ዬሱሲ ኪቴዳዋንቱ ኦሱዋ 5:27-39

²⁷ኡንቱንቱ ዬሱሲ ኪቴዳዋንታ ኣሂዴ፥ ሄዋ ሺቄዳ ሻንጉዋ ሲንꬃን ኤሲና፥ ቄሳቱዋ ካፑ ኡንቱንታ፥

²⁸«ሂንቴንታ ኑኒ ሄ ቢታኒያ ሱንꬃን ታማሪሴና ማላ ሚኒሲዴ ኣዛዚቤይኮ? ቤዒቴ፤ ሂንቴ ቲሚርቲያ ዬሩሳላሜ ካታማ ኡባ ጋꬄዲታ፤ ቃሲ ሄ ቢታኒያ ሼምፑዋን ኑና ኦይꬃናው ቆፒታ!» ያጊዴ ኦቼዳ።

²⁹ጴፂሮሲኔ ዬሱሲ ኪቴዳ ሃራንቱ ዛሪዴ ያጌዲኖ፤ «ኑኒ ኣሳው ኣዛዜታናፔ ፆሳው ኣዛዜታናው ቤሴ።

³⁰ማስቃሊያ ቦላ ሚሲማሪያን ꬊሺ ካቂዴ፥ ሂንቴ ዎꬌዳ ዬሱሳ ኑ ኣዋቱዋ ፆሳይ ሃይቁዋፔ ዴንꬄዳ፤

³¹ኢስራዔላቱዋሲ ናጋራፔ ሲማኔ ናጋራ ኣቶ ጉሳ ዬሱሲ ኢማና ማላ፥ ፆሳይ ሞዲያዋኔ ኣሺያዋ ኣ ኦꬂዴ፥ ባሬፔ ኡሼቻ ባጋን ꬎቁ ꬎቁ ኦꬄዳ።

³²ሄዋሲ ኑኒ ማርካ፤ ቃሲ ፆሳይ ባሬው ኣዛዜቲያዋንቱሲ ኢሜዳ ጌሻ ኣያናይካ ማርካ» ያጌዲኖ።

³³ሺቄዳ ኣሳይ ሄዋ ሲሴዳ ዎዴ፥ ዳሮ ዪሎቲዴ፥ ዬሱሲ ኪቴዳዋንታ ዎꬋናው ቆፔዲኖ።

³⁴ሺን ኣሳ ኡባን ዳሮ ቦንቼቴዳ ጋማሊያላ ጌቴቲያ፥ ሂጊያ ታማሪሲያ ኢቲ ፓሪሳዊ፥ ሺቁዋን ዴንዲ ኤቂዴ፥ ዬሱሲ ኪቴዳዋንቱ ጉꬃ ዎዲያ ካሬ ኬሳና ማላ

³⁵ኣዛዚዴ ሄዋን ሺቄዳ ኣሳ ሃዋዳን ያጌዳ፤ «ኢስራዔሊያ ኣሳቶ፥ ሂንቴ ሃ ኣሳቱዋ ኦꬃና ቆፒያዋን ሂንቴንታ ናጊቴ።

³⁶ኣዪሲ ጎፔ፥ ሃዋፔ ካሴ ዎዲያን ቴዎዳሳ ጌቴቲያዌ ባሬና ዎልቃማ ጊዴ ዴንዴዳ፤ ዴንዲና ኦይዱ ፄቱ ጊዲያ ኣሳቱ ኣናና ጋኬቴዲኖ፤ ሺን ኣ ዎꬊና፥ ኣ ካሌዳ ኡባቱካ ላሌቲዴ፥ ማዴና ኣሳ ጊዲዴ ኣቴዲኖ።

³⁷ሄዋፔ ጉዪያን፥ ኣሳይ ፓይዴቲያ ዎዴ፥ ጋሊላ ዪሁዳይ ዴንዲዴ፥ ዳሮ ኣሳ ፓኑዋ ኡዲዴ ካሌꬄዳ፤ ሺን ኣካ ዎꬊና፥ ኣ ካሌዳ ኣሳይ ኡባይ ላሌቴዳ።

³⁸«ሃዒካ ታኒ ሂንቴንቶ ኦዳይ፤ ሃ ኣሳቱዋፔ ሻኬቲቴ፤ ኡንቱንታ ቦቾፒቴ። ኣዪሲ ጎፔ፥ ሃ ቆፋይኔ ሃ ኦሱ ኣሳይ ኦꬄዳዋ ጊዶፔ ꬋያና።

³⁹ሺን ሃ ቆፋይኔ ሃ ኦሱ ፆሳፔ ዬዳዋ ጊዶፔ፥ ሂንቴ ኡንቱንታ ꬋዪሳናው ዳንዳይኪታ፤ ኦኒ ኤሪ ሃዋ ሃኒዴ ፆሳና ሂንቴ ኢቴቴናዳን» ያጌዳ።