ሉቃሳ 3:3-23 in Gofa

³ ዮሃኒሲ፥ «ሂንቴ ናጋራፔ ሲሚቴኔ ፃማቄቲቴ። ፆሳይ ሂንቴ ናጋራ ኣቶ ጋና» ያጊዲ ታማርሲሼ ዮርዳኖሴ ሻፋ ሄራን ዴዒያ ቢታ ኡባ ቢስ።

⁴ ሄሲካ ናቤይ ኢሳያሲ ባ ማፃፋን፥ «ባዞ ጊዶን ባ ቃላ ꬎቁ ኦꬂዲ፥ ዋሲያ ኡራ ቃላይ፥ ‹ጎዳ ኦጊያ ጊጊሲቴ፥ ሆሮጋካ ፒዲ ኦꬂቴ።

⁵ ኣፎ ኡባይ ኩማና፥ ዙማይኔ ዴሬይ ዚቂ ጋና። ዎቤ ኦጌይ ሉላና፥ ጊጎና ሆሮጋይ ቂንፂ ጋና።

⁶ ኣሾ ማዒዳ ኡባይ፥ ፆሳ ኣሹዋ ቤዓና› » ጊዲ ፃፊዳይሳዳ ሃኒስ።

⁷ ዮሃኒሲ፥ ባ ኩሼን ፃማቄታናው ዪዳ ኣሳኮ፥ «ሂንቴኖ፥ ሾሻ ናይቶ ያናው ዴዒያ ሃንቁዋፌ ኣታና ሜላ ሂንቴና ዞሪዳይ ኦኔ?

⁸ ሂዛ፥ ሂንቴ ሲሙዋ ቆንጪሲያ ሎዖ ኦሶ ኦꬂቴ፥ ሂንቴ ዎዛናን፥ ‹ኑስ፥ ኑ ኣዋይ ኣብራሃሜይ ዴዔስ ጊዲ ጬቄቶፊቴ።› ሃ ሲዒቴ፥ ሃ ሹቻታፔ ፆሳይ ኣብራሃሜስ ናዓ ኬሳናው ዳንዳዔስ።

⁹ ሄኮ፥ ቤፄይ ሚꬃ ፃጶን ዴዔስ። ሂዛ፥ ሎዖ ኣይፌ ኣይፎና ሚꬃ ኡባይ ቃንፄቲዲ ታማን ዬጌታና» ያጊስ።

¹⁰ ኣሳይ፥ «ያቲን ኑኒ ኣይ ኦꬂኖ?» ያጊዲ ኦይቺዶሶና።

¹¹ ዮሃኒሲ ዛሪዲ፥ «ናምዑ ኣፊሊ ዴዒያ ኣሲ ባይናይሳስ ኢሞ። ካꬂ ዴዔይሲ ባይናይሳስ ኢሞ» ያጊስ።

¹² ቃራፃ ቃንፂሴይሳቲ ፃማቄታናው ዪዲ፥ «ኣስታማሪያው፥ ኑኒ ኣይ ኦꬂኖ?» ያጊዶሶና።

¹³ ኢ ዛሪዲ፥ «ሂንቴ ቃንፂሳናው ኪቴቶይሳፌ ኣꬂዲ ኤኮፊቴ» ያጊስ።

¹⁴ ቃሲ ዎታዳሬቲ ዪዲ፥ «ኑኒ ኣይ ኦꬂኖ» ያጊዲ ኦይቺዶሶና። ዮሃኒሲ፥ «ኦዴባካ ዎልቃን ዳፊዲ ኤኮፊቴ፥ ኦናካ ዎርዶን ሞቶፒቴ፥ ሂንቴ ዳሞዜይ ሂንቴው ጊዶ፤ ኡፋይቲዲ ዴዒቴ» ያጊስ።

¹⁵ ኣሳይ ኪሪስቶሳ ናጊሼ ዴዒያ ጊሾ ዮሃኒሳ፥ «ኢ ኪሪስቶሳ ጊዳንዴሻ?» ጊዲ ቆፒዶሶና።

¹⁶ ዮሃኒሲ ኡባስ ዛሪዲ፥ «ታኒ ሂንቴና ሃꬃን ፃማቃይስ፥ ሺን ታፔ ኣꬊዲ ዎልቃሜይሲ ያና። ታኒ ኢያ ጫማ ዎዶሩዋ ቢላናው ቤሶና ኣሲ። ኢ ሂንቴና ጌሻ ኣያናኒኔ ታማን ፃማቃና።

