ሉቃሳ 12:48-57

⁴⁸ጊዶ ኣቲን ኤሮንታ ዲሼ ሾቻስ ቤሲዛ ሞሮ ኦꬂዳ ኣሽካራይ ጉꬃራ ሾጬታና። ዳሮ ኢሜቲዳ ኣሳ ኡባፌ ዳሮይ ኮዬቴስ፤ ዳሮ ሃዳራ ኤኪዳዴፌ ዳሮይ ኮዬቴስ።

⁴⁹“ታኒ ዪዳይ ቢታ ቦላን ታማ ኤꬃናሳ። ሄ ታማይ ሃዒ ኤፂ ኬዚዳኮ ታና ዳሮ ኡፋይሳና።

⁵⁰ጊዶ ኣቲን ታኒ ፃማቄታና ፂንቃታይ ዴስ፤ ሄ ፂንቃታይ ፖሌታናሼ ታኒ ኬሃ ሜቶቴታዲስ።

⁵¹ኢንቴስ ታኒ ቢታ ቦላ ሳሮ ኤሃና ዪዳ ሚሳቲዜ? ጊዴና፤ ታ ኢንቴስ ዮታይስ ታኒ ዪዳይ ኢሳ ኢሳፌ ሻካናሳ።

⁵²ሃይሳፌ ሲንꬃን ኢሲ ኬꬃን ባ ጊዶን ሻኬቲዳ ኢቻሹ ኣሳቲ ዳና። ናምዓቲ ሄꬓታ ቦላ ሄꬓቲ ናምዓታ ቦላ ዴንዲዲ ባ ጊዶን ሻኬታና።

⁵³ኣዋይ ባ ኣቱማ ና ቦላ፥ ኣቱማ ናይካ ባ ኣዋ ቦላ፥ ኣያ ባ ማጫ ናይ ቦላ ማጫ ናያካ ባ ኣዬይ ቦላ፥ ቦሎታ ባ ና ማች ቦላ፥ ና ማቻካ ባ ቦሎቲ ቦላ ዴንዲዲ ባ ጊዶን ሻኬታና” ጊዴስ።

⁵⁴ቃሴካ ዴሬዛስ “ኢንቴ ኣዋ ኣርሼይ ሞኪዛ ባጋራ ሻራይ ኬዚሺን ቤዪዲ ‘ኤሌራካ ኢራይ ያና’ ጌስ ጌታ፤ ኢንቴ ጊዳ ማላካ ሃኔስ።

⁵⁵ዱጌሃ ባጋራ ፑዴሃ ጫርኪሺን ጋላሳይ ሆዖ ጊዳና ጌታ፤ ኢንቴ ጊዳ ማላካ ሃኔስ።

⁵⁶ኢንቴኖ! ሎዖ ሚሳቲዛ ኢታቶ፤ ሳሎይሳኔ ሳዓ ሜꬋ ቤዪዲ ሃናናይሳ ኤሬታ ሺን ሂስቲን ሃ ዎዴዛ ኤሮይ ኢንቴና ዋኒ ፆኒዜ?” ጊዴስ።

⁵⁷“ሂስቲኮ ኢንቴ ኣይስ ቱማ ፒርዴኬቲ?