ማርቆሳ 4:24-39 in Dawro

²⁴ ቃሲካ ኡንቱንታ፥ «ሂንቴንቱ ሲሲያዋ ኣኬኪዴ ሲሲቴ፤ ፆሳይ ሂንቴ ማኬዳ ቁንዓን ሂንቴንቶ ማካናዋ። ኢ ሂንቴንቶ ዳሪሲዴ ኢማና፤

²⁵ ዴዒያ ኡራው ጉጂ ኢማና፤ ባይናዋፔ ሃራይ ኣቶ፥ ኣው ዴዒያ ሄ ጉꬃቶካ ኣኪዲጋና» ያጌዳ።

²⁶ ዬሱሲ ቃሲካ፥ «ፆሳ ካዉቴꬃይ ጋዴን ካꬃ ዜሪያ ኣሳ ማላ።

²⁷ ሄ ቢታኒ ቃማ ጌሚዒሼ፤ ጉራ ዴንዴ፤ ኢ ባሬ ሁጴው ዋኒንቶ ኤሬናን፥ ሄ ዜሬꬃይ ሞኬኔ ዲጬ።

²⁸ ቢታይ ካꬃ ባሬካ ሞኬኔ ኣይፌ፤ ኮይሮ ጫርሻይ ጫሬ፤ ጉዬፔ ኣይፋናው ኩኩሜ፤ ቃሲ ዉርሴꬃን ኩሜንꬃ ኣይፊያ ኣይፌ።

²⁹ ሺን ካꬃይ ጋኪያ ዎዴ፥ ካꬃ ሺሺያ ዎዲ ጋኬዳ ዲራው፥ ቢታኒ ኤሌካ ባጫን ጫኩዋ ጌሊ ኣጌዳ» ያጌዳ።

³⁰ ዬሱሲ፥ «ኑኒ ፆሳ ካዉቴꬃ ኣያ ማላቴ ጋኔ? ዎይ ኣያና ሌሚሳኔ?

³¹ ፆሳ ካዉቴꬃይ ሳናፊጪያ ኣይፋቶ ማላቴ። ሄ ኣይፋታ ዜሪያ ዎዴ፥ ሳዓን ዴዒያ ሚꬃ ኣይፊያ ኡባፔካ ጉፃው፤

³² ሄኖ ዜሪና ሞካዴ ሃራ ኣታኪልቲያ ኡባፔ ዳራው፤ ዳሮ ዳሻ ዳሻው። ካፉ ኢዚ ቃንካ ኩዋን ጎሊያ ኬፃና ዳንዳዬ» ያጌዳ።

³³ ዬሱሲ ሃዋ ማላ ዳሮ ሌሚሱዋን ኣሳይ ሲሳናው ዳንዳዪያዋ ኬና፥ ባሬ ቃላ ኦዴዳ።

³⁴ ኣሳው ሌሚሱ ባይናን ኦዴና፤ ሺን ዬሱሲ ባሬና ካሊያዋንቱ ፃላላና ዴዒያ ዎዴ፥ ኡንቱንቶ ኡባባ ቢሊዴ ኦዴ።

³⁵ ሄ ጋላሲ ሳዓይ ኦማርሲና፥ ዬሱሲ ባሬና ካሊያዋንታ «ኣባፔ ሄፊንꬃ ፒኖይቴ» ያጌዳ።

³⁶ ኣ ካሊያዋንቱ ኣሳ ኣጊዴ፥ ዬሱሲ ካሴ ጌሊ ኡቴዳ ዎንጊሪያን ጌሊዴ፥ ዬሱሳ ባሬንቱና ኣፌዲኖ፤ ሃራ ዎንጊራቱካ ሄዋን ዴዒኖ።

³⁷ ዎልቃማ ጎቱ ዴንዲና፥ ቤታይ ዎንጊሪያ ሾጪና፥ ሃꬃይ ኩማና ጋካናው ዎንጊሪያ ጊዶ ጌሌዳ።

³⁸ ሄ ዎዴ ዬሱሲ ዎንጊሪያን ጉዬ ባጋና ቦርኮꬃ ቦርኮቲዴ ጌሚዒሼዳ። ዬሱሳ ካሊያዋንቱ ኣ ዴንꬂዴ፥ «ታማሪሲያዎ፥ ኑኒ ꬋዪያ ዎዴ ጮዑ ጋዴ ፄላይ?» ያጌዲኖ።

³⁹ ኢ ቤጎቲዴ ጎቱዋ፥ «ጮዑ ጋ» ጊዴ፥ ኣባካ፥ «ዎፑ ጋ» ጌዳ፤ ጎቱካ ጮዑ ጊና፥ ኡባባይካ ዎፑ ጌዳ።

²⁴ Qassikka unttuntta, “Hinttenttu sisiyaawaa akeekiide sisite; Xoossay hintte makkeedda qun77aan hinttenttoo makkanawaa. I hinttenttoo darissiide immana;

²⁵ de7iyaa uraw gujji immana; baynnawaappe haray atto, aw de7iyaa he guuthattokka akkidiggana” yaageedda.

²⁶ Yesuusi qassikka, “Xoossaa kawutethay gaden kathaa zeriyaa asaa mala.

²⁷ He bitani qamma gemi77ishee; guura denddee; I bare huuphew waanintto erennaan, he zerethay mokkeenne diccee.

²⁸ Biittay kathaa barekka mokkeenne ayfee; koyro carshshay caaree; guyyeppe ayfanaw kuukummee; qassi wurssethaan kumentha ayfiyaa ayfee.

²⁹ Shin kathay gakkiyaa wode, kathaa shiishshiyaa wodii gakkeedda diraw, bitani ellekka baacaan cakuwaa gelii aggeedda” yaageedda.

³⁰ Yesuusi, “Nuuni Xoossaa kawutethaa ayaa malatee gaanee? Woy ayaanna leemisanee?

³¹ Xoossaa kawutethay sannaaficiyaa ayfatto malatee. He ayfatta zeriyaa wode, sa7aan de7iyaa mithaa ayfiiyaa ubbaappekka guuxxaw;

³² henno zerina mokkaade hara atakilttiyaa ubbaappe daraw; daro daashshaa daashaw. Kafuu izi qankkaa kuwaan golliya keexxana danddayee” yaageedda.

³³ Yesuusi hawaa mala daro leemisuwan asay sisanaw danddayiyaawaa keenaa, bare qaalaa odeedda.

³⁴ Asaw leemisuu baynnaan odenna; shin Yesuusi barena kaalliyaawanttu xalalaanna de7iyaa wode, unttunttoo ubbabaa billiide odee.

³⁵ He gallassi sa7ay omarssina, Yesuusi barena kaalliyaawantta “Abbaappe hefintha pinnoytte” yaageedda.

³⁶ A kaalliyaawanttu asaa aggiide, Yesuusi kase geli utteedda wonggiriyaan geliide, Yesuusa barenttunna afeeddino; hara wonggiratuukka hewaan de7iino.

³⁷ Wolqqaama gotuu denddina, beetay wongiriyaa shocina, haathay kumana gakkanaw wongiriyaa giddo geleedda.

³⁸ He wode Yesuusi wonggiriyaan guyye bagganna borkkothaa borkkotiide gemi77isheedda. Yesuusa kaalliyaawanttu A denthiide, “Tamaarissiyaawoo, nuuni dhayiyaa wode co77u gaade xeellay?” yaageeddino.

³⁹ I beegottiide gotuwaa, “Co77u ga” giide, abbaakka, “Woppu ga” geedda; gotuukka co77u giina, ubbabaykka woppu geedda.