Annabi Esayi 11:2-15 in Susu

² Alatala Xaxili goroma nɛ a ma, a findi fahaamui, kolonyi, marasi, sɛnbɛ, nun Ala yaragaaxui ra.

³ A sɛɛwama nɛ Alatala xa yaragaaxui kui. A mu kiiti sama fe toxi xa na mu a ra fe mɛxi tun xa ma.

⁴ A misikiinɛe makiitima nɛ tinxinyi ra, a natɛ fanyi tongo setaree bɛ. A duniɲa makiitima nɛ a xɔrɔxɔɛ ra, a yaamari fi mixi ɲaaxie xa sɔntɔ.

⁵ A fe birin nabama tinxinyi nan na, a xa laayidi mu kanama feo.

⁶ Na lɔxɔɛ, wulai bare nun yɛxɛɛ luma nɛ yire keren, xulumase nun si, ninge yɔrɛ nun yɛtɛ, e birin luma nɛ yire keren, dimɛdi nde fa e dɛ madon.

⁷ Ninge nun baratɛ e dɛ madonma nɛ yire keren, e xa die sa yire keren. Yɛtɛ nun ninge birin fama sɛxɛ nan donde.

⁸ Na lɔxɔɛ diyɔrɛ berema nɛ tanbalunbe ra, dimɛdi a bɛlɛxɛ raso sagale yili kui.

⁹ Fe xɔrɔxɔɛ yo mu sɔtɔma n tan Alatala xa geya sɛniyɛnxi fari, duniɲa birin n kolonma nɛ alɔ yɛxɛe baa kolonma ki naxɛ.

¹⁰ Na lɔxɔɛ, Yisayi bɔnsɔɛ findima tɔnxuma nan na si birin bɛ, e fa e xun ti a ra binyɛ kui.

¹¹ Na lɔxɔɛ, Alatala man a xɔnyɛ italama nɛ a xa ɲama dɔnxɔɛ rakisife ra, naxee nu luma Asiriya, Misira, Patirosi, Kusi, Elama, Sinara, Xamata, nun baa surie ma.

¹² A tɔnxuma masenma nɛ si birin bɛ. A Isirayila nun Yudaya mixie malanma nɛ, naxee nu rayensenxi duniɲa tunxun naani ma.

¹³ Efirami bɔnsɔɛ xa tɔɔnɛ ɲɔnma nɛ, Yuda bɔnsɔɛ xa gere masofe fan ɲɔnma nɛ. Efirami bɔɲɛ xinbelima nɛ Yudaya mabiri, Yudaya fan gere luma nɛ.

¹⁴ E lanma nɛ Filisitakae gerefe ma sogetede mabiri, e e yaxuie fan gere naxee na sogegorode mabiri. E nɔma nɛ Edonkae nun Mowabakae ra, Amonikae fan lu e sagoe.

¹⁵ Alatala baa itaxun nɛ a xa ɲama bɛ e to keli Misira bɔxi ma. A Efirati xure fan itaxunma nɛ a xa foye magaaxuxi ra, a fa findi kira ra, ɲama naxee igirima e xaraxi ra.

² عَلَتَلَ شَشِلِ فٌرٌ مَ نّ عَ مَ، عَ قِندِ قَهَامُي، كٌلٌنيِ، مَرَ سِ، سّنبّ، نُن عَلَ يَرَفَاشُي رَ.

³ عَ سّيوَ مَ نّ عَلَتَلَ شَ يَرَفَاشُي كُي. عَ مُ كِيتِ سَمَ قٍ تٌشِ شَ نَ مُ عَ رَ قٍ مّشِ تُن شَ مَ.

⁴ عَ مِسِكِينّيٍ مَكِيتِمَ نّ تِنشِنيِ رَ، عَ نَتّ قَنيِ تٌنفٌ سٍتَرٍيٍ بّ. عَ دُنِحَ مَكِيتِمَ نّ عَ شْرْشْي رَ، عَ يَامَرِ قِ مِشِ حَاشِيٍ شَ سْنتْ.

