ሃዋሬታ ኦሶ 14:12-22

¹²ባርናባሳ “ዲያ” ጊዳ ጳዉሎሳካ ሃሳዪዛ ዋናይ ኢዛ ጊዲዳ ጊሽ “ሄርሜኔ” ጊዳ።

¹³ካታማፔ ኣሲ ባይንዳሶን ዲዛ ዲያ ጌቴቲዛ ኤቃ ኬꬃ ቄሴይ ኮርማታኔ ፃፄቲ ጊጊዳ ጪሽ ጌዴ ካታማ ጌሊዛ ኦጌ ቦላ ኤፊዲ ዴሬዛራ ኢሲፌ ጊዲዲ ጳዉሎሳሲኔ ባርናባሳስ ያርሻና ኮዪዴስ።

¹⁴ሃዋሬቲ ባርናባሲኔ ጳዉሎሲ ሄሳ ሲዪዳ ማላ ባ ማይዖ ዳኪዲ ጌዴ ዴሬዛ ጊዶ ዎፂዳ፤ ባ ቃላ ꬎቁ ሂስቲዲ ሂዝጊዳ፤

¹⁵“ሃይቶ ኣሳቶ! ሃይሳ ኣዛስ ኦꬄቲ? ኑካ ኢንቴ ማላ ኣሳኮ! ኢንቴካ ቃሴ ሃይሳ ሜላ ሃዳ ዮዖፔ ሃኪዲ ሳሎኔ ሳዓ፥ ኣባካ፥ ኣባታ ጊዶን ዲዛይታ ዉርሲ ሜꬊዳ ዴዖ ፆሳኮ ኢንቴ ሲማና ማላ ኢንቴስ ሚሺራቾ ቃላ ሳባኮስ።

¹⁶ኢዚ ካሴ ኣꬊዳ ዬሌቴꬃይኔ ዴሬይ ዉሪካ ባ ኮይዳ ማላ ሃናናስ ዬዲ ቤሲዴስ።

¹⁷ጊዶ ኣቲን ፆሲ ሳሎፔ ኢራኔ ሄሳꬆካ ካꬂ ካፂዛ ዎዴታ ኢሚዲ ኢንቴ ዎዝና ካꬃኒኔ ኡፋይሳ ኩንꬂዴስ፤ ኡፋይሳካ ኢንቴና ካልꬂዲ ሎዖ ኦሶን ባና ማርካይ ባይንዳ ኣጊቤና” ጊዳ።

¹⁸ሄሳ ዉርሲ ሃሳዪዲ ኣሳይ ኢስታስ ያርሾንታ ማላ ዋይዲ ዲጊዳ።

¹⁹ኣይሁዳቲ ቃስ ኣንፆኪያፔኔ ኢቆኒዮኔፔ ዪዳ ኣሳይ ኣሳ ዞሪዲ ጳዉሎሳ ሹቻን ጫዳና ማላ ኣማንꬂዳ። ጳዉሎሳካ ሹቻን ጫዲዲኔ ሃይቂዴስ ጊ ጎቺዲ ካታማፔ ጌዴ ካሬ ኬሲዳ።

²⁰ጊዶ ኣቲን ኣማኒዛይቲ ኢዛ ዩዪ ኣꬊ ናጊሺን ጳዉሎሲ ዴንዲዲ ጌዴ ካታማ ጌሊዴስ። ዎንቴꬃ ጋላስ ባርናባሳራ ኢሲፌ ዴርቤኔ ጌቴቲዛሶ ቢዳ።

²¹ጳዉሎሲኔ ባርናባሲ ዳርቤን ሚሺራቾ ቃላ ሳባኪዳ ዳሮ ኣሳ ኣማንꬂዳፔ ጉዬ ጌዴ ሊስቲራ፥ ኢቆኒዮኔኔ ኣንፆኪያ ሲሚዳ።

²²ኣማንዛይታ ዎዝና ሚንꬄꬂሼ ኢስቲ ኣማኖን ሚኒ ዳና ማላ ዞሪሼ “ኑ ፆሳ ካዎቴꬅ ጌላናስ ዳሮ ሜቶ ጊዶራ ኣꬋናስ ኮሼስ” ጊዳ።