1 Khawrin 12

1

2

3

4

5

6

7

8

9

10

11

12

13

14

15

16

¹Manuca rhoek, mueihla ah na mangvawt uh ham ka ngaih moenih.

²Namtom rhoek bangla na om uh vaengah mueirhol olmueh taengla ngahngah m'mawt uh tih n'khuen uh te na ming uh.

³Pathen kah Mueihla neh aka cal loh, “Jesuh tah kosi ni,” a ti pawt te nangmih taengah kam phoe. Te dongah Mueihla Cim nen pawt atah, “Boeipa Jesuh,” a ti thai moenih.

⁴Te dongah kutdoe cungkuem om dae Mueihla tah amah boeiloeih ni.

⁵Bibinah khaw a cungluem la om dae Boeipa tah amah boeiloeih ni.

⁶Pongthohnah khaw a cungkuem la om dae Pathen amah te cungkuem dongah cungkuem la tueng.

⁷Tedae Mueihla kah a phoenah loh amih a rhoei nah ham rhip a paek coeng.

⁸Pakhat te Mueihla loh cueihnah olka a paek tih, a tloe taengah Mueihla amah loh mingnah olka khaw,

⁹Mueihla amah loh a tloe tangnah, Mueihla pakhat loh a tloe taengah hoeihnah kutdoe,

¹⁰a tloe taengah thaomnah kah pongthohnah, a tloe taengah tonghma ol, a tloe taengah mueihla kah boelhkhoehnah, a tloe te namtom ol, pakhat te ol a kongnah a paek.

¹¹Te dongah he boeih he Mueihla amah pakhat loh pakhat rhip taengah a tueng sak tih a ngaih bangla a tael pah.

¹²Pum tah pakhat la om tih pumrho muep a om. Pum kah pumrho boeih loh muep om cakhaw a pum pakhat ni a om bangla Khrih khaw om van.

¹³Mamih khaw, Judah rhoek khaw, Greek rhoek khaw, Sal khaw, aka loeih khaw mueihla pakhat dongah pum pakhat la boeih n'nuem uh. Te dongah mueihla pakhat la boeih n'tul coeng.

¹⁴Pum tah pakhat bueng van pawt tih pumrho muep om.

¹⁵Kho loh, “Kut te kai moenih, pum kah a hut la ka om moenih,” ti koinih he kongah pum kah koe la a om pawt moenih.

¹⁶Hna long khaw, “Mik te kai moenih, pum kah koe la ka om moenih,” ti koinih he kongah pum kah koe la a om pawt moenih.

¹⁷Pum tah mik la boeih om koinih hnavue tah melam a om eh? Hnavue la boeih om koinih a bova tah metlam a him eh?

¹⁸Tedae pumrho te Pathen loh rhip a khueh coeng. Amih pakhat rhip pum dongkah ham ngaih ta.

¹⁹Te dongah pumrho loh pakhat la boeih om koinih pum te melam a om eh?

²⁰Tedae tahae ah pumrho loh yet ngawn cakhaw pum pakhat ni a om.

²¹Te dongah mik loh kut te, “Nang kan ngoe moenih,” te phoeiah lu loh kho te, “Nangmih kang ngoe moenih,” a ti thai moenih.

²²Tedae pum dongkah pumrho muep la aka poek loh tattloel la lat om om tangkik.

²³Pum kah sawtsit aka om la m'poek uh pumrho te khaw hinyahnah neh anah la n'thingcam uh. Mamih kah rhaidaeng long khaw thenrhuep a khueh khungdaeng.

²⁴Tedae mamih kah hlangcong pumrho loh ngoe pawt cakhaw Pathen loh pum te a sombong tih vawt rhoek taengah hinyahnah muep a paek.

²⁵Te daengah ni pum dongah paekboenah a om pawt eh. Tedae pumrho amah te pakhat ham khaw mawn puei saeh.

²⁶Te dongah pumrho pakhat loh a tloh atah pumrho loh boeih patang. Pumrho pakhat a thangpom atah pumrho boeih loh a omngaih puei.

²⁷Nangmih tah Khrih kah pum neh cungvang ah a pumrho la na om uh.

²⁸Te dongah amih te Pathen loh hlangboel khuiah, lamhma la caeltueih rhoek, pabae ah tonghma rhoek, pathum ah saya rhoek neh thaomnah, hoeihnah kutdoe, talongkung rhoek, boelrhaikung rhoek, namtom ol neh rhep a khueh.

²⁹Hlang boeih he caeltueih moenih. Hlang boeih he tonghma moenih. Hlang boeih he saya moenih. Hlang boeih he thaomnah moenih.

³⁰Hlang boeih loh hoeihnah kutdoe a khueh uh moenih. Hlang boeih loh olka a thui moenih. Hlang boeih loh a thuicaih moenih.

³¹Tedae kutdoe tanglue te yakvawt uh lah. Te dongah longpuei he a puehkan la nangmih kan tueng pueng.