ᤛᤣ᤺ᤰᤕᤢᤰᤔᤡᤒᤠᤜᤠ᤹ 15:8-28

⁸ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤴᤇᤠᤶ ᤕᤠᤵᤔᤡᤖᤧᤴ ᤛᤡᤰᤗᤢᤱᤔᤠᤴ ᤏᤡ᤺ᤛᤢᤖᤥ॥ ᤂᤢᤏᤧ᤹ᤃ ᤀᤠᤏᤡ᤹ ᤜᤧᤰᤁᤣᤀᤣ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤠᤱ ᤛᤣᤛᤣᤔᤠᤱ ᤐᤡᤖᤢᤛᤡᤖ ᤋᤠ᤺ᤰᤋᤢᤛᤡᤀᤠᤱ ᤘᤠ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤠᤏᤡ᤹ ᤀᤥᤛᤣ᤺ᤴᤀᤠᤎᤠᤰᤋᤧᤖᤥ॥

⁹ᤀᤠᤸᤗ ᤂᤢᤏᤧ᤹ ᤌᤡᤶᤔᤧᤴᤍᤱ ᤛᤢᤘᤠᤱ ᤏᤢ ᤀᤠᤏᤡ᤹ ᤀᤠᤴᤇᤧᤴᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤜᤧᤰᤁᤣ ᤍᤠᤱᤒᤠᤀᤥᤒᤠ ᤏᤛᤠ᤺ᤴᤗᤠᤶ ᤂᤢᤏᤡ᤹ ᤛᤡᤰᤗᤢᤱᤔᤠᤴ ᤛᤣᤛᤣ ᤆᤥᤃᤢ ᤐᤡᤖᤢᤛᤡᤀᤠᤱ ᤘᤠ᤹ᤖᤥ॥

¹⁰ᤜᤧᤰᤁᤣ᤺ᤸᤗᤧ ᤌᤣᤀᤠᤱᤏᤧ ᤁᤧᤛᤠᤰᤐᤠ ᤕᤜᤢᤍᤡ ᤛᤠᤰᤌᤡᤶᤔᤡᤴ ᤌᤡᤶᤔᤧᤴᤍᤱ ᤏᤛᤠᤏᤡᤒᤠᤜᤠ᤹ ᤁᤧᤃᤢ᤺ᤳᤋᤢᤶᤛᤡᤶᤔᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤰ ᤑᤥ᤺ᤱᤔᤠ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤒᤠᤒᤣ᥅ ᤂᤧᤱᤃ ᤀᤠᤏᤡ᤹ ᤐᤠᤎᤧᤒᤠᤜᤠ᤹ᤖᤧᤀᤠᤱ ᤁᤢ᤺ᤔᤠ ᤔᤧᤴᤇᤢᤰᤋᤢᤴ. ᤜᤧᤰᤁᤩᤠᤱ ᤀᤠᤏᤡ᤹ᤀᤠᤱ ᤁᤢ᤺ᤔᤠ ᤀᤠᤴᤇᤢᤰᤋᤢᤶᤔᤡᤴᤗᤥ॥

¹¹ᤛᤧᤰᤂᤠ᤺ᤸᤗᤧᤃ. ᤂᤧᤱᤜᤠ᤹ ᤜᤧᤰᤁᤣᤀᤣ ᤀᤠᤏᤡ᤹ᤀᤠᤱ ᤍᤠᤱᤒᤠᤸᤗᤧ ᤁᤢᤗᤢᤱᤃᤢᤶᤔᤡᤸᤗᤧᤖᤰ ᤋᤠᤱᤀᤠᤛᤣ᤺ᤵᤋᤧ ᤁᤧᤗ᤹ᤒᤠᤴ ᤏᤛᤠ᤺ᤴ ᤀᤠᤈᤥᤃᤢᤶᤗᤥ॥”

¹²ᤒᤖᤏᤠᤒᤠᤛ ᤏᤢ ᤐᤠᤘᤗᤖᤧ ᤂᤢᤴᤇᤡ᤹ᤗᤠᤶ ᤌᤡᤶᤔᤧᤴᤍᤱ ᤛᤢᤘᤠᤱᤗᤢᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤔᤡᤰᤛᤣ᤺ᤴ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤧᤰᤂᤧᤇᤢᤸᤗᤧ ᤕᤧᤈᤢᤶᤓᤥᤒᤠ ᤁᤠᤰ ᤔᤏᤠᤜᤠ᤹ ᤛᤫᤠ᤺ᤳᤋᤠᤱ ᤔᤧᤄᤧᤵᤛᤢᤖ ᤔᤧᤕᤢᤅᤧᤖᤥ॥

