ሃዋሬታ ኦሱዋ 5:15-25

¹⁵ሄሳ ጊሾ፥ ኣሳይ ሃርጋንቾታ ሃላኒኔ ኣልጋን ቶኪዲ ጴፂሮሲ ኣꬊያ ዎዴ ኢያ ኩያይ ኤንታፌ ኢሶታ ኢሶታ ቦላ ሼምፓና ሜላ ኦጌ ዶናን ኬሲዲ ዎꬆሶና።

¹⁶ቃሲ ዳሮ ኣሳይ ዬሩሳላሜ ማታን ዴዒያ ካታማታፔ ሃርጋንቾታኔ ቱና ኣያኒ ዋይሲያ ኣሳታ ኤኪዲ ዮሶና፤ ኡባይካ ፓፂዶሶና።

¹⁷ካሂኔ ሃላቃይኔ ኢያራ ዴዒያ ሳዱቃዌቲ ኡባይ ቃናቴን ኩሚዲ ሃዋሬታ ቦላ ዴንዲዶሶና።

¹⁸ሃዋሬታ ኦይኪዲ ዴሪያ ቃሾ ኬꬃን ዬጊዶሶና።

¹⁹ሺን ጎዳ ኪታንቾይ ቃማ ቃሾ ኬꬃ ፔንጊያ ዶዪዲ ሃዋሬታ ካሬ ኬሲዲ፥

²⁰«ቢዲ፥ ፆሳ ኬꬃን ኤቂዲ ሃ ኦራꬃ ዴዖ ቃላ ኣሳ ኡባስ ኦዲቴ» ያጊስ።

²¹ሃዋሬቲ ሄሳ ሲዒዳ ዎዴ ዎንታ ጉራ ፆሳ ኬꬂ ጌሊዲ ታማርሶ ዶሚዶሶና። ካሂኔታ ሃላቃይኔ ኢያራ ዴዔይሳቲ ዪዲ፥ ኢስራዔሌ ጪማታ ኡባ ፄጊ ሺሺዲ ሃዋሬታ ባንታ ሲንꬄ ኤሃና ሜላ ዎታዳሬታ ቃሾ ኬꬂ ኪቲዶሶና።

²²ሺን ዎታዳሬቲ ቃሾ ኬꬂ ቢዲ ሃዋሬታ ዴሚቦኮና። ጉዬ ሲሚ ዪዲ ዴሪያስ፥

²³«ኑኒ ቢያ ዎዴ ቃሾ ኬꬃ ፔንጌይ ሚንꬂ ጎርዴቲን፥ ናጌይሳቲ ፔንጌን ኤቂዳይሳታ ዴሚዳ። ሺን ኑኒ ካሪያ ዶያ ዎዴ ጊዶን ሃሪ ኣቶሺን ኢሲ ኣሲካ ባዋ» ያጊዶሶና።

²⁴ሄሳ ጊሾ፥ ፆሳ ኬꬃ ዎታዳሬታ ኪቴይሲኔ ካሂኔ ሃላቃቲ ሄሳ ሲዒዳ ዎዴ «ሃዋሬታ ቦላ ኣይቢ ሃኒዴ?» ያጊዲ ሂርጊዶሶና።

²⁵ሄ ዎዴ ኢሲ ኣዴይ ኤንታኮ ዪዲ፥ «ሄኮ፥ ቃሾ ኬꬂ ሂንቴ ጌልሲዳ ኣሳቲ ፆሳ ኬꬃን ኤቂዲ ኣሳ ታማርሶሶና» ያጊዲ ኤንታው ኦዲስ።