Isirayila Mangɛe I 7:35-51 in Susu

³⁵ Se digilinxi nde nu na ye sase dɔxɔde kui. Na ite sanbunyi bɛ ɲɔngɔn ya keren. Sanbunyie fuge, a kilɔndee nun a wure ralɛnfɛtɛnxie birin nu yailanxi wure gbeeli nan na tɛmui kerenyi ra.

³⁶ Malekɛ misaalie, yɛtɛ misaalie, nun tugi misaalie nu yailanxi na kebelae ma, nun se gbɛtɛe.

³⁷ Ye maxanin se fu nu yailanxi ki kerenyi ra na ki nɛ wure gbeeli ra. E birin nu lan.

³⁸ Xirami ye sase fu yailan nɛ wure gbeeli ra, naxee nu dɔxɔxi na ye maxanin se fu fari. Ye litiri wulu keren kɛmɛ senni ɲɔndɔn nu sama kankan kui. Ye sase nu igbo ɲɔngɔn ya naani.

³⁹ A naxa ye maxanin see dɔxɔ Alatala xa hɔrɔmɔbanxi sɛɛtie ma, suuli kɔɔla biri, suuli yirefanyi biri. Na ye sase belebele naxan nu xili «Baa,» a naxa na dɔxɔ banxi yirefanyi ma, a makɔrɛ a sogetede biri ra.

⁴⁰ Xurami naxa ye sasee, tɛ xube kɔ see nun tundee yailan. Na kui, Xurami naxa gɛ mangɛ Sulemani xa walie ra Ala xa hɔrɔmɔbanxi xa fe ra. Na walie nan ya:

⁴¹ kinki firinyie, e xunyi tofanxie, se raxunmase naxee e fari,

⁴² kɔɔbɛ bogi maniyɛ kɛmɛ naani gbakuxi e ra, kɔɔbɛ bogi maniyɛ safɛ firin se raxunmase keren ma kinkie xunyi ra,

⁴³ sunbui maxanin se fu,

⁴⁴ ye sase xungbe naxan xili «Baa,» ninge fu nun firin misaali naxee na ye sase xungbe bun ma,

⁴⁵ tundee, pelie, paanie. Xurami se naxee birin yailan mangɛ Sulemani bɛ Alatala xa banxi xa fe ra, a e yailan wure gbeeli raxunuxi nan na.

⁴⁶ Mangɛ nu na yɔxui raxunu Yurudɛn mɛrɛ yire nɛ, Sukɔti nun Saratan tagi.

⁴⁷ Mangɛ Sulemani na birin yailan wure gbeeli nan na, naxan xa gboe xasabi mu nu nɔma kolonde.

⁴⁸ Sulemani se gbegbe yailan nɛ Ala xa banxi bɛ, alɔ sɛrɛxɛbade xɛɛma daaxi, teebili xɛɛma daaxi nde taami sɛrɛxɛ sama dɛnnaxɛ,

⁴⁹ lanpui dɔxɔ se xɛɛma daaxie naxee dɛxɛma Yire Sɛniyɛnxi kui sɛriyɛ ki ma, a fuge misaalixie, lanpuie, tɛ xube kɔ se xɛɛma daaxie,

⁵⁰ paanie, finɛe, pɔɔti tofanyie, piletie, kolopɔɔti xɛɛma fanyi daaxie, Ala xa hɔrɔmɔbanxi xa naadɛe gbaku se xɛɛma daaxie, naxee nu na Yire Sɛniyɛnxi Fisamante sode dɛ ra nun hɔrɔmɔbanxi sode dɛ ra.

⁵¹ Sulemani Alatala xa hɔrɔmɔbanxi xa see yailan xɛɛma ra na ki nɛ. A to gɛ na ra, a naxa se birin naso Alatala xa hɔrɔmɔbanxi xa naafuli ragatade kui, a baba Dawuda naxee fixi Ala ma.

³⁵ سٍ دِفِلِنشِ ندٍ نُ نَ يٍ سَسٍ دْشْدٍ كُي. نَ عِتٍ سَنبُنيِ بّ حْنفْن يَ كٍرٍن. سَنبُنيِيٍ قُفٍ، عَ كِلْندٍيٍ نُن عَ وُرٍ رَلّنقّتّنشِيٍ بِرِن نُ يَءِلَنشِ وُرٍ فبٍيلِ نَن نَ تّمُي كٍرٍنيِ رَ.

³⁶ مَلٍكّ مِسَالِيٍ، يّتّ مِسَالِيٍ، نُن تُفِ مِسَالِيٍ نُ يَءِلَنشِ نَ كٍبٍلَيٍ مَ، نُن سٍ فبّتّيٍ.

³⁷ يٍ مَشَنِن سٍ قُ نُ يَءِلَنشِ كِ كٍرٍنيِ رَ نَ كِ نّ وُرٍ فبٍيلِ رَ. عٍ بِرِن نُ لَن.

