40तर ङाइ परमेश्वरग्याम थेःबा सत्य ताम एनीगदेदा पाङ्मा एनीगदेसे चा ङादा साइबारी म्हाइजी। तर अब्राहामसे मी चुह्रङ्बा गे आलनी।
41एनीगदेला आबासे जुन गे लबा मुबा, थेनोन गे एनीगदेसेनोन लबा मुला।” जमाहेन्से थेनीगदेसे येशूदा “ङनी स्य्हान्दोदेन छ्याम ब्रेल्सी भ्रमा न्हबा कोलागदे आहिन, तर परमेश्वरनोन ङन्ना आबा हिन्ना” भिसी भिजी।
42येशूसे थेनीगदेदा चुह्रङ् भिसी सुङ्जी, “च्यागो, एनीगदेला आबा परमेश्वरनोन हिन्सम एनीगदेसे ङादा माया लसेला मुबा। तिग्दा भिसम परमेश्वरसे पुइखबासे लमा ङा दान्दे चुरी मुला। ङा ह्राङला सुरसे खबा आहिन, तर परमेश्वरसेन ङादा पुइखबा हिन्ना।