17 ये़सुरे़ कन् पाःन्निन् कुसिङ् निःत्तुआङ् मे़त्तुसि, “खिनिॽ लुम्मो खरे़ःङ् होःप्फाॽआङ् थेआङ् पाःन् के़धक्तिबा? खिनिॽ आल्लसाङ् पाःन् कुसिङ् के़न्निःत्तिन्नाङ्खासिङ् के़न्निःत्तिन्बि? आल्लसाङ् खिनिॽ निङ्वाॽ थुङ्बि?
18 ओमे़प्मा मिक् के़गत्तुम्साङ् के़न्निःसुम्मिन्बि? खे़म्मा ने़क्खोॽ के़गत्तुम्साङ् के़ङ्घे़प्सुम्मिन्बि? खिनिॽ निङ्वाॽ मे़याक्ने़न्बि?
19 इङ्गाॽ ङासि खरे़ःङ्ङिल्ले़ हे़न्छिङ् ङासि (५०००) मनाहाॽ चाःत्तुङ्सिङ्ङिल्ले़ कुजि के़नम्बाहाॽ आक्खे़न् नइमा के़भुक्खुम्बे?” खे़ङ्हाॽरे़ नोगप् मे़बिरु, “थिक्-ने़त्” (१२)॥
20 “हे़क्क्याङ् नुसि खरे़ःङ्ङिल्ले़ हे़न्छिङ् लिसि (४०००) मनाहाॽ चाःत्तुङ्सिङ्ङिल्ले़ आक्खे़न् नइमा कुजि के़नम्बाहाॽ के़भुक्खुम्बे?” खे़ङ्हाॽरे़ नोगप् मे़बिरु, “नुसि” (७)॥
21 ये़सुरे़ खे़ङ्हाॽ मे़त्तुसि, “आल्लसाङ् कुसिङ् निःप्मा के़न्छुक्तुम्मिन्बि?”
22 ये़सुःन् नु कुहुॽसाम्बाहाॽ बे़थसेदाओ मे़गे़रे़॥ खे़प्मो मनाहाॽरे़ मिक्फःम्बाधिक् ये़सुरो मे़दारुआङ् “खे़ल्ले़ कुसम्दाङ् के़हुक्किन् ने़स्से़ॽआङ् खानिःमा के़सुक्पा चोगे़ॽओ” फाॽआङ् पेलि मे़भाक्तुरो॥
23 हे़क्क्याङ् ये़सुरे़ खे़न् मिक्फःम्बे़न् कुहुक्को ते़म्सुआङ् पाङ्भेॽओलाम् लाःक्कात् तेॽरु, हे़क्क्याङ् कुध्याःत्तिन् कुमिक्को फत्छुर कुहुक्किन् ने़स्सुबिरुआङ् सेःन्दोसु, “आल्लो खानिःमा के़सुक्तुबि?”