¹³ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤐᤠ᤺ᤵᤔᤠ ᤛᤢᤖᤧᤳᤇᤢᤀᤠᤱ ᤕᤠᤁᤢᤒᤧᤴ ᤕᤧᤶᤛᤡᤱᤅᤠᤱ ᤐᤠ᤺ᤳᤋᤢ. “ᤑᤢ᤹ᤏᤢᤛᤠ᤹ᤛᤣ. ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ॥

¹⁴ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰᤏᤢ ᤋᤃᤡ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤀᤰᤂᤣᤗ᤹ᤖᤡᤰ ᤀᤠᤒᤠᤅᤣ ᤁᤢᤔᤏᤠ ᤔᤧᤒᤥ᤺ᤱᤗ ᤑᤠ᤹ᤀᤠᤱ ᤀᤢ᤺ᤳᤋᤢᤛᤡ ᤁᤧᤗ᤹ᤒᤠᤴ ᤛᤡᤔᤥᤏ ᤐᤋᤪᤢᤛᤖᤧ ᤆᤧᤰᤂᤢᤖᤥ॥

¹⁵ᤁᤱᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤏᤢ ᤂᤢᤏᤡ᤹ ᤐᤠ᤺ᤴᤏᤡᤴ ᤛᤠ᤹ᤖᤡᤰᤁᤣ ᤋᤱᤗᤥ॥ ᤛᤠᤶᤕᤥᤛᤠᤵᤗᤠᤖᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤐᤳ.

¹⁶‘ᤁᤴ ᤀᤣᤃᤠᤱ ᤀᤡᤱᤃᤠ᤹ ᤏᤢ᤺ᤱᤅᤠᤖᤥ. ᤜᤧᤰᤁᤩᤠᤱ ᤏᤢᤒᤧᤒᤠ ᤍᤠᤀᤢᤍᤖᤧ ᤁᤢᤜᤠᤱᤈᤢᤶᤔᤡᤴ ᤀᤡᤱᤃᤠ᤹ ᤕᤠᤶᤔᤥ ᤆᤥᤃᤢᤱᤗᤥ॥ ᤀᤡᤱᤃᤠ᤹ ᤁᤧᤕ᤺ᤒᤠ ᤗᤢᤱᤎᤠᤰᤜᤠ᤹ ᤛᤧᤳᤋᤢᤱᤗᤥ॥ ᤕᤠᤶᤔᤥ ᤆᤥᤃᤢᤱᤅᤠᤱ ᤕᤧᤵᤛᤢᤱᤗᤥ॥

¹⁷ᤜᤧᤰᤁᤣᤗ᤹ᤖᤡᤰ ᤘᤣ᤹ ᤔᤏᤠᤜᤠ᤹ᤖᤧᤀᤠᤱ ᤀᤡᤱᤃᤠ᤹ ᤍᤠᤱᤒᤠᤴ ᤁᤥ᤺ᤵᤔᤠ ᤔᤧᤛᤢᤰᤁᤠᤖ॥ ᤀᤠᤔᤡᤱ ᤁᤧᤍᤠ᤺ᤰᤐᤠ ᤁᤠᤰ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤀᤡᤱᤃᤠ᤹ ᤀᤠᤒᤠᤅᤣ ᤀᤠᤛᤢᤘᤠᤱ ᤑᤠ᤹ᤀᤠᤱ ᤀᤢ᤺ᤳᤋᤢᤱᤛᤡᤱᤗᤥ॥ ᤁᤴ ᤐᤠ᤺ᤴᤜᤠ᤹ ᤁᤧᤈᤥ᤺ᤰᤐᤠ ᤀᤡᤱᤃᤠ᤹ ᤍᤠᤱᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤕᤖᤡᤰ ᤋᤱᤒᤣ ᤋᤃᤡᤀᤣ ᤐᤠ᤺ᤳᤋᤧ ᤆᤢᤖᤧᤀᤠᤱ ᤘᤠ᤹ᤖᤥ॥’”

¹⁹ᤕᤠᤁᤢᤒᤖᤧ ᤕᤠᤶᤔᤥ ᤀᤰᤂᤣ ᤐᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤥ ᤁᤧᤏᤢ᤺ᤱᤒᤠᤀᤠᤱ ᤁᤧᤍᤠ᤺ᤒᤠ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤋᤢᤰᤂᤣ ᤆᤠ᤺ᤵᤔᤠᤛᤡ ᤔᤧ᤺ᤴᤗᤥ ᤁᤧᤗ᤹ᤒᤠ ᤀᤠᤏᤡᤱᤘᤠ᤹ ᤘᤠ᤹ᤖᤥ॥

