Kɔnti tife 21:1-17 in Susu

¹ Aradi mangɛ Kanaanka, naxan nu sabatixi Negewi bɔxi ma, a to a mɛ, a Isirayila nu minife Atarima kira nan na, a naxa e gere, a ndee findi geelimanie ra.

² Na kui Isirayila naxa yi laayidi tongo Alatala bɛ, «Xa i yi mixie sa muxu sagoe, muxu e xa taa birin kanama nɛ.»

³ Alatala naxa tin Isirayilakae xa laayidi ra, a naxa Kanaankae sa e sagoe. Isirayilakae naxa e sɔntɔ, e e xa taae kana. Na nan a toxi e naxa mɛnni xili sa Horoma, naxan wama a falafe «gbaloe.»

⁴ Isirayilakae naxa keli Horo geya ma Xulunyumi Baa kira xɔn ma, alako e xa Edon bɔxi mabilin. Kɔnɔ limaniya naxa ba e yi ra,

⁵ e fa a fala Alatala nun Munsa bɛ, «Munfe ra wo muxu raminixi Misira bɔxi ra, alako muxu xa fa faxa gbengberenyi ma? Taami mu na be, ye mu na be, fo yi donse ɲaaxi naxan goroma koore ma!»

⁶ Na kui Alatala naxa a niya bɔximasee xa mini e tagi, e xa mixie xin, e mixi gbegbe faxa.

⁷ Ɲama naxa a fala Munsa bɛ, «Muxu bara yunubi raba wɔyɛnfe ra i tan nun Alatala ma. I xa Alatala maxandi muxu bɛ, a xa yi bɔximasee makuya muxu ra.» Munsa naxa tin na ra, a Alatala maxandi ɲama bɛ.

⁸ Alatala naxa a yaabi, «Bɔximase misaali rafala wure gbeeli ra, a gbaku wuri kuye ra. Mixi xinxi naxan a ya tima na ra, a mu faxama.»

⁹ Munsa naxa bɔximase yailan wure gbeeli ra, a a gbaku wuri kuye ra. Na tɛmui bɔximasee mixi naxee xinxi, e nu nɔma e ya tide na ra, e kisi.

¹⁰ Isirayilakae naxa siga, e sa yonkin Oboti.

¹¹ E naxa keli mɛnni, e siga Iye Abarimi gbengberenyi ma naxan ya rafindixi Mowaba bɔxi ma, sogetede mabiri.

¹² E to keli mɛnni, e naxa siga Serede gulunba yire.

¹³ E to keli mɛnni, e naxa siga Arinon dɛ ra, xure naxan na Amori bɔxi ma. Arinon nan na naaninyi ra Mowabakae nun Amorikae tagi.

¹⁴ Na nan a ra, a sɛbɛxi sɛbɛli nde kui, Alatala xa geree xa fe na naxan kui, «Wahebi nun a xa gulunbae na Sufa bɔxi ma,

¹⁵ Arinon gulunbae gexi han Ari, a findi Mowaba naaninyi nan na.»

¹⁶ E to keli, e naxa siga Beeri, Alatala a masen Munsa bɛ dɛnnaxɛ, «Ɲama malan, n xa e ki ye ra.»

¹⁷ Isirayilakae yi suuki ba na waxati nɛ: «Ye xa te kɔlɔnyi ra! Wo xa bɛɛti ba a xa fe ra!

¹ عَرَدِ مَنفّ كَنَانكَ، نَشَن نُ سَبَتِشِ نٍفٍوِ بْشِ مَ، عَ تٌ عَ مّ، عَ عِسِرَيِلَ نُ مِنِقٍ عَتَرِ مَ كِرَ نَن نَ، عَ نَشَ عٍ فٍرٍ، عَ ندٍيٍ قِندِ فٍيلِمَنِيٍ رَ.

² نَ كُي عِسِرَيِلَ نَشَ يِ لَايِدِ تٌنفٌ عَلَتَلَ بّ، «شَ عِ يِ مِشِيٍ سَ مُشُ سَفٌي، مُشُ عٍ شَ تَا بِرِن كَنَمَ نّ.»

³ عَلَتَلَ نَشَ تِن عِسِرَيِلَكَيٍ شَ لَايِدِ رَ، عَ نَشَ كَنَانكَيٍ سَ عٍ سَفٌي. عِسِرَيِلَكَيٍ نَشَ عٍ سْنتْ، عٍ عٍ شَ تَايٍ كَنَ. نَ نَن عَ تٌشِ عٍ نَشَ مّننِ شِلِ سَ هٌرٌ مَ، نَشَن وَ مَ عَ قَلَقٍ «فبَلٌي.»

