11 मिनु इस्राएलीपुकीमी मेकेर बाक्ब मुर नेल्ल आन कली तरवारमी साइक्तेक्म। मेकोपुकीमी नेल्ल आन कली खतम सेल्तेक्म। ब्रोंइशो का कली यो मप्रोनेम। मिनु मेकोपुकीमी हासोर सहरम मी सुइक्ताक्म। यहोसु १०:४०
12 मिनु यहोसुमी मेकेर ङा पिप नेल्ल आन सहर ग्राशा, पिप नेल्ल आन कली साइक्तु। मिनु परमप्रभु यावे आ गेय पाइब मोसामी देंशो खोदेंशो पा नेल्ल आन कली खतम पोक्तु।
13 मिनु इस्राएलीपुकीमी अरु डांडाम बाक्शो सहर आन कली मक्रोदेम। यहोसुमी हासोर सहर कली ला क्रोइक्तु।
14 मिनु इस्राएलीपुकीमी मेको सहर ङा मार मार थोव़क नु बी ब्यफ, क्यारश भेडा आंम कली वोंइसाक्म। तन्न मुर नेल्ल आन कली साइक्तेक्म। नेल्ल आन कली खतम सेल्शा, का कली यो मप्रोनेम। ब्यवस्था २०:१०-१५
