1 Corintios 12

1

2

3

4

5

6

7

8

9

10

11

12

13

14

15

16

¹Gwenadgan, anmarga-gurgin-burbaled-Bab-Dummad-uked nue-wisi-gudigued an be-abemardo.

²Bemar nue wismalad, amba be Bab-Jesús-wissuli-gudimargu, bab-dummagan-sobarmalad-geg-sunmakedse be ebipiledii gusmalad.

³Agala, emigindi, nue-wisgubi an be-abemardo, Bab-Dummad-Burba-ganguedba, dule geg Bab-Jesús-ukabsaed, degine, na e-itolegedba geg sogbalid, “Jesús, Dummad-Biriginedye,” ar Bab-Dummad-Burba-Isligwaled ega sogergebed, deyob be sogye.

⁴Degirdi nabir. Gurgin-burbaled akar-akar nika-inigwele, unnila Bab-Burbadi, wargwennaa gued.

⁵Ar Babga-arbaed akar-akar-nika-inigwele, unnila Bab-Jesúsʼdi wargwennaa gued.

⁶Ar Babga-ibmar-imakleged akar-akar nikad, degi-inigwele, a-Bab-Dummadi e-sunnad anmargi-ibmar-imakega imaked.

⁷Gwenadgan-war-wargwengala, Bab-Burba gurgin-burbaled-akar-akar-ibmar-imaked uksad, adi, gwenadgan bela egi nabir bendaklemalagar.

⁸Bab-Burba, dule-war-wargwenga, nue-binsaed-nikaa-sunmaked ega uked. Baidgardi, nue-ibmar-wisid ega ukmogad, ar Bab-Burbadi, wargwennado.

⁹Amba Bab-Burba dule-baidga, nue-Jesúsʼgi-bensuli-nanaed ega uked. Degi, baidgardi, dule-uellemalad-sunna-nudaked ega ukmogad.

¹⁰Bab-Burba, baidgardi, ibmar-dakledisurmalad-imaked ega uked. Baidgardi, Bab-Gayaburba-barsoged uked. Baidgarmoga, nabir magar-burbar-ibmar-itoged, we, Bab-Burbadibe, we, burbamar-isganadibe. Degine, baidgarmoga, nabir gaya-baid-baid-sunmaked uked. Deginbali, baidgarmoga, nabir gaya-baid-baid-oduloged uked.

¹¹Ar bela we-gurgin-burbaled-akar-akar-uklegedi, unnila Bab-Burba-wargwenna-guedbi uked. Degine, na e-itolegedba doamarga we-gurgin-burbaled ukbie, amarga uked.

¹²Ar igi anmar-sana wargwenna gue, degite, eba-akananaimalad bukidar gued. Eba-akananaimalad bukidar-gue-inigwele, sandi unnila wargwenna gued. Amba Cristo deyobmogad.

¹³Ar anmar bela unnila Bab-Burba-wargwenna-guedgi oglesmalad. Agi anmar bela san-wargwenna gunonikid, Judíoʼdibe, Judíoʼsurdibe, maidibe, maisurdibe, ar bela anmargi Bab-Burba ubosadbimalad.

¹⁴Dule-san unnila wargwenna gusulid, bukidar egi-akananaid nikad.

¹⁵Ar mali sokardibe: “Ar an argansursoggu, an san-e-sordasurye.” Degi-sogedba, soglesurdo, mali, san-e-sordasurye.

¹⁶Ar uaya sokardibe: “Ar an ibyasursoggu, an san-e-sordasurye.” Degi-sogedba, soglesurdo, uaya, san-e-sordasurye.

¹⁷Ar bela dule-san ibyabiile, ¿igi ibmar itosarsunna? Ar bela dule-san uayabiile, ¿igi ibmar usarsunna?

¹⁸Emigindi, Bab-Dummad na e-itolegedba dule-sangi eba-akananaid nasiksad.

¹⁹Ar belagwapa dule-sangi-akananaid emarbiina, ¿bia dule-san nagusarsunna?

²⁰Ar emigindi, dule-sangi-akananaid bukidar-inigwele, unnila dule-sandi, wargwenna gued.

²¹Geg ibya arganga soged: “An be-abesurye, an wargwen unniye.” Degi, nono geg malimarga sogmogad: “An be-abesurmarye, an wargwen unniye.”

²²Ar dule-sangi-akananaid-bur-nollo-daklemalad, amar bur-nue-abelemalad.

²³Anmar-sangi-akananaid bur-baisurdaklemalad, a bur anmar ega nue-mor yodamalad. Degi, anmar-abagan-daklebisur-abeleged, a anmar odukuar, ise ega mor-yoigu sedidamalad.

²⁴Ar anmar-san-odukuarsuli-baisur-dakleged, adi, ega mor-yosulir, akarsulid. Bab-Dummad ibiyobi anmar-san imaksa, bur baisur-dakleged, aka bur-nue akwega anmar-imaksad, ega nue-mor-yoe anmar-imaksad.

²⁵Adi, melle san-akananaid na muchub-muchub sogmalagar, an bur nue-abelegedye. Bela sanmar-akananaid na bulakwaa bendakmalagalad.

²⁶Degisoggu, san-akananaid-gwensak, ibmar nunmak-itogele, bela eba nunmaked itodamarmogad. Ar san-gwensakga nug-odummolenaile, bela eba weligwar itodamarmogad.

²⁷Ar emigindi bemar Cristo-sanga gumarsunnad, degi, war-wargwena eba akananaidga gumarmosunnad.

²⁸Bab-Dummad, Jesúsʼba-nanaimalad-danar-ambikunonidamalad-abargi gwenna-gwenna nug-imaksad: Gebegine, Bab-Jesús-e-sapingan-bur-dummaganga dule-nug-imaksad. A-sorba, Bab-Dummad-gayaburba-barsogmaladga dule-nug-imaksad. A-sorba, odurdaked-sailamarga dule-nug-imaksad. Geb, ibmar-dakledisulid-imakmaladga dule-nug-imaksad. Geb, dule-uellemalad-nudakmaladga dule-nug-imaksad. Dule-bendakmaladga dule-nug-imaksad. Dulemar-neg-akwemaladga dule-nug-imaksad. Dule-gaya-baid-baid-sunmakmaladga dule-nug-imaksad.

²⁹¿Ar bela Bab-Jesús-e-sapingan-bur-dummaganbi gumarsi? ¿Bela Bab-Dummad-gayaburba-barsogmaladbisi? ¿Bela odurdaked-sailamaladbisi? ¿Ar bela ibmar-dakledisurmalad-imakmaladbisi?

³⁰¿Ar bela dule-gegumair-nudakmaladbisi? ¿Bela gaya-baid-baid-sunmakmaladbisi? ¿Bela sunna gaya-baid-baid-odulomaladbisi? Suli, degisuli.

³¹Degisoggu, bur be gurgin-burbaled-nued amimarsun. Emigindi, andi bemarga igar-birigined-nued bur oyogoed.