ᤛᤣ᤺ᤰᤕᤢᤰᤔᤡᤒᤠᤜᤠ᤹ 19:21-41

²¹ᤁᤴ ᤐᤠ᤺ᤴᤜᤠ᤹ ᤐᤥ᤺ᤰᤂᤧ ᤆᤢᤖᤧᤀᤠᤱ ᤐᤠᤘᤗᤖᤧ ᤔᤧᤛᤣᤍᤥᤏᤡᤕᤠ ᤏᤢ ᤀᤰᤂᤤᤕᤠ ᤌᤢᤶ ᤐᤥ᤺ᤱᤔᤠᤖ ᤕᤖᤢᤛᤗᤧᤔ ᤐᤣ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ॥ ᤜᤧᤰᤁᤩᤠᤱ ᤂᤧᤸᤗᤧ ᤀᤰᤂᤣ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤂᤧᤵᤔᤥ ᤐᤣ᤺ᤰᤔᤠᤀᤠᤱ ᤖᤥᤔ ᤕᤧᤰᤕᤰᤁᤥᤀᤠᤱ ᤐᤣ᤺ᤰᤔᤠᤀᤣ ᤐᤥ᤺ᤱᤗᤥ॥”

²²ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤓᤠ᤹ ᤁᤧᤒᤡᤒᤠ ᤏᤧᤵᤑᤢ ᤁᤢᤴᤈᤢᤶᤜᤠ᤹ ᤋᤡᤔᤥᤌᤡ ᤏᤢ ᤀᤡᤖᤠᤛ᤻ᤋᤛᤧᤴ ᤋᤃᤡ ᤔᤧᤛᤣᤍᤥᤏᤡᤕᤠᤀᤥ ᤐᤠᤱᤄᤢᤛᤡᤀᤠᤱ ᤂᤢᤏᤧ᤹ᤃ ᤀᤣᤛᤡᤕᤠ ᤋᤧᤱᤃᤵᤐᤥᤀᤣ ᤁᤢᤓᤠ ᤕᤧᤴ ᤕᤠ᤺ᤰᤋᤧᤖᤥ॥

²³ᤒᤠ ᤂᤧᤴ ᤕᤧᤶᤔᤥ ᤀᤣᤑᤡᤛᤛᤀᤥ ᤍᤠᤱᤒᤠᤸᤗᤧ ᤁᤢᤗᤠᤶᤔᤡᤸᤗᤧ ᤁᤢᤍᤰᤗᤧᤱᤅᤥ ᤕᤶᤒᤠ ᤜᤕᤱᤁᤡᤸᤗᤡᤱ ᤐᤥ᤺ᤰᤂᤧᤖᤥ॥

²⁴ᤍᤧᤔᤧᤋᤪᤡᤕᤛ ᤔᤧᤵᤔᤏᤠᤒᤠ ᤕᤢᤵᤐᤠ ᤆᤥᤒᤧᤃᤢᤎᤡᤰ ᤘᤕᤧ॥ ᤂᤧᤴ ᤀᤠᤷᤋᤣᤔᤡᤛ ᤛᤠᤶᤔᤠᤱᤅᤡᤸᤗᤧᤴ ᤆᤢᤈᤢᤰᤛᤠ ᤕᤢᤵᤐᤠ ᤔᤠᤱᤜᤡᤶ ᤁᤧᤈᤥ᤺ᤰᤐᤠ ᤘᤕᤧ ᤜᤧᤰᤁᤩᤠᤱ ᤂᤧᤴ ᤕᤠ᤺ᤶᤒᤰᤁᤥᤗᤠᤶ ᤕᤖᤡᤰ ᤏᤠᤘᤠᤀᤡᤳᤗᤠ ᤁᤧᤈᤥ᤺ᤰᤐᤠᤜᤠ᤹ᤖᤧ ᤜᤡᤶᤒᤪᤠᤶ ᤔᤧᤈᤥᤃᤢᤀᤠᤱ ᤔᤧᤘᤕᤧᤖᤥ॥

