رْ مَ 8:5-17

⁵نَشٍيٍ حّرّ مَ عَدَ مَ وَشْنقٍ مَ، عٍ شَشِلِ رَقٍشِ عَدَ مَ وَشْنقٍ نَن نَ. كْنْ نَشٍيٍ حّرّ مَ عَلَ شَشِلِ سّنِيّنشِ مَ، عٍ تَن نَقٍشِ عَلَ شَشِلِ سّنِيّنشِ وَشْنقٍ نَن نَ.

⁶نَشٍيٍ عٍ شَشِلِ لُشِ قٍ كٌبِ رَبَقٍ مَ، عٍ شُن تِشِ قَشّ نَن نَ. كْنْ نَشٍيٍ عٍ شَشِلِ لُشِ عَلَ شَشِلِ سّنِيّنشِ شَ قٍ مَ، عٍ كِسِ نُن بْحّسَ نَن سْتْمَ.

⁷نَشٍيٍ عٍ شَشِلِ لُشِ عٍ يّتّ وَشْنقٍ يِ، عٍ قِندِشِ عَلَ يَشُييٍ نَن نَ. عٍ مُ عَلَ شَ سّرِيّ رَبَتُمَ، عٍ حَن مُ نْمَ عَ رَبَتُدٍ.

⁸نَشٍيٍ بِرَشِ عٍ يّتّ وَشْنقٍ قْشْ رَ، عٍ شَ قٍ مُ نْمَ عَلَ كّنّندٍ.

⁹كْنْ وٌ تَن مُ نَ وٌ يّتّ سَفٌي سْنْن. شَ عَلَ شَشِلِ سّنِيّنشِ سَبَتِشِ وٌ عِ، وٌ قَ نَ عَلَ شَشِلِ سّنِيّنشِ نَن سَفٌي. عَلَ شَ مِشِ سُفَندِشِ شَشِلِ مُ نَ نَشَن يٌ يِ رَ، نَ كَنيِ مُ قِندِشِ عِسَ فبٍ رَ.

¹⁰شَ وٌ نُن عَلَ شَ مِشِ سُفَندِشِ بَرَ قِندِ كٍرٍن نَ، وٌ قَتٍ بّندّ تَن قَشَمَ يُنُبِ نَن مَ قٍ رَ، كْنْ عَلَ شَشِلِ سّنِيّنشِ تَن وٌ رَكِسِمَ نّ بَرِ مَ وٌ بَرَ مَتِنشِن عَلَ يَ عِ.

¹¹عَلَ نَن عِسَ رَكٍلِ قَشَمِشِيٍ تَفِ. شَ عَ تَن عَلَ شَشِلِ نَن سَبَتِشِ وٌ عِ، عَ تَن نَشَن عَ شَ مِشِ سُفَندِشِ رَكٍلِ قَشّ مَ، عَ مَن قَمَ نّ وٌ قَتٍ بّندّ رَكِسِدٍ عَ شَشِلِ سَابُي رَ نَشَن سَبَتِشِ وٌ عِ.

¹²نَ كُي، ﭑ نفَشَكٍرٍنيِيٍ، دٌنِ ندٍ نَ وٌن مَ، كْنْ عَ مُ نَ وٌن مَ وٌن يّتّ قَتٍ بّندّ شَ سّيتِ شّ. عَ مُ لَن وٌن مَن شَ لُ عَ سَفٌي سْنْن وٌن مَن شَ عَ وَشْنقٍ كٌبِ رَبَ.

¹³شَ وٌ حّرّ قَتٍ بّندّ وَشْنقٍ كٌبِيٍ مَ، وٌ قَشَمَ نّ، كْنْ شَ وٌ فبِلٍن عٍ قْشْ رَ عَلَ شَشِلِ سّنِيّنشِ سَابُي رَ، وٌ كِسِمَ نّ،

¹⁴بَرِ مَ عَلَ شَشِلِ سّنِيّنشِ مِشِ نَشٍيٍ بِرِن نَحّرّ مَ، عٍ تَن قِندِشِ عَلَ شَ دِيٍ نَن نَ.

¹⁵عَلَ مُ شَشِلِ قِشِ وٌ مَ نَشَن مَن وٌ قِندِ مَ فَاشُي شَ كٌنيِيٍ رَ. عَ عَ يّتّ شَشِلِ سّنِيّنشِ نَن قِشِ وٌ مَ نَشَن وٌ قِندِشِ عَ شَ دِيٍ رَ، نَشَن عَ نِيَمَ وٌن شَ نْ وٌن شُي عِتٍدٍ عَلَ مَ، وٌن نَ عَ شِلِ، «ﭑ بَ، ﭑ بَ!»

¹⁶نَ كُي، عَلَ شَشِلِ سّنِيّنشِ نُن وٌن يّتّ شَشِلِ عَ مَسٍنمَ عَ وٌن قِندِشِ عَلَ شَ دِيٍ نَن نَ.

¹⁷عَنُن، وٌن تٌ قِندِشِ عَ شَ دِيٍ رَ، وٌن بَرَ قِندِ عَلَ شَ كّتٌنفٌي رَ، وٌن نُن عَ شَ مِشِ سُفَندِشِ. بَرِ مَ، شَ وٌن تْورْ عَ شَ تْورّ، وٌن مَن قَمَ نّ شُننَكٍلِ سْتْدٍ عَلْ عَ تَن.