ሉቃሳ 2:20-46

²⁰ሄሚዛይቲካ ሃንዳይስ ዉሪካ ኪታንቻይ ኢስታስ ዮቲዳ ማላ ጊዲዲ ቤቲዳ ጊሽ ሲይዳይሳሲኔ ቤዪዳይሳስ ኡባስ ፆሳ ጋላቲሼኔ ቦንቺሼ ሲሚዳ።

²¹ናዚ ዬሌቲን ኦስፑንꬃ ጋላሳን ቃፃሬቲዛ ዎዴይ ጋኪን ኣዬያ ኢዛ ቃንꬃታናፔ ካሴ ኪታንቻይ ጊዳ ማላ ዬሱሳ ጌቴቲዲ ሱሚዴስ።

²²ሙሴ ዎጋ ማላ ኢስቲ ጌዪዛ ዎዴይ ዉሪን ዮሴፌይኔ ማራማ ጉꬃ ና ዬሱሳ ጎዳ ፆሳ ሲንꬄ ሺሻናስ ኤኪዲ ዬሩሳላሜ ኬዚዳ። ሄሲካ ጎዳ ዎጋን ኮይሮ ዬሌቲዛ ኣቱማ ናይ ዉሪ ጎዳስ ዱማ ጊዳና ጌቴቲዲ ፃፌቲዳይሳ ፖላናሲኔ

²⁴ቃሴካ ጎዳ ዎጋን ናምዑ ሃራጴ ካፎታኔ ዎይኮ ናምዑ ሃራጴ ካፎ ጪዬታ ጌቴቲዳይሳ ማላ ያርሾ ሺሻናሳ።

²⁵ሄ ዎዴ ዬሩሳላሜ ካታማን ፂሎኔ ፆሳ ባቢዛ ኢሲ ሲሞና ጌቴቲዛ ኣሲ ዴስ፤ ኢዚካ ኢስራዔሌ ናይታ ኣቶቴꬃ ናጊዛ ኣሳኔ ፂሎ ኣያናይ ኢዛ ቦላ ሼምፒዳ ኣሳ።

²⁶ቃሴካ ኪርስቶሳ ቤዮንታ ዲሼ ሃይቆንታ ማላ ፂሎ ኣያናይ ኢዛስ ቆንጪዴስ።

²⁷ኢዚካ ሄ ዎዴ ፂሎ ኣያናይ ካሌꬂን ፆሳ ኬꬄ ላሻ ጋꬅ ጌሊዴስ። ናዛ ኣዬዪራኔ ኣዋራ ሙሴ ዎጋን ቤሲዛይሳ ፖላናስ ጉꬃ ና ዬሱሳ ኤኪዲ ጌሊዳ ዎዴ፥

²⁸ሲሞኒ ናዛ ኤኪ ኢዲሚዲ ፆሳ ጋላቲሼ፥

²⁹“ጎዶ! ኔ ጫቂዳ ቃላ ማላ ሃዒ ታኒ ኔ ኣይሌይ ኔ ኣሺዛይሳ ታ ኣይፌራ ቤዪዳ ጊሽ ሂዓ ታና ሳሮን ኤካ፤ ኣሳ ኡባ ሲንꬃን ኔ ጊጊሲዳ ኣቶቴꬃ ሃዒ ታኒ ታ ኣይፌራ ቤያዲስ።

³²ሃይሲካ ኡባ ዴሬስ ጌሜቲዳይሳ ቆንጪሲዛ ፖዖ፥ ኔ ዴሬ ኢስራዔሌሲካ ቦንቾ” ጊዴስ።

³³ኢዛ ኣዋይኔ ኣያ ኢዛ ጊሽ ሃሳዬቲዳ ዮዖዛን ማላሌቲዳ።

³⁴ሲሞኒካ ኢስታ ኣንጂዴስ፤ ማራሞካ “ዳሮ ኣሳ ዎዝና ቆፋይ ቆንጫና ማላ ሃይሲ ኢስራዔሌን ዲዛ ዳሮታስ ꬋዮሲኔ ኣቶቴꬃሳ፤ ኢዛ ኢፂዛይታስ ቃሴ ማላታ ጊዳና ማላ ዶሬቲዴስ።

³⁵ቃሴካ ዳሮታ ዎዝና ቆፋይ ቆንጫና ማላ ናዛ ሚሻይ ቃራ ማሻ ማላ ኔ ዎዝና ጳልቃና” ጊዴስ።

³⁶ቃሴካ ኣሴሬ ባጋፌ ፋኑዔሌ ና ሃና ጌቴቲዛ ጪሚዳ ናቤይ ዳዉስ፤ ኢዛካ ባ ኮይሮ ኣዚናራ ላፑን ላይꬅ ኩሜꬅ ዴዓዱስ።

³⁷ላይꬃይ ኢዚስ ኦሱፑን ታማኔ ኦይዱ ላይꬅ ጊዳና ጋካናስ ቃማኔ ጋላስ ፆማሼኔ ዎሳሼ ፆሳ ኬꬃፌ ሻኬቶንታ ኣምዔቴꬃን ጋምዓዱስ።

³⁸ሄ ዎዴካ ሺቃዳ ፆሳ ጋላታዱስ። ዬሩሳላሜ ዎዜቴꬅ ናጊሼ ዲዛይታስ ኡባስ ጉꬃ ናዛ ጊሽ ዮታዱስ።

³⁹ዮሴፌራኔ ማራሚራ ጎዳ ዎጋን ኣዛዜቲዳይሳ ፖሊዲ ጋሊላ ኣዉራጃን ዲዛ ባሶ ናዚሬቴ ካታማ ሲሚዳ።

⁴⁰ጉꬃ ናዚካ ዲጪዲ ሚኒ ሚኒ ቢዴስ፤ ኣꬎ ኤራቴꬃን ኩሚዴስ፤ ፆሳ ኣꬎ ኪያቴꬃይካ ኢዛ ቦላ ዴስ።

⁴¹ኢዛ ኣዋይኔ ኣያ ላይꬃን ላይꬃን ፓዚጋ ቦንቻናስ ዬሩሳላሜ ቤቴስ።

⁴²ናዛስ ላይꬃይ ታማኔ ናምዑ ላይꬅ ኩሚዳ ዎዴ ካሴ ሎሴ ጊዲዳይሳ ማላ ፓዚጋ ቦንቻና ኬዚዳ።

⁴³ፓዚጋ ባዓሌዛ ቦንቺዲ ባሶ ሲሚሺን ዬሱሲ ዬሩሳላሜን ኣቲዴስ። ዬሊዳይቲካ ኢዚ ኣቲዳይሳ ኤሪቤይቴና።

⁴⁴ባናራ ኢሲፌ ቢዛ ኦጌ ኣሳራ ዴስ ጊሼ ኢሲ ጋላሳ ኦጌ ቢዳ። ጊዶ ኣቲን ኢዚ ኢስታራ ባይንዳይሳ ኤሪዲ ባ ዳቦታ ኣቻኒኔ ላጌታ ኣቻን ዲዛኮኔ ጊዲ ኮይዳ።

⁴⁵ኮዪ ኮይዲ ቤቶንታ ኢፂን ዬሩሳላሜ ሲሚዳ።

⁴⁶ሄꬑ ጋላሳፌ ጉዬ ፆሳ ኬꬃን ታማርሲዛይታ ጊዶን ኡቲዲ ሲዪሼ፥ ኣሳታ ኦይቺሼኔ ኢስታ ኦይሻ ዛሪሼ ፆሳ ኬꬃን ዲሺን ዴሚዳ።