4य्हाल तबारी छ्याइबा धुइरी येशू समुन्द्रला कुनीरी राप्सी धन्छ्याबा मुबा। तर चेलागदेसे येशून हिन्ना भिसी ङोआसेनी।
5येशूसे थेनीगदेदा “कोलागदे, एनीगदेदेन छ्याम तार्ङा मुला?” भिसी ङ्योइमा, थेनीगदेसे “आरे” भिसी भिजी।
6येशूसे थेनीगदेदा “एनीगदेसे दोँगाला दाहिनेपट्टि घ्याङ रोप्गो तार्ङा स्याप्ला” भिसी सुङ्जी। थेनीगदेसे येशूसे सुङ्बा ग्लारी घ्याङ रोप्मा ल्हानान तार्ङा स्याप्बासे लमा घ्याङनोन छेङ्बारी आखम्नी।
7येशूसे माया लबा चेलासे पत्रुसदा “थे मी प्रभु गा चीम” भिसी भिजी। “थे मी प्रभु गा चीम” भिबा थेःसी सिमोन पत्रुस ह्राङला क्वान क्रेप्सरी खीसी समुन्द्ररी वाङ्जी। तिग्दा भिसम थेसे क्वान स्युबा मुबा।