²⁵ᤜᤧᤰᤁᤩᤠᤱ ᤁᤴ ᤏᤠᤘᤠᤀᤡᤳᤗᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤏᤢ ᤘᤣ᤹ ᤜᤧᤰᤋᤱᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤁᤧᤖᤧᤰ ᤛᤢᤵᤛᤢᤛᤡᤀᤠᤱ ᤆᤢᤶᤗᤢᤱ ᤆᤥᤃᤢᤖ ᤀᤰᤂᤣ ᤔᤧᤳᤋᤢᤛᤡ. “ᤋᤣ᤺ᤱᤈᤢᤶᤛᤣ. ᤁᤴ ᤕᤠ᤺ᤶᤒᤰᤁᤥᤗᤠᤶ ᤀᤠᤏᤡ᤹ᤃ ᤛᤠ᤹ᤖᤡᤰᤁᤣ ᤕᤖᤡᤰ ᤕᤠᤱ ᤀᤠᤎᤃᤢᤶᤒᤠᤴ ᤂᤡᤏᤡ᤹ ᤁᤧᤏᤡ᤺ᤛᤢᤶᤔᤠᤱ ᤘᤠ᤹ᤖᤥ॥

²⁶ᤀᤠᤸᤗ ᤂᤡᤏᤡ᤹ ᤀᤠᤒᤠᤅᤣ ᤁᤧᤏᤡ᤺ᤛᤢᤶᤔᤠᤱ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹. ᤁᤴ ᤐᤠᤘᤗ ᤔᤧᤵᤔᤏᤠᤒᤠ ᤔᤏᤠ᤺ᤸᤗᤧ ᤀᤣᤑᤡᤛᤛᤀᤥᤖᤰ ᤔᤧ᤺ᤴ. ᤁᤖ ᤀᤣᤛᤡᤕᤠ ᤂᤠᤖᤠᤰᤐᤠ ᤋᤧᤱᤃᤵᤐᤥ ᤕᤖᤡᤰ ᤔᤏᤠᤜᤠ᤹. ᤀᤠᤏᤡ᤹ ᤔᤏᤠᤜᤠ᤹ᤖᤧ ᤜᤢᤰᤁᤡᤸᤗᤧ ᤆᤥ᤺ᤰᤔᤏᤠᤛᤡᤒᤠ ᤏᤠᤘᤠᤀᤡᤳᤗᤠᤜᤠ᤹ ᤔᤠᤱᤛᤡ ᤔᤧ᤺ᤴᤗᤥ ᤑᤠ᤹ᤀᤠᤱ ᤗᤧᤔᤢᤛᤡᤖ ᤘᤠ᤹ᤖᤥ॥

²⁷ᤜᤧᤰᤁᤣ᤺ᤸᤗᤧ ᤁᤸᤗᤧᤃ ᤀᤠᤏᤡ᤹ ᤕᤠ᤺ᤶᤒᤰᤁᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤏᤠᤜᤠ᤹ᤖᤧ ᤑᤧᤴ ᤐᤠ᤺ᤴ ᤔᤧᤒᤠ᤺ᤳᤋᤢᤒᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤀᤣᤛᤡᤕᤠᤛ᤻ᤔᤠ ᤋᤧᤱᤃᤵᤐᤥ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤛᤣᤘᤠ ᤔᤧᤈᤥᤃᤢᤒᤠ ᤀᤠᤷᤋᤣᤔᤡᤛ ᤛᤠᤶᤔᤠᤱᤅᤡᤴ ᤏᤢ ᤁᤢᤔᤠᤱᤜᤡᤶᤔᤡᤸᤗᤧ ᤁᤢᤈᤠ᤺ᤳᤌᤡ ᤁᤧᤒᤣ᤺ᤰᤐᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥”

²⁸ᤀᤠᤸᤗ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤂᤧᤱᤜᤠ᤹ ᤁᤧᤖᤧᤰᤗᤧ ᤂᤢᤏᤡ᤹ ᤛᤡᤰ ᤐᤥᤃᤧᤀᤠᤱ ᤀᤰᤂᤣᤗ᤹ᤖᤡᤰ ᤀ᤺ᤰᤔᤠ ᤔᤧᤜᤣ᤺ᤰᤋᤧ. “ᤀᤣᤑᤡᤛᤛ᤻ᤔᤠ ᤀᤠᤷᤋᤣᤔᤡᤛ ᤛᤠᤶᤔᤠᤱᤅᤡᤴᤏᤣ ᤛᤠ᤹ᤖᤡᤰ ᤐᤕᤶ ᤕᤶᤒᤠ ᤛᤠᤶᤔᤠᤱᤗᤥ᥄”

