ᤕᤢᤜᤢᤴᤏᤠ 4:9-14

⁹ᤂᤧᤴ ᤛᤠᤔᤖᤡ ᤔᤧᤴᤇᤢᤔᤠ᤹ᤀᤡᤸᤗᤧ ᤕᤧᤛᤢ᤺ᤴ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤕᤜᤢᤍᤡᤏᤧ. ᤀᤡᤱᤃᤠ᤹ᤃ ᤛᤠᤔᤖᤡ ᤔᤧᤴᤇᤢᤔᤠ᤹ᤀᤠ. ᤜᤧᤰᤁᤣ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤆᤫᤠ᤺ᤳ ᤌᤢᤱᤔᤠ ᤀᤡᤱᤃᤠ᤹ ᤁᤧᤏᤠ᤺ᤰᤁᤠᤒᤠᤒᤣ᥅” (ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤶᤔᤥ ᤕᤜᤢᤍᤡᤜᤠ᤹ ᤏᤢ ᤛᤠᤔᤖᤡᤗᤢᤶᤔᤥ ᤋᤱᤈᤢᤶ ᤜᤥ᤺ᤵᤋᤧᤖᤥ)॥

¹⁰ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢ᤹ᤀᤡᤛᤠᤶᤔᤡᤴ ᤏᤢ ᤂᤧᤏᤧ᤹ ᤆᤫᤠ᤺ᤳ ᤁᤧᤏᤠ᤺ᤰᤐᤧᤴ ᤜᤠ᤺ᤵᤐᤣ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤀᤠᤱ ᤁᤧᤘᤕᤧᤸᤗᤧᤃ ᤏᤧᤳᤋᤡᤃᤧᤴ ᤜᤡᤱᤔᤴ ᤁᤧᤒᤡᤒᤠ ᤆᤫᤠ᤺ᤳᤋᤡᤴ ᤕᤠᤱᤏᤠ ᤁᤧᤏᤠ᤺ᤰᤋᤢᤀᤠᤱ ᤂᤧᤴ ᤜᤡᤱᤔᤴᤗᤧᤴ ᤆᤫᤠ᤺ᤳᤋᤡᤴ ᤁᤧᤒᤡᤖᤧᤒᤠᤔᤧᤴ॥”

¹¹ᤜᤧᤰᤁᤣ᤺ᤸᤗᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤛᤣ᤺ᤴᤍᤥᤛᤢ. “ᤀᤠᤍᤠᤱᤒᤣ. ᤂᤧᤏᤧ᤹ᤃ ᤆᤫᤠ᤺ᤳ ᤐᤠ᤺ᤰᤔᤧᤴ ᤏᤢ ᤀᤡᤍᤠ᤺ᤰᤁᤡᤴᤏᤠᤱ ᤁᤧᤱᤃᤳᤋᤢᤴ. ᤘᤠᤒᤠᤰᤁᤡᤴᤏᤠᤱ ᤁᤣ᤺ᤶ. ᤜᤧᤰᤁᤣ᤺ᤸᤗᤧ ᤀᤠᤳᤋᤡᤏᤢ ᤁᤴ ᤏᤧᤳᤋᤡᤃᤧᤴ ᤜᤡᤱᤔᤴ ᤁᤧᤒᤡᤒᤠ ᤆᤫᤠ᤺ᤳᤋᤡᤴ ᤋᤠ᤺ᤵᤔᤠ ᤁᤧᤛᤢᤰᤋᤢᤒᤣ᥅

¹²ᤜᤧᤰᤁᤣ᤺ᤸᤗᤧ ᤂᤧᤏᤧ᤹ᤃ ᤀᤠᤏᤡᤃᤧ ᤋᤠᤰᤌᤧᤒᤠ ᤕᤠᤁᤢᤒᤧᤴᤏᤢ᤺ᤸᤗᤧᤀᤠᤱ ᤕᤶᤒᤠᤏᤧᤒᤡ᥅ ᤂᤢᤏᤧ᤹ᤀᤣ ᤁᤴ ᤘᤠᤒᤠᤰᤁᤡᤴ ᤀᤠᤏᤡᤃᤧ ᤐᤡᤖᤡᤃᤧᤀᤠᤱ ᤘᤠ᤹ᤖᤥ. ᤒᤠ ᤁᤵᤔᤥᤗᤠᤶᤒᤠᤀᤣ ᤂᤢᤏᤧ᤹ ᤏᤢ ᤁᤢᤛ᤻ᤛᤠ᤺ᤜᤠ᤹ᤖᤧ ᤜᤧᤰᤁᤩᤠᤱ ᤂᤢᤏᤡ᤹ ᤌᤰᤛᤠᤗᤢᤵᤜᤠ᤹ᤖᤧᤀᤠᤱ ᤆᤫᤠ᤺ᤳ ᤔᤧᤎᤢᤅᤢᤖᤥ॥”

¹³ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤁᤴ ᤘᤠᤒᤠᤰᤁᤥᤗᤠᤶ ᤆᤫᤠ᤺ᤳ ᤁᤧᤎᤢᤱᤒᤠᤜᤠ᤹ᤃ ᤕᤠᤶᤔᤥ ᤂᤢᤏᤡ᤹ ᤘᤠᤔᤡ᤺ᤰᤗᤥ.

¹⁴ᤁᤖ ᤀᤡᤱᤃᤠ᤹ ᤐᤡᤖᤢᤱᤒᤠ ᤆᤫᤠ᤺ᤳ ᤁᤧᤎᤢᤱᤒᤠᤴ ᤀᤠᤵᤑᤠᤸᤗᤧᤀᤠᤱ ᤁᤢᤘᤠᤔᤧᤔᤡ᤺ᤰᤏᤧᤴ॥ ᤀᤡᤱᤃᤠ᤹ ᤐᤡᤖᤢᤱᤒᤠ ᤆᤫᤠ᤺ᤳᤋᤡᤴ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤛᤍᤠᤍᤡᤱ ᤁᤧᤒᤢᤶᤒᤠ ᤘᤠᤒᤢᤴ ᤜᤧᤰᤁᤣ ᤂᤢᤏᤧ᤹ᤀᤥ ᤐᤥ᤺ᤱᤗᤥ॥”