ዔፕሶኔ ዓሶም 5

1

2

3

4

5

6

¹ዓካሪ ዒንሢ ፆኦሲ ዒ'ንሢ ናሽካያ፥ ዒዛኮ ናኣቶ'' ማዔሢሮ ዒዛ ማሉዋቴ።

²ኪሪስቶሴ ኑና ናሽኬሢና ፆኦሲ ዎዛሳ ሳውሞ ዓኣ ዒንጎ ባኣዚ'' ማሂ ፔ ሼምፓሢ ኑ ጋይቴ ዓኣሢ ዒንጌሢጉዲ ዒንሢያ ናሹሞና ናንጉዋቴ።

³ማቾ ሃሣ ዓኒ ማዒባኣያና ላሂሢ፥ ቦርሲሳ ማዾ፥ ዓሲሮ ዛጊ ሱኡካዺሢ ማዔቴያ ዒንሢ ባኣካ'' ጴዾፓ፤ ዬይ ጌኤሺ ማዔ፥ ፆኦዛሢ ዴሬም ኮይሳ ማዾቱዋሴ፤

⁴ዒንሢ ፆኦሲ ጋላታንዳኣፓዓቴም ቦርሲሳ ባኣዚ''ና ፓሣ ባኣዚ''ባኣ ጊኢጉዋ ሃይሴ ጌስታንዳያ ኮይሱዋሴ።

⁵ማቾ ሃሣ ዓኒ ማዒባኣያና ላሃያኮ፥ ቦርሲሳ ማዾ ማዻያኮ፥ ሜሌ'' ካኣሺ ካኣሽኪሢጉዲ ዓሲሮ ዛጊ ሱኡካዻ ዓሲኮ ኪሪስቶሴና ፆኦሲ ካኣቱሞናይዳ ቤሲባኣያ ማዓንዳሢ ዔሩዋቴ።

⁶ዬንሢ ባኮንሢ ዛሎ''ና ፆኦሲም ዓይሢንቱዋ ዓሶ ዑፃ ዒዛኮ ጎሪ''ንቲ ሙካንዳሢሮ ዖኦኒያ ዒንሢ ጉሪ ማዔ ሃይሴና ጌሾፓ።

⁷ዬያሮ ዬንሢ፥ ዒዛም ዓይሢንቱዋ ዓሶና ዎላ'' ፔቴ'' ማዒፖቴ።

⁸ቤርታ ዒንሢ ዹሚዳ ናንጋኔ፤ ሃሢ ጋዓንቴ ጎዳና ፖዓ ዒንሢ ዓኣሢሮ ፖዖ ዓሳ ናንጋ ጎይፆ ናንጉዋቴ።

⁹ዓይጎሮ ጌዔቴ ኮሹሞ ቢያ፤ ፂሉ''ሞንታ ጎኑሞንታኮዋ ዓኣፒ ጴዻሢ ፖዒዳፓኬ።

¹⁰ዬያሮ ጎዳ ዎዛሳያ ማዓ ባካ ዓይጎታቴያ ዱማሲ ዔሩዋቴ።

¹¹ዓኣፒባኣ ዹሞ ማዾ'' ዒንሢያ ማዻያ ማዒፖቴ፤ ፖዓ ኬሲ'' ፔጋሲ ዻውዋቴ።

¹²ዹሞ ማዾ'' ማዻ ዓሳ ዓኣቺ ማዻ ባኮ ዛሎ'' ኬኤዛኒታዖ ቦርሳያኬ።

¹³ቢያ ባኣዚ'' ፖዒዳ ኬስካዛ ዬይ ዓይጎ ማዔቴያ ጌኤሽኪ ዔርታኔ።

¹⁴ዎይቲ ጌዔቴ ቢያ ባኣዚ'' ፔጋሲ ዻዋሢ ፖዒታሢሮኬ፤ ዬያሮ፦ «ኔኤኒ ሃይ ጊንዓሦ ጴጬ! ሓይባ''ፓ ዔቄ! ኪሪስቶሴ ኔኤም ፖዓንዳኔ» ጌይንቴኔ።