²⁹ᤜᤧᤰᤁᤣ᤺ᤸᤗᤧ ᤛᤵᤑᤠᤖᤧᤛᤠ ᤁᤠᤰ ᤕᤧᤰᤕᤰᤁᤥ ᤜᤕᤱᤁᤡᤸᤗᤡᤱ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤔᤏᤠᤜᤠ᤹ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤐᤠᤘᤗᤧᤴᤏᤢ ᤔᤧᤛᤣᤍᤥᤏᤡᤕᤠᤗᤠᤶ ᤗᤠᤶᤍᤡ᤺ᤰ ᤁᤧᤈᤥ᤺ᤰᤐᤠ ᤁᤢᤴᤈᤢᤶᤜᤠ᤹ ᤃᤠᤕᤛ ᤏᤢ ᤀᤖᤡᤛ᤻ᤋᤠᤷᤂᤛᤛᤡ ᤔᤧᤍᤧᤶᤛᤢᤛᤡᤀᤠᤱ ᤐᤱᤘᤠᤀᤡᤳᤗᤠᤍᤧᤴᤏᤥ ᤔᤧᤍᤠᤖᤢᤛᤡᤖᤥ॥

³⁰ᤐᤠᤘᤗᤖᤧᤀᤠᤱ ᤂᤧᤵᤔᤥ ᤐᤣ᤺ᤰᤔᤠᤀᤠᤱ ᤐᤠ᤺ᤵᤔᤠ ᤏᤡᤱᤘᤠ᤹ ᤆᤥᤃᤢ. ᤁᤖ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤧ᤹ ᤂᤧᤵᤔᤥ ᤐᤣ᤺ᤰᤔᤠ ᤔᤧᤶᤒᤠᤱᤄᤢᤴᤗᤥ॥

³¹ᤐᤠᤘᤗᤖᤧ ᤁᤢᤓᤠ ᤁᤢᤴᤈᤢᤶ ᤋᤧᤱᤃᤐᤩᤢᤰᤐᤠᤜᤠ᤹ᤖᤧᤀᤠᤱ ᤂᤢᤏᤧ᤹ ᤐᤱᤘᤠᤀᤡᤳᤗᤠᤍᤧᤴᤏᤥ ᤀᤥᤛᤣ᤺ᤴᤔᤧᤎᤠᤰᤛᤡᤱᤅᤡᤴᤏᤡ ᤑᤠ᤹ᤀᤠᤱ ᤀᤡᤱᤄᤱ ᤔᤧᤜᤠᤅᤢᤖᤥ॥

³²ᤜᤧᤰᤁᤩᤠᤱ ᤆᤢᤶᤗᤢᤱᤒᤠ ᤔᤏᤠᤜᤠ᤹ᤖᤧ ᤜᤕᤱᤁᤡᤸᤗᤡᤱ ᤔᤧᤈᤥᤃᤢᤖ ᤁᤢᤓᤠ ᤌᤡᤰ ᤐᤠ᤺ᤴᤏᤥ ᤔᤧᤀ᤺ᤰᤋᤧ. ᤘᤣ᤹ᤜᤠ᤹ ᤘᤣ᤹ ᤐᤠ᤺ᤴᤏᤥ ᤔᤧᤀ᤺ᤰᤋᤧ. ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤢᤏᤡ᤹ ᤐᤠ᤺ᤴ ᤔᤧᤍᤅᤧᤴᤏᤠᤱ ᤌᤣᤀᤠᤱ ᤔᤏᤠᤜᤠ᤹ ᤂᤧᤵᤔᤥ ᤔᤧᤈᤢᤵᤛᤧᤒᤠ ᤕᤖᤡᤰᤗᤧ ᤌᤣᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥

