ᤕᤢᤜᤢᤴᤏᤠ 21:17-20

¹⁷ᤜᤧᤰᤁᤩᤠᤱ ᤕᤠᤶᤔᤥ ᤕᤧᤛᤢᤖᤧ ᤛᤢᤶᤗᤧᤱᤅᤥ ᤐᤋᤪᤢᤛᤧᤴ ᤛᤣ᤺ᤴᤍᤥᤛᤢ. “ᤕᤢᤜᤢᤴᤏᤠᤖᤧ ᤁᤢᤛ᤻ᤛᤠ᤺ ᤛᤡᤔᤥᤏᤣ. ᤀᤡᤱᤃᤠ᤹ ᤔᤡ᤺ᤶᤈᤡ ᤁᤧᤔᤧᤳᤋᤠᤒᤡ᥅” ᤀᤰᤂᤣᤗ᤹ᤖᤡᤰ ᤕᤧᤛᤢᤖᤧ ᤛᤢᤶᤗᤧᤱ ᤌᤠᤖᤡᤰ “ᤀᤡᤱᤃᤠ᤹ ᤔᤡ᤺ᤶᤈᤡ ᤁᤧᤔᤧᤳᤋᤠᤒᤡ” ᤗ᤹ᤖᤡᤰ ᤛᤣ᤺ᤴᤍᤥᤛᤢᤒᤠᤀᤥ ᤐᤋᤪᤢᤛᤖᤧ ᤁᤢᤏᤡᤱᤘᤠ᤹ ᤋᤢᤃᤧᤖ ᤔᤧᤳᤋᤢ. “ᤀᤥᤖᤥ. ᤀᤠᤍᤠᤱᤒᤣ. ᤂᤧᤏᤧ᤹ᤃ ᤁᤠᤰ ᤐᤠ᤺ᤴᤜᤠ᤹ ᤁᤧᤏᤡ᤺ᤛᤢ᤹ᤖᤥ॥ ᤀᤡᤱᤃᤠ᤹ ᤛᤧᤰᤂᤠᤀᤣ ᤂᤧᤏᤧ᤹ ᤔᤡ᤺ᤶᤈᤡ ᤔᤧᤳᤏᤧᤒᤠᤴ ᤂᤧᤏᤧ᤹ ᤁᤧᤏᤡ᤺ᤛᤢ᤹ᤖᤥ॥” ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤀᤠᤔᤧᤸᤗᤢᤰᤜᤠ᤹ ᤆᤠᤗᤠᤶᤛᤧᤛᤧ᤹ᤀᤥ॥

¹⁸ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤧ᤹. ᤌᤠᤱᤒᤧᤴ ᤁᤧᤘᤕᤧᤸᤗᤧ ᤀᤠᤒᤠᤅᤣ ᤑ᤹ᤀᤡ ᤁᤧᤕᤢᤵᤛᤡᤱᤅᤠᤱ ᤀᤠᤳᤋᤠᤴ ᤐᤣ᤺ᤰᤔᤠ ᤏᤡᤱᤘᤠ᤹ ᤁᤧᤈᤥᤃᤢ ᤂᤧᤵᤔᤥᤀᤣ ᤁᤧᤒᤣᤖᤥ. ᤁᤖ ᤁᤠᤵᤐᤥᤒᤠ ᤁᤧᤍᤢᤶᤔᤠᤱᤃ ᤁᤧᤜᤢᤰᤜᤠ᤹ ᤁᤧᤛᤴᤇᤢ᤹. ᤜᤧᤰᤁᤩᤠᤱ ᤑ᤹ᤀᤡ ᤁᤧᤶᤕᤢᤵᤐᤠᤱ ᤀᤠᤳᤋᤠᤴ ᤐᤣ᤺ᤰᤔᤠ ᤁᤧᤛᤡᤖᤠ᤹ ᤔᤧᤎᤠᤱᤏᤧᤴ ᤂᤧᤵᤔᤥ ᤁᤧᤶᤍᤣ᤹ᤖᤥ॥”

¹⁹ᤕᤧᤛᤢᤖᤧ ᤀᤰᤂᤣ ᤔᤧᤳᤋᤢᤖ ᤐᤋᤪᤢᤛᤧᤴ ᤁᤧᤍᤠ᤺ᤒᤠ ᤕᤧᤶᤔᤥ ᤀᤠᤳᤋᤡᤴ ᤐᤖᤡᤰᤗᤧᤴ ᤛᤡ᤺ᤔᤧᤴᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤔᤡᤍᤡᤱ ᤆᤥᤃᤢ᤹ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤋᤢᤀᤠᤱ ᤘᤕᤧᤖᤥ॥ ᤜᤧᤰᤁᤩᤠᤱ ᤍᤠᤱᤒᤠᤸᤗᤧ ᤐᤋᤪᤢᤛᤧᤴ ᤔᤧᤳᤋᤢ. “ᤀᤡᤱᤃᤠ᤹ ᤋᤡ᤺ᤰᤋᤠᤱᤅᤧ᤹ᤀᤥ᥄”

²⁰ᤐᤋᤪᤢᤛᤧᤴ ᤜᤡᤸᤗᤡᤰ ᤜᤡᤛᤡᤱᤅᤡᤸᤗᤧ ᤕᤧᤛᤢᤖᤧ ᤗᤢᤱᤔᤠ᤹ ᤋᤢᤰᤋᤢᤒᤠ ᤁᤢᤜᤢ᤹ᤛᤠᤶᤒᤧᤸᤗᤧ ᤋᤡᤶᤍᤢᤒᤠ ᤏᤡ᤺ᤛᤢᤖᤥ॥ (ᤛᤠᤓᤠᤱᤈᤠ ᤔᤧᤈ᤺ᤸᤗᤧ ᤒᤠ ᤂᤧᤴ ᤜᤢ᤹ᤛᤠᤶᤒᤠᤸᤗᤧ ᤕᤧᤛᤢᤖᤧ ᤁᤢᤒᤣᤛᤠᤱ ᤏᤠ᤺ᤶᤛᤡᤱᤗ ᤕᤢᤅᤧᤸᤗᤧ ᤍᤠᤱᤒᤣ. ᤜᤠ᤺ᤳᤗᤧ ᤀᤡᤱᤃᤧᤗᤧᤰᤐᤣ ᤗ᤹ᤖᤡᤰ ᤛᤣ᤺ᤴᤍᤥᤛᤢᤀᤠᤱ ᤘᤕᤧᤖᤥ)