ዬሱሲ ኪቴዳዋንቱ ኦሱዋ 16:28-39

²⁸ሺን ጳዉሎሲ ኮሻ ꬎቁ ኦꬂዴ፥ «ኔኒ ኔና ኣያኔ ኡዶፓ፤ ኣዪሲ ጎፔ፥ ኑኒ ኡባይ ሃዋን ዴዔቶ» ያጌዳ።

²⁹ቃሾ ጎሊያ ናጊያዌ ፆምፒያ ዎሲ ኣኪዴ፥ ኤሌካ ቆልዖ ዎፄዳ፤ ኮኮሪዴ ጳዉሎሳ ሲንꬃኒኔ ሲላሴ ሲንꬃን ጉፋኔዳ፤

³⁰ኡንቱንታ ካሬ ኬሲዴ፥ «ታ ጎዳቶ፥ ታኒ ኣታናው ኣያ ኦꬃና ቤሲ?» ያጌዳ።

³¹ጳዉሎሲኔ ሲላሴ ኣ፥ «ጎዳ ዬሱሲ ኪሪስቶሳ ኣማና፤ ኔኒ ኣታና፤ ኔ ሶይ ኣሳይካ» ያጌዲኖ።

³²ኡንቱንቱ ኣዉኔ ኣ ሶዪን ዴዒያ ኡባው ጎዳ ቃላ ኦዴዲኖ።

³³ቃማ ሄ ሳቲያንካ ቃሾ ጎሊያ ናጊያዌ ኡንቱንታ ኣፊዴ ኡንቱንቱ ማይꬃ ሜጬዳ፤ ሄ ማንዒያንካ ባሬ ሶይ ኣሳ ኡባና ፃማቄቲ ኣጌዳ።

³⁴ጳዉሎሳኔ ሲላሳ ፑዴ ባሬ ሶይ ኣፊዴ፥ ኡንቱንቶ ቁማ ኣꬄዳ፤ ኢ ባሬ ሶይ ኣሳ ኡባና ፆሳ ኣማኔዳ ዲራው፥ ናሼቴዳ።

³⁵ዎንቲና ዳናቱ፥ «ሄ ኣሳቱዋ ቢላ» ያጊዴ፥ ፖሊሲያ ካፓቱዋ ኣኮ ኪቴዲኖ።

³⁶ሄዋፔ ጉዬ ቃሾ ጎሊያ ናጊያዌ፥ «ሂንቴንቱ ቢሌታና ማላ፥ ዳናቱ ታው ኪቴዲኖ፤ ሲሚ ሃዒ ኬሲዴ ሳሮቴꬃን ቢቴ» ያጊዴ ሄ ኪታ ጳዉሎሳው ኦዴዳ።

³⁷ሺን ጳዉሎሲ ሄ ፖሊሲያ ካፓቱዋ፥ «ኑኒ ሮሜ ጋዴ ኣሳ ጊዲሺን፥ ኡንቱንቱ ኑና ፒርዳይ ባይናን ኣሳ ሲንꬃን ዋꬊዴ፥ ቃሾ ጎሊያን ዬጌዲኖ። ሃዒ ኑና ጌማን ኬሲ ዬዲኖ? ሃኔና፤ ኡንቱንቱ ባሬንቱ ሁጴው ዪዴ፥ ኑና ኬሲኖ» ያጌዳ።

³⁸ፖሊሲያ ካፓቱ ዳናቱዋሲ ሄዋ ኦዲና፥ ጳዉሎሲኔ ሲላሴ ሮሜ ጋዴ ኣሳ ጊዴዳዋ ሲሴዳ ዎዴ፥ ያዬዲኖ።

³⁹ሄዋ ዲራው፥ ዳናቱ ዪዴ ኡንቱንታ፥ «ኑኒ ሂንቴንታ ናቄዶ» ጌዲኖ። ቃሾ ጎሊያፔ ካሬ ኡንቱንታ ኬሲዴ፥ ካታማፔ ኬሲዴ ባና ማላ ዎሴዲኖ።