³⁸ شِرَ مِ يٍ سَسٍ قُ يَءِلَن نّ وُرٍ فبٍيلِ رَ، نَشٍيٍ نُ دْشْشِ نَ يٍ مَشَنِن سٍ قُ قَرِ. يٍ لِتِرِ وُلُ كٍرٍن كّمّ سٍننِ حْندْن نُ سَمَ كَنكَن كُي. يٍ سَسٍ نُ عِفبٌ حْنفْن يَ نَانِ.

³⁹ عَ نَشَ يٍ مَشَنِن سٍيٍ دْشْ عَلَتَلَ شَ هْرْ مْبَنشِ سّيتِيٍ مَ، سُولِ كْولَ بِرِ، سُولِ يِرٍقَنيِ بِرِ. نَ يٍ سَسٍ بٍلٍبٍلٍ نَشَن نُ شِلِ «بَا،» عَ نَشَ نَ دْشْ بَنشِ يِرٍقَنيِ مَ، عَ مَكْرّ عَ سٌفٍتٍدٍ بِرِ رَ.

⁴⁰ شُرَ مِ نَشَ يٍ سَسٍيٍ، تّ شُبٍ كْ سٍيٍ نُن تُندٍيٍ يَءِلَن. نَ كُي، شُرَ مِ نَشَ فّ مَنفّ سُلٍمَنِ شَ وَلِيٍ رَ عَلَ شَ هْرْ مْبَنشِ شَ قٍ رَ. نَ وَلِيٍ نَن يَ؛

⁴¹ كِنكِ قِرِنيِيٍ، عٍ شُنيِ تٌقَنشِيٍ، سٍ رَشُنمَسٍ نَشٍيٍ عٍ قَرِ،

⁴² كْوبّ بٌفِ مَنِيّ كّمّ نَانِ فبَكُشِ عٍ رَ، كْوبّ بٌفِ مَنِيّ سَقّ قِرِن سٍ رَشُنمَسٍ كٍرٍن مَ كِنكِيٍ شُنيِ رَ،

⁴³ سُنبُي مَشَنِن سٍ قُ،

⁴⁴ يٍ سَسٍ شُنفبٍ نَشَن شِلِ «بَا،» نِنفٍ قُ نُن قِرِن مِسَالِ نَشٍيٍ نَ يٍ سَسٍ شُنفبٍ بُن مَ،

⁴⁵ تُندٍيٍ، ثٍلِيٍ، ثَانِيٍ. شُرَ مِ سٍ نَشٍيٍ بِرِن يَءِلَن مَنفّ سُلٍمَنِ بّ عَلَتَلَ شَ بَنشِ شَ قٍ رَ، عَ عٍ يَءِلَن وُرٍ فبٍيلِ رَشُنُشِ نَن نَ.

⁴⁶ مَنفّ نُ نَ يْشُي رَشُنُ يُرُدّن مّرّ يِرٍ نّ، سُكْتِ نُن سَرَتَن تَفِ.

⁴⁷ مَنفّ سُلٍمَنِ نَ بِرِن يَءِلَن وُرٍ فبٍيلِ نَن نَ، نَشَن شَ فبٌي شَسَبِ مُ نُ نْمَ كٌلٌندٍ.

⁴⁸ سُلٍمَنِ سٍ فبٍفبٍ يَءِلَن نّ عَلَ شَ بَنشِ بّ، عَلْ سّرّشّبَدٍ شّيمَ دَاشِ، تٍيبِلِ شّيمَ دَاشِ ندٍ تَامِ سّرّشّ سَمَ دّننَشّ،

⁴⁹ لَنثُي دْشْ سٍ شّيمَ دَاشِيٍ نَشٍيٍ دّشّمَ يِرٍ سّنِيّنشِ كُي سّرِيّ كِ مَ، عَ قُفٍ مِسَالِشِيٍ، لَنثُييٍ، تّ شُبٍ كْ سٍ شّيمَ دَاشِيٍ،

⁵⁰ ثَانِيٍ، قِنّيٍ، ثْوتِ تٌقَنيِيٍ، ثِلٍتِيٍ، كٌلٌثْوتِ شّيمَ قَنيِ دَاشِيٍ، عَلَ شَ هْرْ مْبَنشِ شَ نَادّيٍ فبَكُ سٍ شّيمَ دَاشِيٍ، نَشٍيٍ نُ نَ يِرٍ سّنِيّنشِ قِسَمَنتٍ سٌدٍ دّ رَ نُن هْرْ مْبَنشِ سٌدٍ دّ رَ.

⁵¹ سُلٍمَنِ عَلَتَلَ شَ هْرْ مْبَنشِ شَ سٍيٍ يَءِلَن شّيمَ رَ نَ كِ نّ. عَ تٌ فّ نَ رَ، عَ نَشَ سٍ بِرِن نَسٌ عَلَتَلَ شَ هْرْ مْبَنشِ شَ نَاقُلِ رَفَتَدٍ كُي، عَ بَبَ دَوُدَ نَشٍيٍ قِشِ عَلَ مَ.