ሃዋሬታ ኦሶ 17:14-18

¹⁴ሄ ዎዴ ኣማንዛይቲ ጳዉሎሳ ኤሌሲዲ ጌዴ ኣባ ኣቺ ዬዲዳ። ሲላሲኔ ፂምቶሲ ሄን ኣቲዳ።

¹⁵ጳዉሎሳ ሞዪዚዳ ኣሳቲ ኢዛ ኣቴና ጋꬂዳ። ቃሴካ ሲላሲኔ ፂምቶሲ ኢዛኮ ኤሌሊ ጋካና ማላ ጊዛ ኪታ ጳዉሎሳፔ ኤኪዲ ሲሚዳ።

¹⁶ጳዉሎሲ ኣቴናን ኢስታ ናጊሺን ኣቴና ካታማን ኤቃቲ ኩሚዳይሳ ቤዪዲ ዳሮ ሼኔቲዴስ።

¹⁷ሄሳ ጊሽ ኣይሁዳታ ዎሳ ኬꬃን ኣይሁዳታራኔ ፆሳስ ያዪዛ ጊሪኬ ኣሳራ ቃሴካ ጊያይ ዲዛሶን ጋላስ ጋላስ ባናራ ጋጊዛ ኣሳራ ሃሳዬቲዴስ።

¹⁸ኤፊቆሮሴኔ ኢስቶይኮ ጌቴቲዛ ኤራንቻታ ባጋ ጊዲዳይቲ ጳዉሎሳኮ ሺቂዲ ኢዛራ ሃሳዬቲዳ ኢስታፌ ኢሲ ኢሲ ኣሳቲ “ሃይሲ ሎምዑ ሎምዓይ ኣይ ጋና ኮዪዜ?” ጊዳ። ባጋቲ ቃሴ ዬሱሳ ጊሺኔ ሃይቆፔ ኢዛ ዴንꬃ ሚሺራቾ ኢዚ ሳባኪሺን ሲይዲ “ሄይሲ ሃራ ኦራꬃ ኤቃታ ጊሽ ዮቲዛ ሚሳቴስ” ጊዳ።