رْ مَ 5:10-16

¹⁰بَرِ مَ وٌن نُ قِندِشِ عَلَ يَشُييٍ رَ تّمُي نَشّ، عَ شَ دِ شَ قَشّ سَابُي نَشَ وٌن تَفِ يَءِلَن، يَكْسِ وٌن نُن عَلَ تَفِ تٌ بَرَ يَءِلَن، وٌن عَ كٌلٌن عَ وٌن نَكِسِمَ نّ عَ شَ دِ شَ كِسِ سَابُي رَ.

¹¹نَ مَن قَرِ، وٌن سّيوَشِ نّ عَلَ رَ عَ شَ مِشِ سُفَندِشِ مَرِفِ عِسَ سَابُي رَ، نَشَن بَرَ وٌن نُن عَلَ تَفِ يَءِلَن.

¹²نَ كُي، يُنُبِ نَشَ سٌ دُنِحَ مِشِ كٍرٍن سَابُي رَ. قَشّ قَن نَشَ سٌ دُنِحَ يُنُبِ شَ قٍ رَ، عَ دِن مِشِ بِرِن نَ بَرِ مَ عَدَ مَدِيٍ بِرِن بَرَ يُنُبِ رَبَ.

¹³يُنُبِ نُ نَ دُنِحَ مَ بٍينُن عَلَ شَ عَ شَ سّرِيّ قِ عَننَبِ مُنسَ مَ، كْنْ شَ سّرِيّ مُ نَ، يُنُبِ قَن مُ نَ مِشِ يٌ مَ.

¹⁴كْنْ قَشّ تَن نُ نَ دُنِحَ مَ، كٍلِ وٌن بٍنبَ عَدَ مَ مَ هَن عَننَبِ مُنسَ، هَلِ نَ مِشِيٍ شَ يُنُبِ تٌ مُ نُ لُشِ عَلْ وٌن بٍنبَ عَدَ مَ فبٍ نَشَن عَلَ شُي يَتِ مَتَندِ. عَدَ مَ نُ مِسَالِشِ مِشِ نَن نَ نَشَن نُ قَقٍ.

¹⁵كْنْ عَلَ وٌن كِشِ نَشَن نَ، نَ نُن بٍنبَ عَدَ مَ شَ يُنُبِ كٍرٍن مُ عَ رَ. عِيٌ، عَدَ مَدِ فبٍفبٍ قَشَشِ يِ مِشِ كٍرٍن شَ يُنُبِ نَن سَابُي رَ، كْنْ عَلَ شَ هِننّ دَنفِ نَ رَ كِ قَنيِ، بَرِ مَ عَ عَدَ مَدِيٍ كِشِ عَ شَ مِشِ سُفَندِشِ عِسَ نَشَن نَ، نَ بَرَ مِشِ فبٍفبٍ رَكِسِ عَ شَ هِننّ سَابُي رَ.

¹⁶عَدَ مَ شَ يُنُبِ نُن عَلَ عَدَ مَدِيٍ كِشِ نَشَن نَ، عٍ قْشِ تَفِ عِكُيَ. مِشِ كٍرٍن شَ يُنُبِ تٌ مَكِيتِ، فبَلٌي نَن قَ. كْنْ عَلَ عَدَ مَدِيٍ كِشِ نَشَن نَ، عَ قَ مِشِ فبٍفبٍ شَ يُنُبِ رَبَ شَنبِ نّ، عَ قَ قّيرّ رَ مِشِ مَتِنشِنمَ كِ نَشّ عَلَ يَ عِ.