³³ᤁᤢᤓᤠ ᤕᤜᤢᤍᤡᤜᤠ᤹ᤖᤧ ᤀᤗᤧᤰᤈᤧᤴᤍᤖ ᤔᤧᤵᤔᤏᤠᤒᤠ ᤔᤏᤠ᤺ᤴ ᤁᤴ ᤜᤕᤱᤁᤡᤸᤗᤡᤱᤅᤡᤴ ᤌᤣᤀᤠᤱ ᤐᤥ᤺ᤰᤂᤧᤒᤠ ᤑᤠ᤹ᤀᤠᤱ ᤆᤧᤱᤛᤧ ᤂᤢᤏᤧ᤹ ᤋᤃᤡ ᤔᤧᤈᤴᤍᤢ॥ ᤜᤧᤰᤁᤩᤠᤱ ᤀᤗᤣᤰᤈᤣᤴᤍᤖᤗᤧ ᤌᤡᤰ ᤏᤧᤳᤇᤡ ᤏᤠᤱᤛᤡᤱᤔᤠ ᤐᤠ᤺ᤴᤜᤠ᤹ ᤐᤠ᤺ᤵᤔᤠ ᤑᤠ᤹ᤀᤠᤱ ᤜᤢᤰᤑᤥ᤺ᤰᤂᤢᤖ ᤔᤏᤠᤜᤠ᤹ ᤛᤫᤠ᤺ᤳ ᤆᤥ᤺ᤰᤔᤠᤛᤡ ᤏᤡᤱᤘᤠ᤹ ᤆᤥᤃᤢᤖᤥ॥

³⁴ᤁᤖ ᤂᤢᤏᤧ᤹ ᤕᤜᤢᤍᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤄᤥ᤺ᤛᤢᤀᤠᤱ ᤔᤏᤠᤜᤠ᤹ ᤛᤠ᤹ᤖᤡᤰ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤂᤵᤔᤧ ᤁᤢᤔᤢᤰ ᤏᤧᤳᤇᤡ ᤌᤠᤖᤡᤰ ᤀᤰᤂᤣ ᤗ᤹ᤖᤡᤰ ᤔᤧᤀ᤺ᤰᤋᤧ. “ᤀᤣᤑᤡᤛᤛ᤻ᤔᤠ ᤀᤠᤷᤋᤣᤔᤡᤛ ᤛᤠᤶᤔᤠᤱᤅᤡᤴᤏᤣ ᤛᤠ᤹ᤖᤡᤰ ᤐᤕᤶ ᤕᤶᤒᤠ ᤛᤠᤶᤔᤠᤱᤗᤥ᥄”

³⁵ᤜᤧᤰᤁᤩᤠᤱ ᤁᤢᤏᤢᤵᤔᤥ ᤕᤧᤰᤕᤰ ᤛᤢᤜᤠᤱᤃᤧᤶᤒᤠᤸᤗᤧ ᤁᤠᤰ ᤔᤏᤠᤜᤠ᤹ ᤛᤫᤠ᤺ᤳ ᤆᤥᤃᤢᤛᤡᤀᤠᤱ ᤔᤧᤳᤋᤢᤛᤡ. “ᤋᤣ᤺ᤱᤈᤢᤶᤛᤣ. ᤁᤴ ᤀᤣᤑᤡᤛᤛ᤻ᤔᤠ ᤋᤧᤱᤃᤵᤐᤡᤱᤃ ᤐᤕᤶ ᤀᤠᤷᤋᤣᤔᤡᤛ ᤔᤠᤱᤅᤡᤸᤗᤧ ᤁᤢᤔᤠᤱᤜᤡᤶ ᤏᤢ ᤋᤠᤱᤛᤠᤰᤐᤥᤗᤠᤶ ᤔᤰᤁᤧᤎᤠ᤺ᤒᤠ ᤁᤢᤏᤠᤘᤠᤀᤡᤳᤗᤠ ᤁᤧᤃᤵᤐᤠ ᤑᤠ᤹ᤀᤠᤱ ᤁᤠᤰ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥ᤺ᤛᤢᤀᤠᤱ ᤔᤧᤘᤠ᤹ᤖᤥ॥

³⁶ᤀᤠᤳᤋᤡᤸᤗᤧᤀᤠᤱ ᤁᤴ ᤐᤠ᤺ᤴᤏᤡᤴ ᤀᤵᤔᤠ ᤔᤧᤛᤢᤰᤋᤢᤴᤗᤥ. ᤌᤣᤀᤠᤱᤓᤧᤸᤗᤧ ᤁᤠᤰᤗᤧ ᤁᤴ ᤐᤠ᤺ᤴᤏᤡᤴ ᤛᤧᤰᤂᤠᤀᤣᤖᤥ ᤑᤠ᤹ᤀᤠᤱ ᤔᤧᤏᤡ᤺ᤛᤢᤀᤠᤱ ᤔᤧᤘᤠ᤹ᤖᤥ॥ ᤜᤧᤰᤁᤣ᤺ᤸᤗᤧ ᤀᤠᤸᤗᤥ ᤂᤡᤏᤡ᤹ᤃ ᤔᤧᤴᤀᤡ᤺ᤳᤋᤣ ᤌᤣᤀᤠᤱ ᤀᤡᤏᤥᤃᤧᤴ ᤋᤢᤰᤂᤣ ᤁᤧᤍᤠ᤺ᤒᤠ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥

