Yabura 68:2-25 in Susu

² Ala xa keli, a yaxuie xa yensen yɛ. Naxee a xɔnma, e xa e gi a ya ra.

³ I i yaxuie ralɔɛma nɛ alɔ foye tɛ tuuri ralɔɛma ki naxɛ. Kaafiri lɔɛma nɛ Ala ya i, alɔ ture xunuma tɛ i ki naxɛ.

⁴ Kɔnɔ mixi tinxinxi ɲɛlɛxinma nɛ, e e sɛɛwɛ xui itema nɛ Ala ya i. E tan luma na ɲɛlɛxinyi nan kui.

⁵ Won xa bɛɛti ba Ala bɛ, won xa a xili matɔxɔ bɛɛti ra. Naxan ɲɛrɛma nuxui fari, won xa a rasɛnɛ. A xili Alatala. Won xa won sɛɛwɛ xui rate a ma.

⁶ Ala, misikiinɛ baba nan a ra. Ala, kaaɲɛ makantɛ nan a ra. Ala xɔnyi sɛniyɛn.

⁷ Ala denbaya fima denbayatare ma, Ala xɔrɛya fima geelimanie ma, e ɲɛlɛxinma nɛ. Kɔnɔ Ala matandie luma nɛ gbengberenyi ma.

⁸ Ala, i nu na i xa ɲama ya ra wula i tɛmui naxɛ,

⁹ bɔxi birin nu sɛrɛnma nɛ. Tunɛ ye nu goroma Ala ya i, Isirayila Marigi Ala, naxan na Siyoni.

¹⁰ Ala nu tunɛ ye ragoroma bɔxi ma, a xa sɛnbɛ fi a xa bɔxi taganxi ma.

¹¹ I bara i xa ɲama rasabati naa. I bara tɔɔrɔmixi mali naa. I na birin nabaxi nɛ barima i fan.

¹² Marigi masenyi fanyi soma a xa xɛɛrae yi ra. Gali belebele nan e ra. E naxɛ,

¹³ «Geresoe mangɛe na e gife, e na e gife wo ya ra. Wo xa ginɛe naxee luxi banxi, e fama yi gere naafuli itaxunde.

¹⁴ Wo fama wo malabude wo xa xurusee fɛ ma. Ala mɛɛnima nɛ a xa ɲama ma alɔ a mɛɛnima ganbɛe ma ki naxɛ. E gabutenyi luma alɔ gbeti nun xɛɛma nan na e ma.»

¹⁵ Ala Xili Xungbe Kanyi bara mangɛe rayensen Salamon geya ma balabalanyi saabui ra.

¹⁶ Basan geya, Ala naxan daaxi, konde wuyaxi naxan bɛ,

¹⁷ wo na Ala xa geya sugandixi matofe tɔɔnɛ ra munfe ra, a bara a xa hɔrɔmɔlingira ti dɛnnaxɛ? Ala luma nɛ mɛnni tɛmui birin.

¹⁸ Alatala xa geresoe xa gisee wuya dangi wulu fu ra. A xa geresoe fan dangi wulu wulue ra. Ala na e ya ma. Sinayi geya na yire sɛniyɛnxi kui.

¹⁹ N Marigi Alatala, i bara te koore ma. I bara geelimanie xanin. Adamadie bara i buɲa, matandilae fan bara wa sofe i xɔnyi.

²⁰ Tantui na i bɛ lɔxɔɛ birin, a won ma kote xaninfe lɔxɔ yo lɔxɔ. Won ma marakisima na Ala nan na.

²¹ Won Marigi Alatala won nakelima nɛ faxɛ ma. Won ma marakisima na Ala nan na.

²² Ala a yaxuie xunyi kanama nɛ. Naxee ɲɛrɛ kira ɲaaxi xɔn ma, a nee fan xun xɔri bɔɔma nɛ.

²³ Marigi naxɛ, «N fama nɛ e ra kelife Basan, n fa e ra kelife baa ma,

²⁴ alako wo xa fa e wuli to wo sanlaabe ra. Wo xa baree fan e donma nɛ.»

²⁵ Ala, muxu bara i to fa ra ɲama ya ma. Ala nun a xa mangɛ sugandixi na sofe hɔrɔmɔlingira kui.

² عَلَ شَ كٍلِ، عَ يَشُييٍ شَ يٍنسٍن يّ. نَشٍيٍ عَ شْنمَ، عٍ شَ عٍ فِ عَ يَ رَ.

³ عِ عِ يَشُييٍ رَلْيمَ نّ عَلْ قٌيٍ تّ تُورِ رَلْيمَ كِ نَشّ. كَاقِرِ لْيمَ نّ عَلَ يَ عِ، عَلْ تُرٍ شُنُمَ تّ عِ كِ نَشّ.

⁴ كْنْ مِشِ تِنشِنشِ حّلّشِنمَ نّ، عٍ عٍ سّيوّ شُي عِتٍمَ نّ عَلَ يَ عِ. عٍ تَن لُمَ نَ حّلّشِنيِ نَن كُي.

⁵ وٌن شَ بّيتِ بَ عَلَ بّ، وٌن شَ عَ شِلِ مَتْشْ بّيتِ رَ. نَشَن حّرّ مَ نُشُي قَرِ، وٌن شَ عَ رَ سّنّ. عَ شِلِ عَلَتَلَ. وٌن شَ وٌن سّيوّ شُي رَتٍ عَ مَ.

