Isirayila Mangɛe I 16:2-9 in Susu

² «N bara i tongo duniɲa bɛndɛ fuɲi fari, n i findi n ma ɲama xa mangɛ ra. Kɔnɔ i tan bara bira Yerobowami xa kira fɔxɔ ra, i n ma Isirayila ɲama ti yunubi rabafe ra, naxan bara n naxɔnɔ a ɲaaxi ra.

³ Na kui n i tan Baasa bama nɛ mangɛ ra, alɔ ginɛ a xa banxi kui makɔma ki naxɛ. N i bɔnsɔɛ luma nɛ, alɔ n Nebati xa di Yerobowami bɔnsɔɛ luxi ki naxɛ.

⁴ Baasa bɔnsɔɛ naxan na faxa taa kui, baree nan na donma. Naxan na faxa wula i, xɔnie nan na donma.»

⁵ Baasa xa taruxui dɔnxɔɛ nun a xa gere ki fanyi, birin sɛbɛxi Isirayila mangɛe xa taruxui kui.

⁶ Baasa naxa laaxira, a naxa ragata Tirisa. A xa di Ela naxa ti mangɛ ra a ɲɔxɔɛ ra.

⁷ Alatala a xa masenyi ti nɛ Baasa nun a bɔnsɔɛ bɛ, Xanani xa di Annabi Yehu saabui ra. Na masenyi ti a xa fe ɲaaxie nan ma fe ra, naxee mu rafanxi Alatala ma. A nu bara maniya Yerobowami bɔnsɔɛ ra, a naxan sɔntɔ.

⁸ Asa xa mangɛya ɲɛ mɔxɔɲɛn nun senni nde ra, Baasa xa di Ela naxa ti Isirayila mangɛ ra. A xa mangɛya bu nɛ ɲɛ firin.

⁹ Simiri, a xa sɔɔri mangɛ nde, naxan nu findixi a xa sɔɔri ragisee sɛɛti keren xunyi ra, naxa yanfanteya xiri a xun. Lɔxɔɛ nde Ela nu na Tirisa a siisife Arisa xɔnyi, naxan findi na mangɛ xa banxi kantɛ ra.

² «ﭑ بَرَ عِ تٌنفٌ دُنِحَ بّندّ قُحِ قَرِ، ﭑ عِ قِندِ ﭑ مَ حَمَ شَ مَنفّ رَ. كْنْ عِ تَن بَرَ بِرَ يٍرٌبٌوَ مِ شَ كِرَ قْشْ رَ، عِ ﭑ مَ عِسِرَيِلَ حَمَ تِ يُنُبِ رَبَقٍ رَ، نَشَن بَرَ ﭑ نَشْنْ عَ حَاشِ رَ.

³ نَ كُي ﭑ عِ تَن بَاسَ بَمَ نّ مَنفّ رَ، عَلْ فِنّ عَ شَ بَنشِ كُي مَكْمَ كِ نَشّ. ﭑ عِ بْنسْي لُمَ نّ، عَلْ ﭑ نٍبَتِ شَ دِ يٍرٌبٌوَ مِ بْنسْي لُشِ كِ نَشّ.

⁴ بَاسَ بْنسْي نَشَن نَ قَشَ تَا كُي، بَرٍيٍ نَن نَ دٌنمَ. نَشَن نَ قَشَ وُلَ عِ، شْنِيٍ نَن نَ دٌنمَ.»

⁵ بَاسَ شَ تَرُشُي دْنشْي نُن عَ شَ فٍرٍ كِ قَنيِ، بِرِن سّبّشِ عِسِرَيِلَ مَنفّيٍ شَ تَرُشُي كُي.

⁶ بَاسَ نَشَ لَاشِرَ، عَ نَشَ رَفَتَ تِرِ سَ. عَ شَ دِ عٍلَ نَشَ تِ مَنفّ رَ عَ حْشْي رَ.

⁷ عَلَتَلَ عَ شَ مَسٍنيِ تِ نّ بَاسَ نُن عَ بْنسْي بّ، شَنَنِ شَ دِ عَننَبِ يٍهُ سَابُي رَ. نَ مَسٍنيِ تِ عَ شَ قٍ حَاشِيٍ نَن مَ قٍ رَ، نَشٍيٍ مُ رَقَنشِ عَلَتَلَ مَ. عَ نُ بَرَ مَنِيَ يٍرٌبٌوَ مِ بْنسْي رَ، عَ نَشَن سْنتْ.

⁸ عَسَ شَ مَنفّيَ حّ مْشْحّن نُن سٍننِ ندٍ رَ، بَاسَ شَ دِ عٍلَ نَشَ تِ عِسِرَيِلَ مَنفّ رَ. عَ شَ مَنفّيَ بُ نّ حّ قِرِن.

⁹ سِمِرِ، عَ شَ سْورِ مَنفّ ندٍ، نَشَن نُ قِندِشِ عَ شَ سْورِ رَفِسٍيٍ سّيتِ كٍرٍن شُنيِ رَ، نَشَ يَنقَنتٍيَ شِرِ عَ شُن. لْشْي ندٍ عٍلَ نُ نَ تِرِ سَ عَ سِيسِقٍ عَرِ سَ شْنيِ، نَشَن قِندِ نَ مَنفّ شَ بَنشِ كَنتّ رَ.