¹⁵ዓካሪ ዒንሢ ዎማይዲ ናንጋንዳቴያ ኮሺ'' ማሉዋቴ፤ ዔራ ዓሲ ማዑዋቴ፤ ዔኤያ ዓሲ ጎይሢ ናንጊፖቴ።

¹⁶ሓይ ዎዳ'' ፑርታ ማዔሢሮ ዓይጎ ካራና ማዔቴያ ዒንሢ ዴንቄ ዎዶ''ማና ማዻ ባኮ ዔሪ ማዹዋቴ።

¹⁷ዬያሮ ጎዳኮ ማሊፃ ዓይጎታቴያ ዔራያ ማዑዋቴ፤ ዔኤያ ማዒፖቴ።

¹⁸ዒንሢ ባይሲንታ ባንሢ ዔኪ ዓኣዻያታሢሮ ዳጋሢ ዑሺና ማሢንቲፖቴ፤ ዬያይዳፓ ዓያና ጌኤሺ ቢታንቶ ዴሞ ጌላያ ማዑዋቴ።

¹⁹ፆኦሲም ማዓ ዓይኑሞና ፆኦሲ ሄርሺ ሄርሺ ዒንሢ ዎላ'' ቡኬ ዎዶ''ና ዓይናዹዋቴ፤ ዬያይዲ ዒኔፓ ጎዳ ጋላቱዋቴ።

²⁰ኑ ጎዳሢ ዬሱስ ኪሪስቶሴ ሱንፆና ቢያ ባኣዚ''ሮ ፆኦሲ፥ ዓዳሢ ቢያ ዎዴ ጋላቱዋቴ።

²¹ኪሪስቶሴ ቦንቾሮ ጌዒ ዒንሢ ፔቴ'' ፔቴ''ሢ ዎሊም ዓይሢንታያ ማዑዋቴ።

²²ዒንሢ፥ ላኣሎ ናኣታ! ጎዳ ዬሱሴም ዒንሢ ዓይሢንታሢጉዲ ዒንሢኮ ዓኒንሢም ዓይሢንቱዋቴ፤

²³ዓይጎሮ ጌዔቴ ኪሪስቶሴ ሺኢጲፆ ማኣሮ ዓሶኮ ዑፃ ቶኦኪ ማዔሢጉዲ ዓኒያ ማቾኮ ቶኦኪኬ፤ ዬያጉዲ ኪሪስቶሴ ፔኤኮ ዑፆ ማዔ፥ ሺኢጲፆ ማኣሮ ዓሶ ዻቂሻሢኬ።

²⁴ሺኢጲፆ ማኣሮ ዓሳ ኪሪስቶሴም ዓይሢንታሢጉዲ ማቾንሢ ቢያ ባኣዚ''ና ፔ ዓኒንሢም ዓይሢንቶንጎ።

²⁵ዒንሢ፥ ዓቲንቃ! ኪሪስቶሴ ሺኢጲፆ ማኣሮ ዓሶ ናሽኬሢና ፔ ቶኦኮ''ዋ ዔያቶ ጋቴ ሃይቢም ዓኣሢ ዒንጌሢጉዲ ዒንሢያ ዒንሢ ላኣሎ ናሽኩዋቴ፤

²⁶ኪሪስቶሴ ዬያ ማዼሢ' ሺኢጲፆ ማኣሮ ዓሳ ፆኦሲም ዱማዼያ ማዓንዳጉዲ ጌይኬ፤ ዒ ዔያቶ ፆኦሲም ዱማሴሢያ ቃኣሎ'' ዛሎ''ና ሓሣ ዋኣሢናኣ ማስኪ ጌኤሺ''ኬ።

²⁷ዬያይዲ፦ ኪንሢ፥ ዓኣፒ ካራ ቱኪ''ሢ፥ ፑርታ ባኣዚ''ያ ፔቴ''ታዖ ባኣያ፥ ጌኤሺ፤ ሃሣ ሚዛጲ ሺኢጲሢ ማኣሪ ዓሲ ማሂ ፔ ቤርቶ ዒንሢ ዒ ሺኢሻኒኬ።

²⁸ዓኒንሢ ፔና ናሽካሢጉዴያ ፔ ማቾንሢ ናሽካኒ ኮይሳኔ፤ ፔ ማቾ ናሽካሢ ፔና ናሽካኔ።

²⁹ዎይቲ ጌዔቴ ፔና ዒፃ ዓሲ ዖኦኒያ ባኣሴ፤ ጋዓንቴ ኪሪስቶሴ ሺኢጲፆ ማኣሮ ዓሶ ሙኡዚ'' ሙኡዚ'' ካፓ ጎይፆ ዒዚ ሙኡዚ'' ሙዒ ሙዒ ፔናኣ ካፓኔ።

³⁰ኑኡኒ ኪሪስቶሴ ዑፆኮ ዱማ ዱማ ቤዞኬ፤

³¹«ዓሲ ዬያሮ ዓዶና ዒንዶና ሃሺ'' ማቾና ዎላ'' ፔቴ'' ማዓኔ፤ ላምዖንሢያ ፔቴ'' ዓሲ ዑሢጉዲ ማዓኔ» ጌይንቴኔ።

³²ዬይ ዼኤፒ ዓኣሺንቴ ባኣዚ''ኬ፤ ሓያ ታ ጋዓሢ' ኪሪስቶሴና ሺኢጲፆ ማኣሮ ዓሶና ማላታ ማሂኬ።

³³ጋዓንቴ ሓይ ባካ ዒንሢማ ማዓያኬ፤ ዬያሮ ዓኒ ፔ ማቾ ፔናጉዲ ማሂ ናሽኮንጎ፤ ማቻኣ ዓኒ ቦንቾንጎ።