³⁷ᤂᤡᤏᤡ᤹ ᤁᤴ ᤏᤧᤵᤑᤢ ᤔᤏᤠᤜᤠ᤹ ᤁᤧᤍᤠᤖᤢᤶᤛᤡᤶᤔᤠᤱ ᤘᤠ᤹ᤛᤡ. ᤁᤖ ᤁᤱᤜᤠ᤹ᤖᤧ ᤔᤠᤱᤜᤡᤶᤔᤥᤗᤠᤶ ᤌᤣᤀᤠᤱ ᤔᤧᤱᤄᤢ᤺ᤳᤋᤣ ᤘᤠ᤹ᤛᤡ. ᤜᤧᤰᤁᤩᤠᤱ ᤀᤠᤏᤡ᤹ ᤀᤠᤷᤋᤣᤔᤡᤛ ᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤆᤧ᤹ᤕᤠ ᤐᤠ᤺ᤴᤏᤠᤱ ᤔᤧᤶᤒᤠ᤺ᤳᤋᤣ ᤘᤠ᤹ᤛᤡᤖᤥ॥

³⁸ᤍᤧᤔᤧᤋᤪᤡᤕᤛ ᤏᤢ ᤁᤢᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤢᤓᤠ ᤔᤏᤠᤜᤠ᤹ᤖᤧ ᤋᤰᤗᤧᤱᤘᤠᤀᤥ ᤀᤠᤵᤋᤡᤰ ᤘᤠ᤹ᤏᤧ ᤑᤠ᤹ᤃᤪ ᤂᤠᤛᤧᤴᤜᤡᤶ ᤏᤢ ᤛᤢᤜᤠᤱᤜᤡᤶ ᤘᤠ᤹. ᤜᤠᤖᤠ᤹ ᤂᤧᤵᤔᤥ ᤔᤧᤍᤠᤖᤢᤏᤡ॥

³⁹ᤁᤖ ᤂᤧᤴᤏᤠᤱᤎᤥ ᤘᤣ᤹ ᤐᤠ᤺ᤴ ᤁᤧᤃᤳᤋᤢᤶᤏᤧ ᤑᤠ᤹ᤃᤪ ᤆᤥ᤺ᤰᤌᤡᤶ ᤆᤢᤶᤗᤢᤱᤅᤥᤗᤠᤶ ᤐᤠ᤺ᤴ ᤁᤧᤔᤠ ᤐᤥ᤺ᤱᤗᤥ॥

⁴⁰ᤜᤧᤰᤁᤣ᤺ᤸᤗᤧ ᤀᤠᤀᤡᤴ ᤁᤧᤒᤥ᤺ᤱᤒᤠ ᤁᤴ ᤜᤕᤱᤁᤡᤸᤗᤡᤱᤖᤧᤴ ᤀᤠᤵᤋᤡᤰᤁᤡᤴ ᤖᤥᤔᤡ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤀᤠᤏᤡ᤹ ᤀᤠᤶᤃᤢ᤺ᤵᤐᤠ ᤐᤥ᤺ᤰᤂᤧᤖᤥ॥ ᤜᤧᤰᤁᤣ᤺ᤸᤗᤧ ᤁᤴ ᤌᤣ ᤐᤥ᤺ᤰᤂᤧᤒᤠ ᤑᤠ᤹ᤀᤠᤱ ᤌᤣᤀᤠᤱ ᤐᤠ᤺ᤵᤔᤠ ᤀᤠᤴᤇᤢᤰᤋᤢᤶᤔᤡᤴᤗᤥ॥”

⁴¹ᤕᤧᤰᤕᤰ ᤛᤢᤜᤠᤱᤔᤡᤒᤠᤸᤗᤧ ᤜᤧᤰᤁᤣ ᤔᤧᤳᤋᤢᤛᤡᤀᤠᤱ ᤁᤧᤍᤠ᤺ᤒᤠ ᤔᤏᤠᤜᤠ᤹ ᤐᤠᤱᤄᤢᤍᤣ᤺ᤛᤢᤛᤡᤖᤥ॥