24 मिनु मोसामी हारून आ तौ आन कली चाक्पाइक्तु। मिनु मेकोमी मेको आन ग्युरा नोफा आन फेनेम, आन ग्युरा गुइ ङा बोंग्ये नु आन ग्युरा खोइल ङा बोंग्येमी ख्रेक्ताक्व। मिनु मोसामी मेको हुश कली चढ़ेतीके आ एर ओंथ ब्रुइक्ताक्व। लेवी १७:११
25 मिनु मेकोमी मेको सांड आ बोंसो, मेको बोंसो पाइश्शो मीलु, गा क्यीम गिल्शो बोंसो, आइदीम क्येप्शो बोंसो, चिच निम्फा नु मेक ङा बोंसो नु ग्युरा फिला लाइक्तु।
26 मिनु परमप्रभु यावे आ ङोंइती बाक्शो बोरब ओख्ती मसुप्शो मार मार आ डालो रे बोरब ओख्ती मसुप्शो हिरशो शोब्ले का, तेलम ख्रुम्शो शोब्ले का नु बाबर का ग्रुंइशा, मेको बोंसो नु ग्युरा फिला तार वोइक्तु।
27 मिनु मेको नेल्ल लाइश्शा हारून नु आ तौ आन गुइमी वोइक्तु। मिनु परमप्रभु यावे आ ङोंइती हिम्शा चढ़ेतीके चढ़ेप्तु।
28 मिनु मोसामी मेको आन गुइ रे लाइश्शा, चोशा चढ़ेशो आ तारी चोप्तु। मेको गेय गोचा कली चढ़ेतीके परमप्रभु यावे कली ब्रोव़शो रिना पाइश्शो मीम चोशा चढ़ेतीक बाक्त।
29 मिनु मोसामी मेको सांड आ कुथ्रु लाइश्शा, परमप्रभु यावे आ ङोंइती हिम्शा चढ़ेतीके चढ़ेप्तु। मेको गेय गोचा कली चढ़ेशो सांड आ श्ये मोसा आ भाग दुम्त। परमप्रभु यावेमी मोसा कली दोदेंशो पा अरेवा, मोदेंशो पा पाप्तु।
