Annabi Esayi 10:6-27 in Susu

⁶ N e tan nan xɛɛma ɲamanɛ murutaxi xili ma, n e tan nan nasigama ɲama xili ma, naxan n naxɔnɔxi, alako e xa naafuli ba na ɲama yi ra, e fa e maboron taa kui alɔ boora.

⁷ Kɔnɔ Asiriyakae xa natɛ tan nu na fe gbɛtɛ nan ma. E nu bara natɛ tongo e xa e xun nakana kerenyi ra, alɔ e luma a raba ra duniɲa ma ki naxɛ.

⁸ E xa mangɛ naxɛ, «N ma sɔɔri yareratie birin mu findixi mangɛe xa ra?

⁹ Kalano taa mu sɔntɔ xɛ alɔ Karakemisi? Xamata fan mu faxa xɛ alɔ Arapadi? Samari mu kana xɛ alɔ Damasi?

¹⁰ Xa n bara nɔ na bɔxie ra a nun e xa kuyee, kuye naxee sɛnbɛ gbo Darisalamu nun Samari gbee bɛ,

¹¹ n mu na mɔɔli rabama xɛ Darisalamu fan nun a xa kuyee ra? N naxan nabaxi Samari nun a xa kuye ra, n mu nɔma xɛ na fan nabade Darisalamu ra xɛ?»

¹² «Kɔnɔ n tan Alatala na gɛ n ma wali birin nakamalide Siyoni geya fari nun Darisalamu, n fama nɛ n ya rafindide Asiriya mangɛ ma, n a xa yɛtɛ igboya sare ragbilen a ma,

¹³ barima a luma a fala ra, ‹N bara yi birin naba n yɛtɛ sɛnbɛ ra, n ma fahaamui nan a niya duniɲa bɔxi birin xa lu n yi ra, n bara sie xa naafuli tongo n yɛtɛ bɛ, n bara nɔ mangɛ birin na, n findixi mangɛ sɛnbɛma nan na.

¹⁴ N bara n bɛlɛxɛ itala sie xa bannaya tagi, n fa naafuli tongo alɔ mixi xɔni xɛlɛe bama a tɛɛ kui ki naxɛ. Mixi yo mu nɔ tɔnyi dɔxɔde n ma.›»

¹⁵ «Bera kole a yɛtɛ matɔxɔma a rawalima bɛ? Sɛra a yɛtɛ matɔxɔma kamudɛri bɛ? Bɔnbɔ wuri nɔma mixi bɛlɛxɛ ratede? Luxusinyi nɔma mixi bɔnbɔde?

¹⁶ Na kui Alatala Sɛnbɛma fama nɛ a xa sɔɔri xungbee xɔside, a fa e gan tɛ xɔrɔxɔɛ ra.

¹⁷ Isirayila Marigi Alatala luma nɛ alɔ tɛ sɛniyɛnxi, naxan e xa tunbe nun baagi birin ganma lɔxɔ keren.

¹⁸ Isirayila xa fɔtɔnyi nun a xa xɛe xun fama nɛ kanade alɔ furema naxan na xɔsife.

¹⁹ Dimɛdi yati nɔma a xa wuri bili dɔnxɔɛe kɔntide naxee luma a xa fɔtɔnyie kui.»

²⁰ Na lɔxɔɛ Isirayila mixi dɔnxɔɛe mu e xaxili tima mixie ra sɔnɔn, naxee nu bara nɔ e ra. Yaxuba bɔnsɔɛ e xaxili tima Alatala nan na, naxan findixi Isirayila xa Sɛniyɛntɔɛ ra.

²¹ Yaxuba bɔnsɔɛ mixi dɔnxɔɛe fama nɛ gbilende Ala Sɛnbɛma ma.

²² Isirayila, hali i xa ɲama sa gbo nɛ alɔ mɛyɛnyi naxan na baa dɛ ra, dondoronti nan tun gbilenma e xɔnyi. Alatala bara natɛ tongo tinxinyi kui Isirayilakae sɔntɔfe ra.

²³ Alatala Sɛnbɛma fama nɛ na natɛ rakamalide bɔxi birin kanafe ra.

²⁴ Na kui Alatala Sɛnbɛma bara yi masenyi ti, a naxɛ, «Wo tan, n ma ɲama naxan sabatixi Siyoni, hali wo mu gaaxu Asiriyakae ya ra, naxee na wo bɔnbɔfe luxusinyi nun wuri ra, alɔ Misirakae nu a rabama ki naxɛ.