⁴ عِسِرَيِلَكَيٍ نَشَ كٍلِ هٌرٌ فٍيَ مَ شُلُنيُمِ بَا كِرَ شْن مَ، عَلَكٌ عٍ شَ عٍدٌن بْشِ مَبِلِن. كْنْ لِمَنِيَ نَشَ بَ عٍ يِ رَ،

⁵ عٍ قَ عَ قَلَ عَلَتَلَ نُن مُنسَ بّ، «مُنقٍ رَ وٌ مُشُ رَ مِنِشِ مِسِرَ بْشِ رَ، عَلَكٌ مُشُ شَ قَ قَشَ فبٍنفبٍرٍنيِ مَ؟ تَامِ مُ نَ بٍ، يٍ مُ نَ بٍ، قٌ يِ دٌنسٍ حَاشِ نَشَن فٌرٌ مَ كٌورٍ مَ!»

⁶ نَ كُي عَلَتَلَ نَشَ عَ نِيَ بْشِمَسٍيٍ شَ مِنِ عٍ تَفِ، عٍ شَ مِشِيٍ شِن، عٍ مِشِ فبٍفبٍ قَشَ.

⁷ حَمَ نَشَ عَ قَلَ مُنسَ بّ، «مُشُ بَرَ يُنُبِ رَبَ وْيّنقٍ رَ عِ تَن نُن عَلَتَلَ مَ. عِ شَ عَلَتَلَ مَشَندِ مُشُ بّ، عَ شَ يِ بْشِمَسٍيٍ مَكُيَ مُشُ رَ.» مُنسَ نَشَ تِن نَ رَ، عَ عَلَتَلَ مَشَندِ حَمَ بّ.

⁸ عَلَتَلَ نَشَ عَ يَابِ، «بْشِمَسٍ مِسَالِ رَقَلَ وُرٍ فبٍيلِ رَ، عَ فبَكُ وُرِ كُيٍ رَ. مِشِ شِنشِ نَشَن عَ يَ تِمَ نَ رَ، عَ مُ قَشَمَ.»

⁹ مُنسَ نَشَ بْشِمَسٍ يَءِلَن وُرٍ فبٍيلِ رَ، عَ عَ فبَكُ وُرِ كُيٍ رَ. نَ تّمُي بْشِمَسٍيٍ مِشِ نَشٍيٍ شِنشِ، عٍ نُ نْمَ عٍ يَ تِدٍ نَ رَ، عٍ كِسِ.

¹⁰ عِسِرَيِلَكَيٍ نَشَ سِفَ، عٍ سَ يٌنكِن عٌبٌتِ.

¹¹ عٍ نَشَ كٍلِ مّننِ، عٍ سِفَ عِيٍ عَبَرِ مِ فبٍنفبٍرٍنيِ مَ نَشَن يَ رَقِندِشِ مٌوَبَ بْشِ مَ، سٌفٍتٍدٍ مَبِرِ.

¹² عٍ تٌ كٍلِ مّننِ، عٍ نَشَ سِفَ سٍرٍدٍ فُلُنبَ يِرٍ.

¹³ عٍ تٌ كٍلِ مّننِ، عٍ نَشَ سِفَ عَرِنٌن دّ رَ، شُرٍ نَشَن نَ عَمٌرِ بْشِ مَ. عَرِنٌن نَن نَ نَانِنيِ رَ مٌوَبَكَيٍ نُن عَمٌرِكَيٍ تَفِ.

¹⁴ نَ نَن عَ رَ، عَ سّبّشِ سّبّلِ ندٍ كُي، عَلَتَلَ شَ فٍرٍيٍ شَ قٍ نَ نَشَن كُي، «وَهٍبِ نُن عَ شَ فُلُنبَيٍ نَ سُقَ بْشِ مَ،

¹⁵ عَرِنٌن فُلُنبَيٍ فٍشِ هَن عَرِ، عَ قِندِ مٌوَبَ نَانِنيِ نَن نَ.»

¹⁶ عٍ تٌ كٍلِ، عٍ نَشَ سِفَ بٍيرِ، عَلَتَلَ عَ مَسٍن مُنسَ بّ دّننَشّ، «حَمَ مَلَن، ﭑ شَ عٍ كِ يٍ رَ.»

¹⁷ عِسِرَيِلَكَيٍ يِ سُوكِ بَ نَ وَشَتِ نّ؛ «يٍ شَ تٍ كْلْنيِ رَ! وٌ شَ بّيتِ بَ عَ شَ قٍ رَ!