²⁰ᤁᤖ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤀᤰᤋᤱᤒᤠ ᤛᤰᤀᤡᤱᤄᤱ ᤜᤠᤰᤋᤢᤶᤛᤡᤶᤗᤥ. ‘ᤏᤠᤘᤠᤀᤡᤳᤗᤠᤀᤥ ᤋᤥ᤺ᤶᤏᤠᤒᤠ ᤆᤠᤜᤠ᤹ ᤆᤠᤔᤠ ᤔᤧᤏᤢ᤹ᤏᤧᤴ॥ ᤜᤧᤰᤁᤩᤠᤱ ᤆᤠᤖᤠᤶᤔᤠ ᤔᤧᤏᤢ᤹ᤏᤧᤴ॥ ᤁᤢᤛᤡᤳᤗᤠ ᤕ᤹ᤔᤏᤠ ᤛᤧᤵᤔᤏᤠᤒᤠ ᤛᤠ᤺ ᤏᤢ ᤛᤠᤔᤠᤰᤂᤡ᤹ᤀᤠᤱ ᤆᤠᤔᤠ ᤔᤧᤏᤢ᤹ᤏᤧᤴᤗᤥ॥’

²¹ᤌᤣᤀᤠᤱᤓᤧᤸᤗᤧ ᤒᤠ ᤁᤴ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶᤔᤡᤴ ᤁᤠᤰ ᤐᤠᤱᤈᤢᤶᤔᤥ ᤀᤢᤴᤇᤥ᤺ᤴ ᤀᤢᤴᤇᤥ᤺ᤴᤏᤠᤱᤎᤥᤀᤣ ᤀᤡᤱᤓᤥ᤺ᤛᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤌᤡᤰᤕᤠ᤺ᤴᤎᤰ ᤏᤠ᤺ᤶᤛᤡᤱ ᤕᤧᤴ ᤌᤵᤔᤣ ᤏᤡ᤺ᤳᤗ ᤘᤠ᤹ᤖᤥ॥”

²²ᤜᤧᤰᤁᤣ᤺ᤸᤗᤧ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤏᤢ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤜᤧᤰᤁᤩᤠᤱ ᤁᤠᤰ ᤛᤣᤛᤣᤜᤢᤵᤗᤰᤁᤥᤒᤠᤜᤠ᤹ ᤔᤧᤍᤅᤧᤀᤠᤱ ᤏᤧᤵᤑᤢ ᤔᤏᤠᤜᤠ᤹ ᤕᤜᤢᤍᤠ ᤔᤧᤵᤔᤏᤠᤒᤠ ᤒᤖᤛᤠᤒᤠᤛ ᤏᤢ ᤛᤡᤗᤠᤛᤧᤴ ᤛᤣ᤺ᤰᤔᤠᤛᤡᤀᤠᤱ ᤐᤠᤘᤗ ᤜᤧᤰᤁᤩᤠᤱ ᤒᤖᤏᤠᤒᤠᤛᤧᤴᤏᤢ ᤀᤣᤴᤋᤡᤀᤥᤰᤁᤥ ᤐᤠᤱᤔᤠᤛᤡ ᤏᤡ᤺ᤴᤎᤥ ᤐᤥ᤺ᤰᤂᤧᤖᤥ॥ ᤂᤧᤱᤜᤠ᤹ᤃ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤗᤢᤶᤔᤥ ᤛᤠ᤹ᤖᤡᤰᤁᤣ ᤔᤡᤱᤛᤥᤍᤠᤱᤒᤠ ᤆᤥᤃᤧᤳᤇᤡᤖᤥ॥

²³ᤂᤧᤱᤜᤠ᤹ᤖᤧ ᤀᤰᤋᤱᤒᤠ ᤛᤰᤀᤡᤱᤄᤱᤅᤡᤴ ᤂᤧᤴ ᤗᤡᤛᤡ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥᤏᤢ ᤔᤧᤜᤠᤰᤋᤢᤛᤡ. “ᤀᤠᤏᤡᤃᤧ ᤕᤖᤢᤛᤗᤧᤶᤒᤠ ᤂᤡᤏᤡ᤹ ᤑᤢ᤹ᤏᤢᤛᤠ᤹ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤏᤢ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤗᤠᤶ. ᤀᤣᤴᤋᤡᤀᤥᤁ. ᤛᤡᤖᤡᤕᤠ. ᤏᤢ ᤛᤡᤗᤡᤛᤡᤕᤠᤀᤥ ᤁᤧᤘᤠ᤹ᤒᤠ ᤌᤡᤶᤔᤧᤴᤍᤱ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤀᤥ. ᤁᤴ ᤛᤰᤀᤡᤱᤄᤱᤗᤠᤶ ᤛᤣᤘᤠ ᤜᤠᤅᤢᤶᤒᤧ᤹ᤖᤥ॥