²⁵ A gbe mu luxi n ma xɔnɛ xa gbilen wo fɔxɔ ra, a fa e tan xun nakana.»

²⁶ Alatala Sɛnbɛma fama nɛ a xa luxusinyi itede e xili ma, alɔ a naxan naba Madiyankae xa mangɛ Orebi ra. A fama nɛ a xa yisuxuwuri itede baa xun ma, alɔ a raba Misira bɔxi ma ki naxɛ.

²⁷ Na lɔxɔɛ Ala wo xa kote binye bama nɛ wo tunki ma e naxan saxi wo xun ma. Wo xun nakelima nɛ han na kote birin ba wo xun ma.

⁶ ﭑ عٍ تَن نَن شّيمَ حَمَنّ مُرُتَشِ شِلِ مَ، ﭑ عٍ تَن نَن نَسِفَمَ حَمَ شِلِ مَ، نَشَن ﭑ نَشْنْشِ، عَلَكٌ عٍ شَ نَاقُلِ بَ نَ حَمَ يِ رَ، عٍ قَ عٍ مَبٌرٌن تَا كُي عَلْ بٌورَ.

⁷ كْنْ عَسِرِيَكَيٍ شَ نَتّ تَن نُ نَ قٍ فبّتّ نَن مَ. عٍ نُ بَرَ نَتّ تٌنفٌ عٍ شَ عٍ شُن نَكَنَ كٍرٍنيِ رَ، عَلْ عٍ لُمَ عَ رَبَ رَ دُنِحَ مَ كِ نَشّ.

⁸ عٍ شَ مَنفّ نَشّ، «ﭑ مَ سْورِ يَرٍرَتِيٍ بِرِن مُ قِندِشِ مَنفّيٍ شَ رَ؟

⁹ كَلَنٌ تَا مُ سْنتْ شّ عَلْ كَرَكٍمِسِ؟ شَمَتَ قَن مُ قَشَ شّ عَلْ عَرَثَدِ؟ سَمَرِ مُ كَنَ شّ عَلْ دَ مَسِ؟

¹⁰ شَ ﭑ بَرَ نْ نَ بْشِيٍ رَ عَ نُن عٍ شَ كُيٍيٍ، كُيٍ نَشٍيٍ سّنبّ فبٌ دَرِ سَلَمُ نُن سَمَرِ فبٍيٍ بّ،

¹¹ ﭑ مُ نَ مْولِ رَبَمَ شّ دَرِ سَلَمُ قَن نُن عَ شَ كُيٍيٍ رَ؟ ﭑ نَشَن نَبَشِ سَمَرِ نُن عَ شَ كُيٍ رَ، ﭑ مُ نْمَ شّ نَ قَن نَبَدٍ دَرِ سَلَمُ رَ شّ؟»

¹² «كْنْ ﭑ تَن عَلَتَلَ نَ فّ ﭑ مَ وَلِ بِرِن نَكَمَلِدٍ سِيٌنِ فٍيَ قَرِ نُن دَرِ سَلَمُ، ﭑ قَمَ نّ ﭑ يَ رَقِندِدٍ عَسِرِيَ مَنفّ مَ، ﭑ عَ شَ يّتّ عِفبٌيَ سَرٍ رَفبِلٍن عَ مَ،

¹³ بَرِ مَ عَ لُمَ عَ قَلَ رَ، ‹ﭑ بَرَ يِ بِرِن نَبَ ﭑ يّتّ سّنبّ رَ، ﭑ مَ قَهَامُي نَن عَ نِيَ دُنِحَ بْشِ بِرِن شَ لُ ﭑ يِ رَ، ﭑ بَرَ سِيٍ شَ نَاقُلِ تٌنفٌ ﭑ يّتّ بّ، ﭑ بَرَ نْ مَنفّ بِرِن نَ، ﭑ قِندِشِ مَنفّ سّنبّمَ نَن نَ.

