ዬሱሲ ኪቴዳዋንቱ ኦሱዋ 18:14-25

¹⁴ጳዉሎሲ ሃሳያና ሃኒሺን፥ ጋሊዮሴ ኣዪሁዳቱዋ፥ «ኣዪሁዳቶ፥ ሄዌ ባላ ኦሱዋ ዎይ ኢታ ናቆ ጊዶፔ፥ ታኒ ሂንቴንቱባ ዳንዳያዴ ሲሳናው ቤሴ።

¹⁵ሺን ቃላሲ ሱንꬃሲኔ ሂንቴ ሁጴ ሂጊያሲ ሂንቴንቱ ፓሉሜቶፔ፥ ሂንቴ ሁጴው ኤሪቴ፤ ሃዋ ታኒ ፒርዲኬ» ያጌዳ።

¹⁶ፒርዳ ጎሊያፔ ካሬው ኡንቱንታ ኬሴዳ።

¹⁷ሄዋፔ ጉዪያን፥ ጊሪኬ ኣሳይ ኡባይ ኣዪሁዳ ዎሳ ጎሌ ካፑዋ ሶስቴኒሳ ኦይቂዴ፥ ፒርዳ ጎሊያ ሲንꬃን ሾጬዲኖ፤ ሺን ጋሊዮሳ ሄዌ ኣይኔ ሜቲቤና።

¹⁸ጳዉሎሲ ዳሮ ዎዲያ ቆሮንቶሳን ኡቴዳዋፔ ጉዪያን፥ ኢሻቱዋ ሳሮቲዴ፥ ጲሪስቂሊናኔ ኣቂላና ማርካቢያን ሶሪያ ቤዳ፤ ባሬው ሺቄዳ ጋሱ ዴዒያ ዲራው፥ ኪንኪሪያ ካታማን ባሬ ሁጲያ ሜዴቴዳ።

¹⁹ኡንቱንቱ ኤፌሶኔ ጋኬዳ ዎዴ፥ ጳዉሎሲ ጲሪስቂሎኔ ኣቂላ ያኒ ዬጊ ዬዳ፤ ሺን ባሬው ኣዪሁዳ ዎሳ ጎሌ ጌሊዴ፥ ኣዪሁዳቱዋና ፓሉሜቴዳ።

²⁰ኡንቱንቱ ባሬንቱና ዳሮ ዎዲያ ኡታና ማላ ጳዉሎሳ ዎሲና ኢ ኢፄዳ።

²¹ሺን ኡንቱንቱፔ ሻኬቲዴ፥ «ፆሳይ ጎፔ፥ ላዔꬁዋ ሂንቴንቱኮ ሲማና» ያጊዴ ኤፌሶናፔ ማርካቢያን ቤዳ።

²²ቂሳሪያ ጋኬዳ ዎዴ ዬሩሳላሜ ቢዴ፥ ኣማኒያ ኣሳ ሳሮቴዳዋፔ ጉዪያን፥ ኣንፆኪያ ዎꬌዳ።

²³ያኒ ኣማሬዳ ዎዲያ ጋሚዒዴ ቤዳ፤ ካሊያዋንታ ኡባ ሚኒሲዴ፥ ጋላቲያናኔ ፒርጊያና ኣꬌዳ።

²⁴ኢስኪንዲሪያን ዬሌቴዳ ኣዪሁዳ ኣሳ ኢቲ ኣጲሎሳ ጊያ ሎዖ ሃሳዪያዌ ኤፌሶኔ ቤዳ፤ ፆሳ ማፃፋቱዋ ኢ ዳሪሲ ኤሪያ ኣሳ።

²⁵ጎዳ ኦጊያካ ታማሬዳ ኣሳ፤ ዮሃኒሳ ፂንቃታ ፃላላ ኤሪዴ፥ ኣያናን ባሬ ጋርሳን ኤፄቲዴ፥ ዬሱሳባ ሱሪሲዴ ሃሳዬዳኔ ታማርሴዳ።