1Dóo maqee qinée Ánutuna náaquqara andeeqara maraquna nímimari ainainnara qímannimianaura. Qiní qíkaqaafasaauqa qinée minára ánoona ufa íriaqee qídaqa qímannimidaqa.
2Óoqai ínnee aamína máru kamuqoo mandá fasiqa fannoo ínni rarisámeeqee sía ufa qímaru túmunannai áuqira áfaannunnai ubeekée márufaqa miná ufa ámeemaanai fímariqau.
3Dóo maqee ínnee maanára írimariafanoo Ánutuna maraquna fannoo rakísimari fasiqafa sía amana Yísuna áqurarara ufa ámiannoo kafáa miná dínni kai Yísufa karaambáiqa máridanoo fee qímariasa Ánutuna náaquqara andeeqara maraquna fannoo misá dadaaqinára miqí qídaqa.
4Óosana óosana innaarúnaindaraa ainaina faiqí ánaasee dadaaqíanifeera nímirafa márifanoo moodáa máraquna fannoo kai aiqáma mi-aiqama ainainná maqásaa fasiqa anaasee nímidanoo.
5Maasá Ánutuna aináinirafa óosana óosana aináinirafa máridanoo moodáa karaambáiqa aináinammidaqa.
6Ánutuna ufara suqímariasa dadaaqírafa óosana óosana máridanoo moodáa Ánutufa kai aiqáma áadu áadu akoofásaikirana faiqí ánaasee nímifaqa minánnai quándaki narí dadaaqí narí dadaaqiaqéera.
7Ánutufa Yísuna ufa írimariasaki aiqáma fasiqa anaasee náadu náadu narí maraquna koorooíanifee afeekana nímufaqa quándaki minánnai narí dadaaqí narí dadaaqiaqéera nímidanoo.
8Ánutuna maraquna fannoo moo fásiqa írirana faqaana ufa qímannimimarina ámidanoo kafáa mi-maraqunáfa moo fásiqa aiqáma ainainara írirana ámidanoo.
9Mi-moodaa maraqunáfa kai Yísuna mandaaqárana moo fásiqa ámidanoo, moo fásiqa mi-maraqunáfa faiqí ánaasee aurírana taikánnisara afeeka ámidanoo.
10Ánutuna maraquna fannoo faiqí sía amana áuquaqaa íra áinaina afeeka moo fásiqa ámifanoo mi-fasiqáfa afeeka ainaina áuqaidanoo, moo fásiqa Ánutuna afeeka ámifanoo Ánutuna ufa afeekaikámandee qímannimidanoo. Mi-maraqunáfa moo fásiqa afeeka ámifanoo maraquna nímimariasa faqa moo únna qíra maraquna nímimarina faqa mi-fasiqáfa kai rainásee níndafaidanoo. Mi-maraqunáfa moo fásiqa afeeka ámifanoo ánaamura ufakíqari sía narí íri maru ufanakiqari amaana máqaki ufa qímannimidanoo. Mi-maraqunáfa kai faiqí moó afeekaikámma ámifanoo ánaamura ufakíqari narí sía íri mari ufanakiqari faiqí ánaasee qímannimisaifanoo moo fásiqa fannoo sía mi-ufána óosana írirainni maraquna fannoo kai miná qímamifanoo mifá indée kai ídanoo miná óosana qímannimidanoo.
11Mi-oosana oosana ainainná nímimarifa moodáa maraquná kai máridanoo. Mifá narí kai narí áidiramau rainá rainá mándaida áadu áadu dadaaqíra akoofásaikirana nímidanoo.
12Ásauku mundírana afaaqa moodáara foora máridanoo miná átiuqa moómoo máridaqa afaaqa sía rainánoo máridanoo moodáa máridanoo.
13Miqíkai másee maasá aiqáma Yuda máqannaasa faqa ánaamuru moómoo máqannaa maríasa faqa karabúsaki aináinimáriasa faqa idukí máriasa faqa maasá aiqáma moodáa maraqunannái nammári marasée moómoo átiuqa moodáana apataiká kai iqá máriasa Yísuna apata máriafanoo Ánutufa moodáa maraquna nammáriara foora nímifaqa náunnanara miqídaqa.
14Faiqí moó adaká sía múduka máridanoo moómoo afaaqa ootúpanoo máridanoo.
15Mi-fasiqána áiku fannoo qínoo sía qinée ásauku máriaqaana minára qinée sía maa-fasiqána afaaqáu máridau. Qinée Pauroosa minára maaqí qíqa kúqaa áiku fannoo sía ásauku kinoo sía mi-ufána qínnanannái mooná afaaqaíkianau káqi mi-fasiqána afaaqá máriannoo.
16Mi-fasiqána áaqoo fannoo qínoo qinée sía maa-fasiqána áfu márunnanara sía miná afaaqáu máridau. Qinée Pauroosa minára maaqí qídaqa kaqi mi-aaqoofá sía áfukinoo sía mi-ufána qínnanannái mooná afaaqái kíannoo káqi mi-fasiqána afaaqa máriannoo, sía sía miqíannoo.
