Eri, I pahn kasaledekihala ma komw pahn pwainkihong ie paun en silper 6,000, oh komw pil kadarodo riemen nah pwutak pwe I en irehdi ara saledek pwe Sonadan de kasaledekla oh uhd uhwong ie.”
17Saimon esehte me re wiewia lokaia likamw, ahpw e koasoanehdihte re en rikada mwohni ko oh pwutak riemeno en pekederla, pwehki eh perki mehn Suhs kan de lokaia tohtohkihda.
18E perki pwe mwuhr re pahn nda me Sonadan kamakamala pwehki Saimon eh sohte kadarala mwohni oh pwutak ko.
19Eri, e ahpw kapwaiada dahme Tripo koasoanehdi, ahpw Tripo sohte kapwaiada eh inou, e sohte kasaledekihala Sonadan.
20Tripo eri mwekidla pwehn mahweniong Sudia oh kamwomwala, re pidipidekseli lao lel ni ahl en Adora. Ahpw Saimon oh nah sounpei ko pil mwekidla peipeianirailte kohla.
21Imwintihti kan me mi nan kelen mahwen en Serusalem kadakadaralahng meninkeder kei rehn Tripo pwe re en pakairkihong en kadarodo rehrail mehn ketihnain ni ahnsou mwadang oh re en keid nan sapwtehno.
22Tripo kaunopada nah sounpei koaros pwe re en mahwen, ahpw pwohngo melimel laud wiawi, oh e sohla kak kohda pohn dohlo. Ih eri pweiekla Kilead.
23Ni eh kerenlahng Paskama, e ahpw kemehla Sonadan wasao oh sarepedi ie.
24Tripo eri pwuralahng nan uhdahn eh wehi.
25Saimon eri kadarala ohl ekei pwe re en wadohng paliweren rie Sonadan nan Modein, pwe en seridi nan sapwen eh pahpa kahlap ako.
26Aramas koaros nan Israel ahpw pahtoukihla kowahlap mehlahn Sonadan, oh re mwahmwahieiki ahnsou reirei.
27Saimon eri kauwada mehn kataman ehu pohn sousou en eh pahpao oh rie ko me aramas kak kilang sang wasa doh. Mwowe oh mwuri kidikidkihla takai perper medendel.
28E pil kauwada takai perperda isuh ni pali koaros en sousou en eh pahpao, nohno, oh rie me pahmeno.
29E kapilkipene takai perper ko uhr kei me irekla oh mahlen kei mi ie. Ekei mahlen kapwat en sounpei, a ekei mahlen en sohp. Iei mehn kataman en ar powehdi nan mahwen kan, me aramas en seiloak kan kak kilang.
30Sousou ko me mi nan Modein mihmite lel rahnwet.
31Ni ahnsowo, Tripo mwerusuwedihedi nanmwarki pwulopwulo, Antaiokus Kewenemen, oh kemehla,
32oh alehdi mwoalen nanmwarki nan Siria. Suwed tohtohie me e kahrehiong wehio.
33Saimon onehda sapahl wasahn mahwen kan nan Sudia, iangahki wasahn iroir kan, kakehlakahda kehl kan, oh kihong mete ni ewen kehl kan; e ahpw audehkihda wasa ko mehn ketihnain.
34Saimon pil kadarala meninkeder kei rehn Demihtrius Keriemen, pwe re en peki reh en kupwurehla sapwarailo oh kasaledekihirailsang daksis, pwe ihte me Tripo kin wiewia, iei piripirapa sapwarail kan.
35Iet audepen kisinlikou sang Nanmwarki Demihtrius ong pasapengpen ar pekipeko:
36“Rahnmwahu sang Nanmwarki Demihtrius, ong Samworo Lapalap Saimon, kompoakepahn nanmwarki, ong mehn Suhs koaros, oh ong ar kaun akan.
37I aleier nihn kohl oh tehntuhke kohl me kumwail kadarodohng ie, oh I onopadahr I en wiahda inou en meleilei ong kumwail oh pil kaweidki lapalap akan me pwukoahki palien rik daksis re en kasaledengkumwailsang kihda daksis.