⁵ عَ قٍ بِرِن نَبَمَ تِنشِنيِ نَن نَ، عَ شَ لَايِدِ مُ كَنَمَ قٍوٌ.

⁶ نَ لْشْي، وُلَءِ بَرٍ نُن يّشّي لُمَ نّ يِرٍ كٍرٍن، شُلُمَسٍ نُن سِ، نِنفٍ يْرّ نُن يّتّ، عٍ بِرِن لُمَ نّ يِرٍ كٍرٍن، دِ مّدِ ندٍ قَ عٍ دّ مَدٌن.

⁷ نِنفٍ نُن بَرَتّ عٍ دّ مَدٌنمَ نّ يِرٍ كٍرٍن، عٍ شَ دِيٍ سَ يِرٍ كٍرٍن. يّتّ نُن نِنفٍ بِرِن قَمَ سّشّ نَن دٌندٍ.

⁸ نَ لْشْي دِيْرّ بٍرٍ مَ نّ تَنبَلُنبٍ رَ، دِ مّدِ عَ بّلّشّ رَ سٌ سَفَلٍ يِلِ كُي.

⁹ قٍ شْرْشْي يٌ مُ سْتْمَ ﭑ تَن عَلَتَلَ شَ فٍيَ سّنِيّنشِ قَرِ، دُنِحَ بِرِن ﭑ كٌلٌنمَ نّ عَلْ يّشّيٍ بَا كٌلٌنمَ كِ نَشّ.

¹⁰ نَ لْشْي، يِسَيِ بْنسْي قِندِ مَ تْنشُمَ نَن نَ سِ بِرِن بّ، عٍ قَ عٍ شُن تِ عَ رَ بِنيّ كُي.

¹¹ نَ لْشْي، عَلَتَلَ مَن عَ شْنيّ عِتَلَمَ نّ عَ شَ حَمَ دْنشْي رَكِسِقٍ رَ، نَشٍيٍ نُ لُمَ عَسِرِيَ، مِسِرَ، ثَتِرٌ سِ، كُسِ، عٍلَمَ، سِنَرَ، شَمَتَ، نُن بَا سُرِيٍ مَ.

¹² عَ تْنشُمَ مَسٍنمَ نّ سِ بِرِن بّ. عَ عِسِرَيِلَ نُن يُدَيَ مِشِيٍ مَلَنمَ نّ، نَشٍيٍ نُ رَيٍنسٍنشِ دُنِحَ تُنشُن نَانِ مَ.

¹³ عٍقِرَ مِ بْنسْي شَ تْونّ حْنمَ نّ، يُدَ بْنسْي شَ فٍرٍ مَسٌقٍ قَن حْنمَ نّ. عٍقِرَ مِ بْحّ شِنبٍلِمَ نّ يُدَيَ مَبِرِ، يُدَيَ قَن فٍرٍ لُمَ نّ.

¹⁴ عٍ لَنمَ نّ قِلِسِتَكَيٍ فٍرٍقٍ مَ سٌفٍتٍدٍ مَبِرِ، عٍ عٍ يَشُييٍ قَن فٍرٍ نَشٍيٍ نَ سٌفٍفٌرٌدٍ مَبِرِ. عٍ نْمَ نّ عٍدٌنكَيٍ نُن مٌوَبَكَيٍ رَ، عَمٌنِكَيٍ قَن لُ عٍ سَفٌي.

¹⁵ عَلَتَلَ بَا عِتَشُن نّ عَ شَ حَمَ بّ عٍ تٌ كٍلِ مِسِرَ بْشِ مَ. عَ عٍقِرَتِ شُرٍ قَن عِتَشُنمَ نّ عَ شَ قٌيٍ مَفَاشُشِ رَ، عَ قَ قِندِ كِرَ رَ، حَمَ نَشٍيٍ عِفِرِ مَ عٍ شَرَشِ رَ.