ሃዋሬታ ኦሶ 22:3-14

³“ታኒ ኪልቂያ ጊዶን ዲዛ ፃርሴሴ ካታማን ዬሌቲዳ ኣይሁዳ ኣሳ፤ ታኒ ዲጪዳይ ጊዲኮ ሃኒን ዬሩሳላሜና፤ ታ ኑ ኣዋታ ዎጋ ዉርሳ ጋማልያሌፔ ሎዔꬃ ታማራዲሴኔ ኢንቴ ሃች ኦꬂዛይሳꬆ ፆሳስ ሱሬ ዎዝናፔ ኦꬃሼ ዴዓዲስ።

⁴ሃይሳ ሃ ኦጌዛ ካሊዛ ኣሳታ ኡባ ዎꬋና ጋካናስ ጎዳꬂዛ ኣሳኮሺን፤ ማጫታኔ ኣዴታ ቃቻ ቃቻ ቃሾ ኬꬄ ዬዲዛዴኮሺን።

⁵ሃይሲ ዉሪ ቱሙ ጊዲዳይሳ ቄሴታ ሃላቃቲኔ ዴሬ ጪማቲካ ዉሪ ታስ ማርካታና፤ ሃራይ ኣቶሺን ዳማስቆን ዲዛ ኣማኒዛ ኣሳ ቃቻ ዬሩሳላሜ ኤሃዳ ቃፃይሳናስ ዳማስቆን ዲዛይታስ ፃፌቲዳ ዳብዳቤ ቄሴታ ሃላቃታፔኔ ዴሬ ጪማታፔ ኤካዲስ።

⁶“ታኒ ዳማስቆ ቢሺኒኔ ካታማ ጌላና ማቲሺን ሴታ ጋላስ ታ ቆፖንታ ዲሺን ሳሎፔ ዎልቃማ ፖዖይ ታና ዩይ ኣꬊ ፖዒዴስ።

⁷ሄ ዎዴ ታኒ ቢታ ቦላ ኩንዳዳ ሳዉሌ! ሳዉሌ! ኔ ታና ኣዛስ ጎዳይ? ጊዛ ቃላ ሲያዲስ።

⁸ታካ ‘ጎዶ ኔ ኦኔ?’ ጋዲስ፤ ኢዚካ ‘ታ ኔኒ ጎዲዛ ናዚሬቴ ዬሱሳ’ ጊዴስ።

⁹ታናራ ኢሲፌ ዲዛ ኣሳቲ ፖዖዛ ቤዪዳ ኣቲን ኢዚ ታናራ ሃሳዪሺን ቃላ ሲይቤቴና።

¹⁰ታካ ‘ጎዶ ታ ኣይ ኦꬆ?’ ጋዲስ። ጎዳይካ ‘ዴንዳዳ ዳማስቆ ባ፥ ኔ ኦꬃናይሳ ኢስቲ ኔስ ሄን ዮታና’ ጊዴስ።

¹¹ፖዖዛ ፆልቄቴꬃ ዳሮፔ ዴንዲዳይሳን ታ ፄላናስ ዳንዳያቤኬ፤ ታናራ ዲዛ ኣሳቲ ታ ኩሼ ኦይኪ ጎቺዲ ታና ዳማስቆ ጋꬂዳ።

¹²ሃናኒያ ጌቴቲዛ ኢሳዴይ ሄን ዴስ፤ ሃናኒያይ ዳማስቆን ዲዛ ኣይሁዳታ ኣቻን ዳሮ ጋላቴቲዳይሳኔ ዎጋ ቦንቺዛ ኣሳ።

¹³ኢዚ ታ ኣች ሺቂ ኤቂዲ ‘ታ ኢሻ ሳዉሌ ኔ ኣይፌይ ቃሴካ ፄሎ’ ጊዴስ፤ ሄራካ ታ ኣይፌይ ኢዛ ፄሊዴስ።

¹⁴ኢዚካ ታና ‘ኑ ኣዋንታ ፆሲ ኔ ኢዛ ሼኔ ኤራና ማላ፥ ኢዛ ፂሎዛ ኔ ቤያና ማላኔ ኢዚ ጊዛይሳ ኔ ሲያና ማላ ኔና ካሴቲ ዶሪዴስ።