38Se pwurehng kakehlakahla at inou ong kumwail mahs, oh wasahn mahwen kan me kumwail kauwadahr pahn mihmihte pahn amwail manaman.
39I mahkikihongkumwailehr sapwung kan me wiawidahr lel ahnsou wet, oh I kasaledekihkumwailsang kihda soangen daksis teikan me kumwail wie pwapwain lel met.
40Mehn Suhs koaros me kak iang sounpei kak iang towehda sapwellimen nanmwarki sounpei kan. Popohl en mie rehtail.”
41Eri, nan pahr 170 mehn wisik toutou me mehn liki kan katoutouwihekihla mehn Suhs kan ahpw kemwekidsang.
42Aramas akan ahpw tapihada ntingihedi nan neirail doarepwe kesempwal kan mahsen pwukat: “Ni tepin pahr en mwehin Samworo Lapalap Saimon, kaun lapalap en mehn Suhs kan.”
43Ni ahnsowo Saimon koasoanehdi en mahweniong Keser oh kapilkipene nah sounpei kan. E wiahda pasapas en mahwen kei me kak kemwekidseli, oh wahla peiankihda kehl en kahnimwo, e ahpw mahweniong ehu wasahn iroir ko, oh kalowehdi kahnimwo.
44Sounpei ko me mi pohn pasapas en mahwen ahpw mwadengete pedolong nan kahnimwo, oh met kahrehda ar pingida mehlel.
45Ohl akan nan kahnimwo, ar pwoud kan, oh neirail seri kan ahpw tehrpeseng ar likou kan ni ar nsensuwed oh doudahng pohn kehlo. Re ahpw pekipeki ni ngihl laud rehn Saimon irail en wiahda ehu inoun meleilei.
46Re peki ni ngidingid, ndinda, “Komw ketin kupwur mahkohng kiht, komw dehr ketin kalokehkin kiht at wiewia kan!”
47Eri, Saimon ahpw wiahda inou ong irail oh katokihedi mahweno. E ahpw kausasang aramas akan nan ihmw kan oh kamwakelehda ihmw kan me dikedik en eni kan mi loale. Ni eh kaimwisekalahr mepwukat, ih oh nah ohl akan ahpw pedolong nan kahnimwo wie kokoulki koulen kaping.
48E kauwehla mehkoaros me pahn kasaminehla kahnimwo ong kaudok oh kihdiong wasao aramas akan me pahn peikiong koasoandi koaros me mi nan Kosonned en Moses. E kakehlakahla wasahn poadoandoar kan en kahnimwo oh kauwada tehnpese ie.
49Sounpei ko me mi nan kelen mahweno nan Serusalem irairdi re en dehr kohieisang loale pwe re en pwainda de netikihla mehkot. Re inenen duhpekla mehla oh ekei irail mehkihla ar duhpek.
50Mwurin mwo, re ahpw peki rehn Saimon en wiahiong irail ehu inoun meleilei. Ih eri pwungki, e ahpw kihieisang irail wasao oh kamwakelehda wasao ong kaudok.
51Ni rahn keriesek siluh en sounpwong keriau, nan pahr 171, lapalahn kasarawi ehu wiawi nan kahnimwo pwehki mehn Israel kan ar saledeksangehr kahpwal laud me re mihla loale. Saimon oh nah ohl ako ahpw pedolong nan kahnimwo wa tehntuhke, oh wie kokoulki koulen kaping oh kasapahlkalahngan, oh kesekesengki arp, simpal, oh lair.
52Saimon eri wiahda koasoandi ehu me rahno pahn wiahla rahn kaperen oh re pahn kin wiewia nan sounpar koaros. E kakehlakahla wasahn poadoandoar kan en Tehnpas Sarawio pohn dohlo sallahng kelen mahwen, ih oh nah sounpei ko eri wiahda ar poahsoan kaun wasao.
53Nein Saimon pwutak, me adaneki Sohn wialahr mwahnakapw men, Saimon eri kasapwilada en kaunda karis en sounpeio pwon, Sohn ahpw kauwada eh poahsoan kaun nan Keser.