17Mi-fasiqána aiqáma afaaqa áfu kai márinanoofau náqi fee mándee ufa íriannoo fee. Miná afaaqa áaqoo kai márinanoofau náqi fee mándee udiráannoo fee.
18Ánutufá kai narí iriséenoo narí áidiranannai faiqí afaaqa aiqáma ainaina afaaqa quqáqoofa máridanoo.
19Aiqáma ainaina moodáa ainainá kai márinanoofau sía faiqí afaaqa márini.
20Dóo miqínoo moómoo afaaqa átíuqa moodáa afaaqara foora ootúpanoo máridanoo.
21Faiqí afaaqaíndaraa áfu fannoo sía amana ásaukuara anée fúa sía qiní dadaaqí maríanna ainainafa máriananoo, sía qíannoo. Kafáa ákiqa fannoo sía áikuara anée fúa sía qiní dadaaqí maríanna ainainafa máriananoo. Sía miqí qíannoo.
22Maasá qeeqá qifaaqa áti dauní nídafidanoo ummooqukí marí atiuqara fífau ainainee qíananoo sía márinaqa náqi fee ianáuree.
23Maasá qeeqá qifaaqa átiuqa uréeqara átiuqee qímariana maasá misásaa firaaqóo ámiqimmandee misásaa rakísidaqa. Nífu qáfaafaqa nisaurímaria átiuqa maasá ámiqimmandee rakísidaqa qamunnannai ititáidaqa.
24Nífu qáfaafanoo nídi mári átisa sía ámiqimmandee ititáidaqa kái akooqóo máridanoo. Ánutufá kai narí íriranannai maasá qifaaqasáa átiuqa maaqímasee ootúpanau, Uréeqara átiuqa úriqarara rakisirana máraanee qímasee ootúpanau.
25Miqí maríanara sía maasá qifaaqa rainárafa máridanoo aiqáma áadu áadu qifaaqa áti fannoo naríara naríara amanamana kái ámuqusidanoo narínni narínni rakísidanoo.
26Moodáa qifaaqa áti dídafifanoo aiqáma qifaaqa dídafidanoo, kafáa miná dínni moodáa qifaaqa amooqífanoo aiqáma qifaaqa asasídanoo.
27Qinée Pauroosa ínni Koorinti máqannaara qídaqa ínnee Yísuna ufara suqímariasa aiqáma ásauku mundírana afaaqara foora máriafaqa aiqáma miná afaaqasáa afaaqa fannoo narí ámaaqa narí ámaaqaki kai máriafanoo.
28Ínnee Yísuna ufa íridaqa nuasa suqíranaki Ánutufa miqíkai ínoo ínni faiqí ánaasee maréeqeenoo maaqímmasee quqánnisóofaqa máriafanoo. Ánutufa Yísufa niqiqoo fásiqausa ínniki úriqararausaikinau, miqóoqari misá uréeqarausa Ánutuna ufa faiqí ánaasee maqúsa maqusa qímannimimarusa faqa ínniki quqánau. Dóo misá uréeqarausa ufasáa rakísirausa maqúsaki qímannimimarusa Ánutufa ínniki quqánau. Kafáa miqóoqari faiqí ánaasee óosana óosana ainainirausa quqánau. Akaqáusa faiqí sía amana áuquaqaa íra áinaina áuqimariasa quqánau. Akaqáusa aurírausa andeeqée marúsa quqánau. Akaqáusa faiqí ánaasee narí dadaaqí narí dadaaqí márusa quqánau. Akaqáusa ufa suqírausasaa ámiqimmandee rakísirausa quqánau. Akaqáusa ánaamuru ufakíqari narí sía írimaru ufanakiqari Yísuna ufa suqíranaki qímannimimarusa Ánutufa quqánau.
29Ínnikiqari sía aiqámausa Yísufa niqiqoo fásiqausa máriafanoo, sía aiqámausa maqúsa maqusa qímannimiqanusa máridaqa. Sía aiqámausa maqúsai naamúaqira ufa qímannimimariasa máridaqa. Sía aiqámausa faiqí sía amana áuqaaqaa íra ainaina áuqimariasa máridaqa.
30Sía aiqámausa aurírana taikánniseemaria fasiqausa máridaqa. Sía aiqámausa ánaamuru ufakíqari nári sía írimaria ufanakiqari qímannimimariasa máridaqa. Mi-anaamuru ufánakiqari nári sía írimariafanoo maraquna afeeka fannoo dadaaqifaqa mi-ufána óosana sía aiqámausa írimariana kooroo ifáranoo.
31Ínnee ínneeqa írirana Ánutuna afeekannái narí nímira afeeka óosana óosana faqa akoofásaikirana óosana óosana faqa misáuqakinaana úriqararana kai ummárararee qímasee afeekaíkiaqa. Dóo qinée mi-firaa uriqarara oosana uqanna maaqóo kooroo ianáura.