¹⁴ ﭑ بَرَ ﭑ بّلّشّ عِتَلَ سِيٍ شَ بَننَيَ تَفِ، ﭑ قَ نَاقُلِ تٌنفٌ عَلْ مِشِ شْنِ شّلّيٍ بَمَ عَ تّي كُي كِ نَشّ. مِشِ يٌ مُ نْ تْنيِ دْشْدٍ ﭑ مَ.›»

¹⁵ «بٍرَ كٌلٍ عَ يّتّ مَتْشْمَ عَ رَوَلِمَ بّ؟ سّرَ عَ يّتّ مَتْشْمَ كَمُدّرِ بّ؟ بْنبْ وُرِ نْمَ مِشِ بّلّشّ رَتٍدٍ؟ لُشُسِنيِ نْمَ مِشِ بْنبْدٍ؟

¹⁶ نَ كُي عَلَتَلَ سّنبّمَ قَمَ نّ عَ شَ سْورِ شُنفبٍيٍ شْسِدٍ، عَ قَ عٍ فَن تّ شْرْشْي رَ.

¹⁷ عِسِرَيِلَ مَرِفِ عَلَتَلَ لُمَ نّ عَلْ تّ سّنِيّنشِ، نَشَن عٍ شَ تُنبٍ نُن بَافِ بِرِن فَنمَ لْشْ كٍرٍن.

¹⁸ عِسِرَيِلَ شَ قْتْنيِ نُن عَ شَ شّيٍ شُن قَمَ نّ كَنَدٍ عَلْ قُرٍ مَ نَشَن نَ شْسِقٍ.

¹⁹ دِ مّدِ يَتِ نْمَ عَ شَ وُرِ بِلِ دْنشْييٍ كْنتِدٍ نَشٍيٍ لُمَ عَ شَ قْتْنيِيٍ كُي.»

²⁰ نَ لْشْي عِسِرَيِلَ مِشِ دْنشْييٍ مُ عٍ شَشِلِ تِمَ مِشِيٍ رَ سْنْن، نَشٍيٍ نُ بَرَ نْ عٍ رَ. يَشُبَ بْنسْي عٍ شَشِلِ تِمَ عَلَتَلَ نَن نَ، نَشَن قِندِشِ عِسِرَيِلَ شَ سّنِيّنتْي رَ.

²¹ يَشُبَ بْنسْي مِشِ دْنشْييٍ قَمَ نّ فبِلٍندٍ عَلَ سّنبّمَ مَ.

²² عِسِرَيِلَ، هَلِ عِ شَ حَمَ سَ فبٌ نّ عَلْ مّيّنيِ نَشَن نَ بَا دّ رَ، دٌندٌرٌنتِ نَن تُن فبِلٍنمَ عٍ شْنيِ. عَلَتَلَ بَرَ نَتّ تٌنفٌ تِنشِنيِ كُي عِسِرَيِلَكَيٍ سْنتْقٍ رَ.

²³ عَلَتَلَ سّنبّمَ قَمَ نّ نَ نَتّ رَكَمَلِدٍ بْشِ بِرِن كَنَقٍ رَ.

²⁴ نَ كُي عَلَتَلَ سّنبّمَ بَرَ يِ مَسٍنيِ تِ، عَ نَشّ، «وٌ تَن، ﭑ مَ حَمَ نَشَن سَبَتِشِ سِيٌنِ، هَلِ وٌ مُ فَاشُ عَسِرِيَكَيٍ يَ رَ، نَشٍيٍ نَ وٌ بْنبْقٍ لُشُسِنيِ نُن وُرِ رَ، عَلْ مِسِرَكَيٍ نُ عَ رَبَمَ كِ نَشّ.

²⁵ عَ فبٍ مُ لُشِ ﭑ مَ شْنّ شَ فبِلٍن وٌ قْشْ رَ، عَ قَ عٍ تَن شُن نَكَنَ.»

²⁶ عَلَتَلَ سّنبّمَ قَمَ نّ عَ شَ لُشُسِنيِ عِتٍدٍ عٍ شِلِ مَ، عَلْ عَ نَشَن نَبَ مَدِيَنكَيٍ شَ مَنفّ عٌرٍبِ رَ. عَ قَمَ نّ عَ شَ يِسُشُوُرِ عِتٍدٍ بَا شُن مَ، عَلْ عَ رَبَ مِسِرَ بْشِ مَ كِ نَشّ.

²⁷ نَ لْشْي عَلَ وٌ شَ كٌتٍ بِنيٍ بَمَ نّ وٌ تُنكِ مَ عٍ نَشَن سَشِ وٌ شُن مَ. وٌ شُن نَكٍلِمَ نّ هَن نَ كٌتٍ بِرِن بَ وٌ شُن مَ.