¹⁷ ዉዱማን ዴዒያ ካꬃ ፖሎ ጌሻናው ፒꬄይ ኢያ ኩሼን ዴዔስ። ጌሻ ካꬃ ባ ሻሊያን ቆላና፤ ካሊያ ꬋዮና ታማን ፁጋና» ያጊስ።

¹⁸ ቃሲ ዮሃኒሲ ኣሳ ዳሮ ዞሬ ዞሪዲ ዎንጌላ ኦዲስ።

¹⁹ ሺን ዮሃኒሲ ሄሮዲሲ ባ ኢሻ ማቺው፥ ሄሮዲያዳ፥ ኤኪዳ ጊሾኔ ሃራ ኢታ ኦሶታ ጊሾ ካጪዳ ዎዴ

²⁰ ሄሮዲሲ ካሴይሳ ቦላ ሃራባ ኡባ ጉጂዲ ዮሃኒሳ ዎይኔ ጌልሲስ።

²¹ ዮሃኒሲ ቃሼታናፔ ሲንꬄ ኣሳ ኡባ ፃማቂዲ ሲሚን፥ ዬሱሲካ ቃሲ ፃማቄቲስ። ኢ ዎሲሺን ሳሎይ ዶዬቲስ።

²² ጌሻ ኣያናይ ሆሌዳ ቤንቲሼ ኢያ ቦላ ኡቲስ። ሳሎፔ «ታኒ ዶሲያ ናዓይ ኔና፤ ኔ ታና ኡፋይሳሳ ያጊያ» ቃላይ ዪስ።

²³ ዬሱሲ ታማርሶ ኦይኪያ ዎዴ ኢያው ሃስታሙ ላይꬂ ጊዲሺን፥ ኣሳይ ኢያ ዮሴፋ ናዓ ጊዲ ቆፒስ። ዮሴፊ ኤሌ ናዓ፥

³ Yohaannisi, “Hintte nagaraappe simmitenne xammaqetite. Xoossay hintte nagaraa atto gaana” yaagidi tamaarssishe Yorddaanose Shaafaa heeran de7iya biitta ubbaa bis.

⁴ Hessika nabey Isayaasi ba maxaafan, “Bazzo giddon ba qaala dhoqqu oothidi, waassiya uraa qaalay, ‘Godaa ogiya giigisite, horogaakka piddi oothite.

⁵ Aafo ubbay kumana, zumaynne derey ziqqi gaana. Wobbe ogey luulana, giigonna horogay qinxi gaana.

⁶ Asho ma77ida ubbay, Xoossaa ashuwa be7ana’ ” gidi xaafidayssada hanis.

⁷ Yohaannisi, ba kushen xammaqettanaw yida asaakko, “Hinttenoo, shoosha nayto yaanaw de7iya hanquwafe attana mela hinttena zoriday oonee?

⁸ Hiza, hintte simuwa qonccisiya lo77o ooso oothite, hintte wozanan, ‘Nuus, nu aaway Abrahamey de7ees gidi ceeqettofite.’ Haa si7ite, ha shuchchatappe Xoossay Abrahames na7a kessanaw dandda7ees.

⁹ Hekko, beexey mithaa xaphon de7ees. Hiza, lo77o ayfe ayfonna mitha ubbay qanxettidi taman yegettana” yaagis.

¹⁰ Asay, “Yaatin nuuni ay oothinoo?” yaagidi oychchidosona.

¹¹ Yohaannisi zaaridi, “Nam77u afili de7iya asi baynnayssas immo. Kathi de7eyssi baynnayssas immo” yaagis.

¹² Qaraxa qanxiseyssati xammaqettanaw yidi, “Asttamaariyaw, nuuni ay oothinoo?” yaagidosona.

¹³ I zaaridi, “Hintte qanxisanaw kiitettoyssafe aathidi ekkofite” yaagis.

¹⁴ Qassi wotaaddareti yidi, “Nuuni ay oothinoo” yaagidi oychchidosona. Yohaannisi, “Ooddebaakka wolqqan dafidi ekkofite, oonakka worddon mootoppite, hintte damoozey hinttew gido; ufayttidi de7ite” yaagis.

¹⁵ Asay Kiristtoosa naagishe de7iya gisho Yohaannisa, “I Kiristtoosa gidanddeshshaa?” gidi qoppidosona.

¹⁶ Yohaannisi ubbaas zaaridi, “Taani hinttena haathan xammaqays, shin taappe aadhdhidi wolqqaameyssi yaana. Taani iya caammaa wodoruwa billanaw bessonna asi. I hinttena Geeshsha Ayyaananinne taman xammaqana.

¹⁷ Wudumman de7iya kathaa polo geeshshanaw pithey iya kushen de7ees. Geeshsha kathaa ba shaaliyan qolana; kaliya dhayonna taman xuuggana” yaagis.

¹⁸ Qassi Yohaannisi asaa daro zore zoridi Wonggelaa odis.

¹⁹ Shin Yohaannisi Heroodisi ba ishaa machchiw, Heroodiyada, ekkida gishonne haraa iita oosota gisho kaccida wode

²⁰ Heroodisi kaseyssa bolla haraba ubbaa gujjidi Yohaannisa woyne gelssis.

²¹ Yohaannisi qashettanaappe sinthe asaa ubbaa xammaqidi simmin, Yesuusikka qassi xammaqettis. I woossishin saloy dooyettis.

²² Geeshsha Ayyaanay holleda benttishe iya bolla uttis. Saloppe “Taani dosiya na7ay nena; ne tana ufayssaasa yaagiya” qaalay yis.

²³ Yesuusi tamaarsso oykkiya wode iyaw hasttamu laythi gidishin, asay iya Yoosefa na7a gidi qoppis. Yoosefi Eele na7a,