21 मिनु बाशामी मेको लोव़ नेंशा, रामाह सहर कली बोल्यो सेल्चा प्रोना बाक्त। मिनु तिरचा लेश्शा लमाक्त।
22 मिनु पिप आसामी यहूदा ङा मुर नेल्ल आन कली “बाशामी रामाह कली बोल्यो सेल्चा कली तेल्शो शी फुल्लु चाक्कीन” दे अरेमी बाक्त। मिनु पिप आसामी मेको शी फुल्लुमी बेन्यामीन ङा गेबा नु मिस्पा सहर सेला बाक्त।
23 आसा आ पशो अरु गेय, मेको आ सक्ति, मेको आ पतीके, मेको आ सेल्शो सहर, मार, मेको यहूदा ङा पिप आन इतिहासम ब्रेक्शो मबाक्बा ङा? मिनु मेको खूशो दुम्मेनु, आ खोइल रोइ पवा बाक्त। २इतिहास १६:११-१४
24 मिनु आसा बेक्माक्त। मिनु मेको आ किकी पिपी नु दाऊद आ सहरम थिम्चा पुंइसे बाक्त। मिनु मेको आ पा ङा तौ येहो-शाफात पिप दुम्माक्त। १राजा २२:४१
25 येरोबाम आ तौ नादाब इस्राएल ङा पिप दुम्माक्त। मेना आसा यहूदा ङा पिप दुम्शो बर्स निक्शी दुम्शो बाक्माक्त। मिनु पिप नादाबमी इस्राएलम बर्स निक्शी सासन पवा बाक्त।
26 मेकोम परमप्रभु यावे आ ङोंइती मार मरिम्शो बाक्मे, मेको पवा बाक्त। मेको आ आफोम खोदेंशो पा पाप पा मेको आ लांम गाक्माक्त। मिनु आ आफोमी इस्राएली आन कली पपाइश्शो पाप यो पवा बाक्त। १राजा १२:२८-३०
27 मिनु इस्साकार आ खिं ङा मुर अहीयाह आ तौ बाशाम मेको कली मरिम्शो पचा गोवा बाक्त। मिनु बाशामी मेको कली गिब्बेथोन सहरम तुप्शा सदा बाक्त। मेको गिब्बेथोन सहर नादाब नु इस्राएली नेल्लेम पुम्शा वोइश्शो, पलिस्ती आन सहर बाक्माक्त। यहोसु १९:४४
28 मिनु यहूदा ङा पिप आसा पिप दुम्शो बर्स सां दुम्मेनु, बाशामी नादाब कली सदा बाक्त। मिनु मेको आ पा ङा पिप दुम्माक्त।
29 मिनु मेको पिप दुम चोटीन येरोबाम आ खिं ङा मुर नेल्ल आन कली साइक्मी बाक्त। मेकोम येरोबाम आ खिं ङा सेस बाक्शो नेल्ल आन कली साइक्मी बाक्त। मोपा परमप्रभु यावेमी आ गेय पाइब शिलो ङा अहीयाह रे पा देंशो लोव़ नेल्ल खबा बाक्त। १राजा १४:१०-११