²⁴ᤀᤠᤏᤡᤃᤧ ᤔᤧᤶᤒᤠᤱᤅᤣ ᤁᤢᤓᤠ ᤔᤏᤠᤜᤠ᤹ ᤂᤡᤏᤡ᤹ᤀᤥ ᤔᤧᤍᤩᤧᤀᤠᤱ ᤂᤧᤱᤜᤠ᤹ᤖᤧ ᤁᤠᤰ ᤕᤜᤢᤍᤡ ᤛᤠᤶᤕᤥᤌᤡᤶ ᤀᤡ᤺ᤵᤔᤠ ᤏᤠ᤺ᤵᤔᤠ ᤐᤥ᤺ᤱ ᤁᤧᤶᤔᤧᤳᤋᤡᤀᤠᤱ ᤗᤠᤶ ᤁᤧᤶᤓᤥ᤺ᤳᤋᤡᤖ ᤂᤡᤏᤡ᤹ ᤗᤢᤱᤔᤠ᤹ ᤁᤧᤶᤛᤥ᤺ᤴᤍᤡ ᤁᤧᤶᤒᤡᤖᤡᤒᤠ ᤐᤠ᤺ᤴᤏᤡᤴ ᤀᤠᤏᤡᤃᤧ ᤂᤧᤵᤛᤢᤶᤒᤧᤖᤥ॥

²⁵ᤜᤧᤰᤁᤩᤠᤱ ᤀᤠᤏᤡᤃᤧ ᤔᤡ᤺ᤶ ᤆᤢᤶ ᤒᤖᤏᤠᤒᤠᤛ ᤜᤧᤰᤁᤩᤠᤱ ᤐᤠᤘᤗᤧᤴᤏᤢ ᤂᤡᤏᤡ᤹ᤀᤥ ᤐᤠᤱᤔᤠᤛᤡ ᤑᤠ᤹ᤀᤠᤱ ᤁᤢᤓᤠ ᤔᤏᤠᤜᤠ᤹ ᤛᤣ᤺ᤰᤔᤠᤛᤡ ᤁᤧᤗ᤹ᤒᤠ ᤀᤡᤱᤋᤱᤔᤏᤠᤖᤥ॥

²⁶ᤂᤧᤱᤜᤠ᤹ᤖᤧᤃ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤛᤣᤘᤠ ᤆᤥ᤺ᤰᤔᤥ ᤂᤢᤏᤡ᤹ ᤜᤡᤱᤔᤴᤏᤡᤴ ᤔᤧᤴᤍᤠᤱᤄᤢᤴᤗᤥ॥

²⁷ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡᤃᤧ ᤛᤠᤵᤋᤢᤶᤒᤧᤒᤠ ᤛᤰᤀᤡᤱᤄᤱᤅᤥ ᤁᤴ ᤐᤠ᤺ᤴᤜᤠ᤹ᤀᤣ ᤆᤧᤱᤔᤠ ᤑᤠ᤹ᤀᤠᤱ ᤕᤜᤢᤍᤠ ᤏᤢ ᤛᤡᤗᤠᤛᤛᤡ ᤂᤡᤏᤡ᤹ᤀᤥ ᤐᤠᤱᤄᤢᤶᤛᤡᤶᤒᤧᤖ ᤐᤳᤇᤡᤃᤧᤖᤥ॥

²⁸ᤛᤣᤛᤣᤔᤠᤱ ᤏᤢ ᤀᤠᤏᤡᤃᤧᤃ ᤂᤡᤏᤡ᤹ ᤛᤶᤍᤠᤱ ᤁᤵᤔᤥ ᤁᤧᤒᤵᤐᤠ ᤐᤠ᤺ᤴᤜᤠ᤹ᤏᤢ᤺ᤸᤗᤧ ᤘᤣ᤹ ᤁᤧᤛᤠᤰᤐᤠ ᤐᤠ᤺ᤴᤜᤠ᤹ ᤌᤧᤔᤠᤀᤠᤱ ᤔᤧᤱᤃᤢ᤺ᤵᤔᤠᤏᤡᤱ ᤏᤡᤱᤘᤠ᤹ ᤆᤥᤃᤢᤶᤒᤧᤖᤥ॥