ዪሁዳ ኪታ 1

1

¹ታኒ ዬሱሲ ኪሪስቶሳ ቆማይ ዪሁዳይ፥ ያዪቆባ ኢሻይ፥ ፆሳይ ፄሴዳዋንቶ፥ ፆሳይ ኣዉ ሲቂያዋንቶ፥ ቃሲ ዬሱሲ ኪሪስቶሲ ናጊያዋንቶ፥ ሃ ዳቢዳቢያ ፃፋይ።

²ማሮቴꬃይ፥ ሳሮቴꬃይኔ ሲቆቴꬃይ ሂንቴናን ኩሞ።

³ታ ሲቃቶ፥ ኑኒ ኢቲፔ ሻኪ ኣካና ኣቶቴꬃባ ሂንቴንቶ ፃፋናው ታኒ ዳሮ ዳቡሪያ ዎዴ፥ ፆሳይ ባሬ ናናቶ ላዔꬄናን ኢቲ ጌዴ ኢሜዳ ኣማኖ ሂንቴ ባፄታና ማላ፥ ሂንቴና ዞራዴ ፃፋናው ኮሺያዋ ኣኬካዲ።

⁴ኣዪሲ ጎፔ፥ ፆሳ ኤሬና ኢቲ ኢቲ ኣሳቱ ኦኒኔ ቤዔናን ሂንቴ ጊዶ ጌሌዲኖ። ሄዋንቱ ኑ ፆሳ ኣꬎ ኬካቴꬃባ ኦዲያ ኪታ ኢታ ቱናቴꬃው ጌላይ ታማሪሲኖ፤ ኡንቱንቱ ኑ ኢቲ ካቲያ፥ ኑ ጎዳ ዬሱሲ ኪሪስቶሳ ኤሮኮ ያጊኖ፤ ቃሲ ኡንቱንቱ ፒርዳ ኣካናዋ ፆሳ ማፃፋቱ ዳሮ ዎዲያፔ ካሴ ኦዴዲኖ።

⁵ሺን ሂንቴ ሃ ኡባባ ኤሪያዋ ጊዶፔካ፥ ጎዳይ ኢስራዔሊያ ኣሳ ጊብፄ ጋዲያፔ ዎቲ ኣሼዴንቶኔ ቃሲ ኣማኒቤናዋንታ ጉዬፔ ዎቲ ꬋዪሴዴንቶ፥ ታኒ ሂንቴና ሃሳዪሳናው ኮያይ።

⁶ቃሲ ባሬንቱ ዴዒያሳ ኣጊዴ፥ ባሬንቶ ኢሜቴዳ ካፖቴꬃ ናጊቤና ኪታንቻቱ ፒርዳ ኣኪያ ዎልቃማ ጋላሳይ ጋካናው ፆሳይ ኡንቱንታ ናጊያሳን፥ ꬉማፔ ጋርሳን ሜꬊናው ቃቺ ዎꬄ።

⁷ሄዋዳን ሶዶማኔ ጋሞራ ጊያ ካታማቱዋኒኔ ኡንቱንቱ ሄራን ዴዒያ ካታማቱዋን ዴዒያ ኣሳይ ሄ ኪታንቻቱዋዳን ዎሹሜዲኖኔ ዎሹማናው ሎይꬂ ካጄሌዲኖ፤ ሄዋንቱ ሜꬊና ታማን ኤፂዴ፥ ሃራቶ ሌሚሱዋ ጊዴዲኖ።

⁸ሄዋዳን ቃሲ ሄ ኣኩሜቲያ ኣሳቱ ባሬንቱ ኣሳቴꬃ ቱኒሲኖ፤ ፆሳ ጎዳቴꬃ ካꬊኖ፤ ቦንቾ ሜꬌታቱዋካ ቦሪኖ።

⁹ሺን ኪታንቻቱዋ ካፑ ሚካዔሊ ሙሴ ኣኃባ ፃላሂያና ፓሉሜቴዳ ዎዴ፥ «ጎዳይ ኔና ሴሮ» ጌዳዋፔ ኣቲን፥ ቦሪያ ቃላን ኣ ቦላ ፒርዳናው ኮዪቤና።

¹⁰ሺን ሄ ኣሳቱ ባሬው ኣኬኬናባ ኡባ ቦሪኖ፤ ቃሲ ኡንቱንቱ ዩሺ ቆፔና ዶዓቱዋዳን፥ ሜꬌታ ኤራቴꬃን ኤሪያ ዬዋቱ ኡንቱንታ ꬋዪሲያዋንታ።

¹¹ኡንቱንቶ ኣዬሮ! ኣዪሲ ጎፔ፥ ኡንቱንቱ ቃዬሊ ሃሜቴዳ ኦጊያ ሃሜቴዲኖ። ሻሉዋ ዲራው ጊዴ፥ ባላሚ ኦꬄዳዋ ማላ ባዪዙዋ ኦꬄዲኖ። ቃሲ ቆሬ ጊያ ቢታኒ ማካሊዴ ꬋዬዳዋዳን፥ ኡንቱንቱካ ማካሊዴ ꬋዬዲኖ።

