Rɔma 14:4-20 in Susu

⁴ Nde i findixi kiitisa ra mixi gbɛtɛ xa konyi xun ma? A na ti a marigi ya i a xa wali xa fe ra, a xan ba, a mu xan ba, na na a tan nun a marigi nan tagi. Anun, a xanma nɛ, barima Marigi Ala nɔma a raxande.

⁵ Mixi nde nɔma lade a ra a lɔxɔɛe tide gbo e boore bɛ, kɔnɔ mixi gbɛtɛ tan bɛ, lɔxɔɛ birin lan. Kankan laxi naxan na, a xa la a ra a bɔɲɛ nan yati ma.

⁶ Naxan laxi a ra a lɔxɔɛe tide gbo e boore bɛ, na kanyi laxi a ra Marigi nan bɛ. Naxan donse mɔɔli birin donma, a kanyi a rabama Marigi nan bɛ, barima a tantui rasigama Ala ma a xa baloe xa fe ra. Mixi naxan mu donse nde donma, na kanyi fan na rabama Marigi nan bɛ, barima a fan tantui rasigama Ala ma.

⁷ Mixi yo gbe mu a yɛtɛ ra, keli yi duniɲa, han laaxira.

⁸ Xa won balo, xa won faxa, na birin nabama Marigi nan bɛ. Xa won baloxi, xa won faxaxi, won findixi Marigi gbe nan na,

⁹ barima Ala xa Mixi Sugandixi faxa nɛ, a man keli faxɛ ma, alako a xa findi mixi faxaxie nun a baloxie Marigi ra.

¹⁰ Munfe ra i tan fa i boore makiitima? Munfe ra i a raɲaaxuma? Won birin mu fama tide xɛ Ala ya i kiiti lɔxɔɛ?

¹¹ A sɛbɛxi Kitaabui kui, Marigi naxɛ, «N xa nɔndi masen wo bɛ. Birin fama nɛ e xinbi sinde n bɛ. Adamadi dɛ birin fama a masende, a n tan nan na Ala ra.»

¹² Kankan fama nɛ a xa wali dɛntɛgɛde Ala bɛ.

¹³ Na kui, won naxa won bore makiiti. Won xa fe birin nan naba alako won naxa won ngaxakerenyi ratantan.

¹⁴ N to danxaniyaxi Marigi Isa ma, n a kolon, n man laxi a ra, a donse yo mu na naxan findixi donse sɛniyɛntare ra. Kɔnɔ xa i xaxili bara siikɛ donse nde xa sɛniyɛntareɲa ma, na bara findi i bɛ se sɛniyɛntare ra.

¹⁵ Xa a sa li i donse nde donma naxan i ngaxakerenyi tɔɔrɔma, i mu ɲɛrɛfe xanunteya xa ma. I xa donse xa fe naxa a niya i ngaxakerenyi xa gan kisi ra, Ala xa Mixi Sugandixi faxa naxan ma fe ra.

¹⁶ Na kui, a mu lan mixie xa fe kobi fala se nde xa fe ra, naxan findixi a fanyi ra wo bɛ.

¹⁷ Ala xa mangɛya niini mu findixi donse nun minse fe xa ra. A findixi tinxinyi nun sɛɛwɛ fe nan na, Ala Xaxili Sɛniyɛnxi saabui ra.

¹⁸ Mixi naxan walima Ala xa Mixi Sugandixi bɛ yi mɔɔli ra, a rafanma nɛ Ala ma, a rafan mixie fan ma.

¹⁹ Na kui, won xa fe birin naba alako lanyi xa lu won tagi, won xa won bore xa danxaniya sɛnbɛ so.

²⁰ I naxa Ala xa wali xun nakana donse nde xa fe ra. A nɔndi ki ma, donse birin daxa, kɔnɔ a mu lan mixi yo xa donse nde don naxan a ngaxakerenyi ratantanma.

⁴ ندٍ عِ قِندِشِ كِيتِسَ رَ مِشِ فبّتّ شَ كٌنيِ شُن مَ؟ عَ نَ تِ عَ مَرِفِ يَ عِ عَ شَ وَلِ شَ قٍ رَ، عَ شَن بَ، عَ مُ شَن بَ، نَ نَ عَ تَن نُن عَ مَرِفِ نَن تَفِ. عَنُن، عَ شَنمَ نّ، بَرِ مَ مَرِفِ عَلَ نْمَ عَ رَشَندٍ.

