1MIZMIZ 8 NOSIK 1-13 Pedikeredi, ka iaka wabi datagrare able lewerlam pe keisor agudim wagimuretlare. Agekar, meriba aukaidoni nagri, pe wawa detauteda. Aukaidonide le waikai weber a aospirlam epe omaride no le odimer barkak gabge.
2Aukaidoni waike umerkak le waikai sikak obai gair luge.
3Epe able le Agudi irmiri ikeli, Agudira pardar ia abidoge waike.
4Pedikeredi, kara okakes lewerarwem pe keisor agudem agimuretlare. Mi umele able keisor agud wi beslu nagri, a mi umele epe no netat agekar Agud dali.
5Wader legize detauteda aumitkar agud uridli a ople muige kotorge a gesepge.
6Epe mimi umele no netat Agud dali. E dali Bab ge gair lu detagmi. Mi abra uridli. Epe no netat Ople, able Ople Iesu Keriso. Gair lu batagerma abi doge a mimi uridli abi doge.
7Wader le nole umerkak able agekar mir. Kikem kerkerge, wi wadikepwareda iaba keisor agud idid wauridli, a able lewer wi wagimurteda agekar wanagri keisor agudira. Able kerkerge muige abi okage wi mena uridli okakise keisor agudide a wader korep lewer. Nade wi able lewer erweda wi odikepware wi seksek ikereda, a wi odikepware wi batkoeda.
8Epe leweride nole merbi daiseda Agudim maikem. Mi nole gair lu depekeda nade mi able lewer erweda, a mi nole able lu erpeireda nade mi dikaireta able lewer aro.
9Wa okeoke, wa nole amisirkak uridwa ese wa netat le ikairare wit waikai able lera pe owatu gebgeb ikeredi.
10Ese netat lera pe abra owatu gebgeb ikeredi wabi odasmerlare (pe waba aukaidoni ike) wairolare muige keisor agudi metage, wa umele uridli abi upiatidar obakwar able lewer wairo pe keisor agudim wagimuretlare; e iako odikepwar e batkoi.
11Able tonarge wabi auidonide detkoi owatu wabi gebgeb berbetira, ge abim Keriso eumida.
12Wa wit ikereda Kerisoim nade wa wit ikereda wabi berbetem, wa iabi nakereda sirip bakereda.
13Pedikeredi, ese lewerlam kara berbetide wit waikai, ka iako dakailu leweraro niaikarem. Able tonarge ka umerkak kara berbet datkoi.