¹²ሄዋንቱ ሲቁዋን ሾቢያ ሂንቴ ሚያሳን ሂንቴናና ያሺ ባዪናን ሚያ ዎዴ፥ ቆሴቴዳ ꬉቡዋ ማላ። ኡንቱንቱ ባሬንቱ ፃላላ ናጊኖ። ኡንቱንቱ ጫርኩ ኣፊያ ኢራይ ባዪና ሻሪያ ማላ፤ ቃሲ ኡንቱንቱ ቦኒያን ኣይፊያ ኣዪፌና፥ ፃጱዋና ሾዴቲዴ፥ ሙሌካ ሜሌዳ ሚꬃ ማላ።

¹³ኡንቱንቱ ባሬንቱ ፖኩዋ ጌንꬄና ሆሞቲያ፥ ኢታ ኣባ ቤታ ማላ። ኡንቱንቱ፥ ፆሳይ፥ ሜꬊናው ሳካና ꬉማኒ ሳዓ ጊጊሲ ዎꬄዳ ዩዪያ ፆሊንታቱዋ ማላ።

¹⁴ሄኖኪ ኣዳማፔ ዶሚና፥ ላፑንꬃ ዬሌታ ጊዲያዌ፥ ዳሮ ዎዲያፔ ካሴ ኡንቱንቱዋ ቲምቢቲያ ኦዲዴ፥ ሃዋዳን ያጌዳ፤ «ኣኬኪቴ፤ ፆሳ ኤሬና ናጋራንቻ ኣሳቱ ኦꬄዳ ኢታ ኦሱዋ ኡባዉኔ ቃሲ ፆሳ ኤሬና ሄ ኢታ ኣሳቱ ፆሳ ቦላ ሃሳዬዳ ኢታ ሃሳያ ኡባው፥ ጎዳይ ኡንቱንቱ ኡባ ቦላ ፒርዳናው፥ ባሬ ጮራ ሻዓ ጌሻቱዋና ኢቲፔ ያና» ያጌዳ።

¹⁶ሄ ኣሳቱ ኡባ ዎዴ ዙዙሚኖኔ ሃራቱዋ ኣማሳሊኖ፤ ቃሲ ባሬንቱ ኢታ ኣሙዋ ካሊኖ፤ ባሬንቱ ሁጴው ጎዓ ዴማናው ሃራቱዋ ሳቢኖኔ ባሬንቱ ኮሻ ዎጋፔ ኣꬂዴ፥ ꬎቁ ኦꬂ ሃሳዪኖ።

¹⁷ሺን ታ ሲቃቶ፥ ኑ ጎዳ ዬሱሲ ኪሪስቶሲ ኪቴዳዋንቱ ሂንቴንቶ ቤኒ ሃሳዬዳ ቃላ ኣኬኪቴ።

¹⁸ኡንቱንቱ ሂንቴንቶ፥ «ዉርሴꬃ ዎዲያን፥ ባሬንቶ ፆሳይ ባዪናዋንቱ፥ ባሬንቱ ኣሙዋ ካሊያዋንቱ፥ ቃሲ ሂንቴ ቦላ ቂሊጪያዋንቱ ያና» ያጌዲኖ።

¹⁹ሄዋንቱ ኣሳ ጊዶን ሻኮቴꬃ ሜꬊያዋንታኔ፥ ባሬንቱ ኢታ ኣሞ ሞዴቴዳዋንታ፤ ቃሲ ጌሻ ኣያናይ ባይናዋንታ።

²⁰ሺን ታ ሲቃቶ፥ ኡባፔ ኣꬊያ ጌሻ ኣማኑዋን ሂንቴ ሁጲያ ኬፂቴ፤ ቃሲ ጌሻ ኣያና ዎልቃን ፆሳ ዎሲቴ።

²¹ቃሲ ኑ ጎዳይ ዬሱሲ ኪሪስቶሲ ባሬ ማሮቴꬃን ሂንቴንቶ ኢማና ሜꬊና ዴዑዋ ናጊዴ፥ ሂንቴ ሁጲያ ፆሳ ሲቁዋን ዎꬂቴ።

²²ኢቲ ኢቲ ሲꬊ ዴዒያ ኣሳቶ ቃሬቲቴ።

²³ኢቱዋ ኢቱዋ ታማፔ ዳፊ ኬሲዴ ኣሺቴ። ቃሲ ሃራይ ኣቶ ኡንቱንቱ ኢታ ኣሙዋን ቱኔዳ ማዩዋ ኢፂዴካ፥ ኢቶ ኢቶ ያሻቴꬃን ቃሬቲቴ።

²⁴ሂንቴ ኩንዴናዳን፥ ሂንቴና ናጋናዉኔ ፖኩ ባይናዋንታ ኡዲዴ፥ ባሬ ቦንቹዋ ሲንꬃ ዎልቃማ ናሼቻን ሺሻናው ዳንዳዪያ ኑና ኣሺያ ኢቲ ፆሳው፥ ኑ ጎዳ ዬሱሲ ኪሪስቶሳ ባጋና ቦንቹ፥ ጊታቴꬃይ፥ ዎልቃይኔ ማታይ፥ ኣꬌዳ ዎዴ ኡባፔኔ ሃዒኔ ሜꬊና ጋካናው ጊዶ። ኣሜንዒ።