⁶ عَلَ، مِسِكِينّ بَبَ نَن عَ رَ. عَلَ، كَاحّ مَكَنتّ نَن عَ رَ. عَلَ شْنيِ سّنِيّن.

⁷ عَلَ دٍنبَيَ قِمَ دٍنبَيَتَرٍ مَ، عَلَ شْرّيَ قِمَ فٍيلِمَنِيٍ مَ، عٍ حّلّشِنمَ نّ. كْنْ عَلَ مَتَندِيٍ لُمَ نّ فبٍنفبٍرٍنيِ مَ.

⁸ عَلَ، عِ نُ نَ عِ شَ حَمَ يَ رَ وُلَ عِ تّمُي نَشّ،

⁹ بْشِ بِرِن نُ سّرّنمَ نّ. تُنّ يٍ نُ فٌرٌ مَ عَلَ يَ عِ، عِسِرَيِلَ مَرِفِ عَلَ، نَشَن نَ سِيٌنِ.

¹⁰ عَلَ نُ تُنّ يٍ رَفٌرٌ مَ بْشِ مَ، عَ شَ سّنبّ قِ عَ شَ بْشِ تَفَنشِ مَ.

¹¹ عِ بَرَ عِ شَ حَمَ رَ سَبَتِ نَا. عِ بَرَ تْورْ مِشِ مَلِ نَا. عِ نَ بِرِن نَبَشِ نّ بَرِ مَ عِ قَن.

¹² مَرِفِ مَسٍنيِ قَنيِ سٌمَ عَ شَ شّيرَيٍ يِ رَ. فَلِ بٍلٍبٍلٍ نَن عٍ رَ. عٍ نَشّ،

¹³ «فٍرٍ سٌي مَنفّيٍ نَ عٍ فِقٍ، عٍ نَ عٍ فِقٍ وٌ يَ رَ. وٌ شَ فِنّيٍ نَشٍيٍ لُشِ بَنشِ، عٍ قَمَ يِ فٍرٍ نَاقُلِ عِتَشُندٍ.

¹⁴ وٌ قَمَ وٌ مَلَبُدٍ وٌ شَ شُرُ سٍيٍ قّ مَ. عَلَ مّينِمَ نّ عَ شَ حَمَ مَ عَلْ عَ مّينِمَ فَنبّيٍ مَ كِ نَشّ. عٍ فَبُتٍنيِ لُمَ عَلْ فبٍتِ نُن شّيمَ نَن نَ عٍ مَ.»

¹⁵ عَلَ شِلِ شُنفبٍ كَنيِ بَرَ مَنفّيٍ رَيٍنسٍن سَلَمٌن فٍيَ مَ بَلَبَلَنيِ سَابُي رَ.

¹⁶ بَسَن فٍيَ، عَلَ نَشَن دَاشِ، كٌندٍ وُيَشِ نَشَن بّ،

¹⁷ وٌ نَ عَلَ شَ فٍيَ سُفَندِشِ مَتٌقٍ تْونّ رَ مُنقٍ رَ، عَ بَرَ عَ شَ هْرْ مْلِنفِرَ تِ دّننَشّ؟ عَلَ لُمَ نّ مّننِ تّمُي بِرِن.

¹⁸ عَلَتَلَ شَ فٍرٍ سٌي شَ فِسٍيٍ وُيَ دَنفِ وُلُ قُ رَ. عَ شَ فٍرٍ سٌي قَن دَنفِ وُلُ وُلُيٍ رَ. عَلَ نَ عٍ يَ مَ. سِنَيِ فٍيَ نَ يِرٍ سّنِيّنشِ كُي.

¹⁹ ﭑ مَرِفِ عَلَتَلَ، عِ بَرَ تٍ كٌورٍ مَ. عِ بَرَ فٍيلِمَنِيٍ شَنِن. عَدَ مَدِيٍ بَرَ عِ بُحَ، مَتَندِلَيٍ قَن بَرَ وَ سٌقٍ عِ شْنيِ.

²⁰ تَنتُي نَ عِ بّ لْشْي بِرِن، عَ وٌن مَ كٌتٍ شَنِنقٍ لْشْ يٌ لْشْ. وٌن مَ مَرَكِسِمَ نَ عَلَ نَن نَ.

²¹ وٌن مَرِفِ عَلَتَلَ وٌن نَكٍلِمَ نّ قَشّ مَ. وٌن مَ مَرَكِسِمَ نَ عَلَ نَن نَ.

²² عَلَ عَ يَشُييٍ شُنيِ كَنَمَ نّ. نَشٍيٍ حّرّ كِرَ حَاشِ شْن مَ، عَ نٍيٍ قَن شُن شْرِ بْو مَ نّ.

²³ مَرِفِ نَشّ، «ﭑ قَمَ نّ عٍ رَ كٍلِقٍ بَسَن، ﭑ قَ عٍ رَ كٍلِقٍ بَا مَ،

²⁴ عَلَكٌ وٌ شَ قَ عٍ وُلِ تٌ وٌ سَنلَابٍ رَ. وٌ شَ بَرٍيٍ قَن عٍ دٌنمَ نّ.»

²⁵ عَلَ، مُشُ بَرَ عِ تٌ قَ رَ حَمَ يَ مَ. عَلَ نُن عَ شَ مَنفّ سُفَندِشِ نَ سٌقٍ هْرْ مْلِنفِرَ كُي.