Kiitisae 1:3-12 in Susu

³ Yuda bɔnsɔɛ naxa a fala e ngaxakerenyi Simeyɔnkae bɛ, «Won birin xa siga e dɛnnaxɛ soxi muxu yi ra, won xa sa Kanaankae gere. Na dangi xanbi, won birin nan sigama e dɛnnaxɛ soxi wo tan fan yi ra.» Simeyɔn bɔnsɔɛ naxa tin na ra.

⁴ Yudayakae to te, Alatala naxa Kanaankae nun Perisikae sa e sagoe. E naxa xɛmɛ wulu fu faxa Beseki.

⁵ Na kui e naxa Kanaankae nun Perisikae bɔnbɔ. E to Beseki mangɛ li naa, e naxa na fan gere.

⁶ A naxa a gi, kɔnɔ e naxa bira a fɔxɔ ra han e naxa a suxu, e fa a bɛlɛxɛkurae nun a sankurae mabolon.

⁷ Adoni Beseki naxa a fala, «Tɛmui dangixi, n tan bara mangɛ tongo solofere suxu, n e bɛlɛxɛkurae nun e sankurae bolon. E naxa e dɛge donse ra naxan nu birama n dɛgede. Yakɔsi Ala na na sare ragbilenfe n ma.» E naxa a xanin Darisalamu, a naxa faxa mɛnni.

⁸ Yuda bɔnsɔɛ naxa Darisalamu gere. E to a suxu, e naxa mɛnnikae sɔntɔ santidɛgɛma ra, e taa gan.

⁹ Na dangi xanbi, e man naxa goro Kanaankae gerede, naxee nu sabatixi Isirayila geyae fari, Negewi gbengberenyi nun Sefela bɔxi mabiri.

¹⁰ Yuda bɔnsɔɛ naxa siga Kanaankae gerede, naxee nu sabatixi Hebiron, dɛnnaxɛ xili nu falama singe ra nu Kiriyati Ariba. E naxa Sɛsayi, Aximan, nun Talama bɔnbɔ.

¹¹ E naxa keli mɛnni sigafe ra Debirikae gerede, dɛnnaxɛ xili nu falama singe ra nu Kiriyati Sifa.

¹² Kalebi naxa a masen, «Mixi naxan Kiriyati Sifa masɔtɔma n bɛ, n nan ma di ginɛ Akasa fima nɛ na kanyi ma, a findi a xa ginɛ ra.»

³ يُدَ بْنسْي نَشَ عَ قَلَ عٍ نفَشَكٍرٍنيِ سِمٍيْنكَيٍ بّ، «وٌن بِرِن شَ سِفَ عٍ دّننَشّ سٌشِ مُشُ يِ رَ، وٌن شَ سَ كَنَانكَيٍ فٍرٍ. نَ دَنفِ شَنبِ، وٌن بِرِن نَن سِفَمَ عٍ دّننَشّ سٌشِ وٌ تَن قَن يِ رَ.» سِمٍيْن بْنسْي نَشَ تِن نَ رَ.

⁴ يُدَيَكَيٍ تٌ تٍ، عَلَتَلَ نَشَ كَنَانكَيٍ نُن ثٍرِ سِكَيٍ سَ عٍ سَفٌي. عٍ نَشَ شّمّ وُلُ قُ قَشَ بٍسٍكِ.

⁵ نَ كُي عٍ نَشَ كَنَانكَيٍ نُن ثٍرِ سِكَيٍ بْنبْ. عٍ تٌ بٍسٍكِ مَنفّ لِ نَا، عٍ نَشَ نَ قَن فٍرٍ.

⁶ عَ نَشَ عَ فِ، كْنْ عٍ نَشَ بِرَ عَ قْشْ رَ هَن عٍ نَشَ عَ سُشُ، عٍ قَ عَ بّلّشّكُرَيٍ نُن عَ سَنكُرَيٍ مَبٌلٌن.

⁷ عَدٌنِ بٍسٍكِ نَشَ عَ قَلَ، «تّمُي دَنفِشِ، ﭑ تَن بَرَ مَنفّ تٌنفٌ سٌلٌقٍرٍ سُشُ، ﭑ عٍ بّلّشّكُرَيٍ نُن عٍ سَنكُرَيٍ بٌلٌن. عٍ نَشَ عٍ دّفٍ دٌنسٍ رَ نَشَن نُ بِرَ مَ ﭑ دّفٍدٍ. يَكْسِ عَلَ نَ نَ سَرٍ رَفبِلٍنقٍ ﭑ مَ.» عٍ نَشَ عَ شَنِن دَرِ سَلَمُ، عَ نَشَ قَشَ مّننِ.

⁸ يُدَ بْنسْي نَشَ دَرِ سَلَمُ فٍرٍ. عٍ تٌ عَ سُشُ، عٍ نَشَ مّننِكَيٍ سْنتْ سَنتِدّفّمَ رَ، عٍ تَا فَن.

⁹ نَ دَنفِ شَنبِ، عٍ مَن نَشَ فٌرٌ كَنَانكَيٍ فٍرٍدٍ، نَشٍيٍ نُ سَبَتِشِ عِسِرَيِلَ فٍيَيٍ قَرِ، نٍفٍوِ فبٍنفبٍرٍنيِ نُن سٍقٍلَ بْشِ مَبِرِ.

¹⁰ يُدَ بْنسْي نَشَ سِفَ كَنَانكَيٍ فٍرٍدٍ، نَشٍيٍ نُ سَبَتِشِ هٍبِرٌن، دّننَشّ شِلِ نُ قَلَمَ سِنفٍ رَ نُ كِرِيَتِ عَرِبَ. عٍ نَشَ سّسَيِ، عَشِمَن، نُن تَلَمَ بْنبْ.

¹¹ عٍ نَشَ كٍلِ مّننِ سِفَقٍ رَ دٍبِرِكَيٍ فٍرٍدٍ، دّننَشّ شِلِ نُ قَلَمَ سِنفٍ رَ نُ كِرِيَتِ سِقَ.

¹² كَلٍبِ نَشَ عَ مَسٍن، «مِشِ نَشَن كِرِيَتِ سِقَ مَسْتْمَ ﭑ بّ، ﭑ نَن مَ دِ فِنّ عَكَسَ قِمَ نّ نَ كَنيِ مَ، عَ قِندِ عَ شَ فِنّ رَ.»