⁵ مِشِ ندٍ نْمَ لَدٍ عَ رَ عَ لْشْييٍ تِدٍ فبٌ عٍ بٌورٍ بّ، كْنْ مِشِ فبّتّ تَن بّ، لْشْي بِرِن لَن. كَنكَن لَشِ نَشَن نَ، عَ شَ لَ عَ رَ عَ بْحّ نَن يَتِ مَ.

⁶ نَشَن لَشِ عَ رَ عَ لْشْييٍ تِدٍ فبٌ عٍ بٌورٍ بّ، نَ كَنيِ لَشِ عَ رَ مَرِفِ نَن بّ. نَشَن دٌنسٍ مْولِ بِرِن دٌنمَ، عَ كَنيِ عَ رَبَمَ مَرِفِ نَن بّ، بَرِ مَ عَ تَنتُي رَ سِفَمَ عَلَ مَ عَ شَ بَلٌي شَ قٍ رَ. مِشِ نَشَن مُ دٌنسٍ ندٍ دٌنمَ، نَ كَنيِ قَن نَ رَبَمَ مَرِفِ نَن بّ، بَرِ مَ عَ قَن تَنتُي رَ سِفَمَ عَلَ مَ.

⁷ مِشِ يٌ فبٍ مُ عَ يّتّ رَ، كٍلِ يِ دُنِحَ، هَن لَاشِرَ.

⁸ شَ وٌن بَلٌ، شَ وٌن قَشَ، نَ بِرِن نَبَمَ مَرِفِ نَن بّ. شَ وٌن بَلٌشِ، شَ وٌن قَشَشِ، وٌن قِندِشِ مَرِفِ فبٍ نَن نَ،

⁹ بَرِ مَ عَلَ شَ مِشِ سُفَندِشِ قَشَ نّ، عَ مَن كٍلِ قَشّ مَ، عَلَكٌ عَ شَ قِندِ مِشِ قَشَشِيٍ نُن عَ بَلٌشِيٍ مَرِفِ رَ.

¹⁰ مُنقٍ رَ عِ تَن قَ عِ بٌورٍ مَكِيتِمَ؟ مُنقٍ رَ عِ عَ رَحَاشُمَ؟ وٌن بِرِن مُ قَمَ تِدٍ شّ عَلَ يَ عِ كِيتِ لْشْي؟

¹¹ عَ سّبّشِ كِتَابُي كُي، مَرِفِ نَشّ، «ﭑ شَ نْندِ مَسٍن وٌ بّ. بِرِن قَمَ نّ عٍ شِنبِ سِندٍ ﭑ بّ. عَدَ مَدِ دّ بِرِن قَمَ عَ مَسٍندٍ، عَ ﭑ تَن نَن نَ عَلَ رَ.»

¹² كَنكَن قَمَ نّ عَ شَ وَلِ دّنتّفّدٍ عَلَ بّ.

¹³ نَ كُي، وٌن نَشَ وٌن بٌرٍ مَكِيتِ. وٌن شَ قٍ بِرِن نَن نَبَ عَلَكٌ وٌن نَشَ وٌن نفَشَكٍرٍنيِ رَتَنتَن.

¹⁴ ﭑ تٌ دَنشَنِيَشِ مَرِفِ عِسَ مَ، ﭑ عَ كٌلٌن، ﭑ مَن لَشِ عَ رَ، عَ دٌنسٍ يٌ مُ نَ نَشَن قِندِشِ دٌنسٍ سّنِيّنتَرٍ رَ. كْنْ شَ عِ شَشِلِ بَرَ سِيكّ دٌنسٍ ندٍ شَ سّنِيّنتَرٍحَ مَ، نَ بَرَ قِندِ عِ بّ سٍ سّنِيّنتَرٍ رَ.

¹⁵ شَ عَ سَ لِ عِ دٌنسٍ ندٍ دٌنمَ نَشَن عِ نفَشَكٍرٍنيِ تْورْ مَ، عِ مُ حّرّقٍ شَنُنتٍيَ شَ مَ. عِ شَ دٌنسٍ شَ قٍ نَشَ عَ نِيَ عِ نفَشَكٍرٍنيِ شَ فَن كِسِ رَ، عَلَ شَ مِشِ سُفَندِشِ قَشَ نَشَن مَ قٍ رَ.

¹⁶ نَ كُي، عَ مُ لَن مِشِيٍ شَ قٍ كٌبِ قَلَ سٍ ندٍ شَ قٍ رَ، نَشَن قِندِشِ عَ قَنيِ رَ وٌ بّ.

¹⁷ عَلَ شَ مَنفّيَ نِينِ مُ قِندِشِ دٌنسٍ نُن مِنسٍ قٍ شَ رَ. عَ قِندِشِ تِنشِنيِ نُن سّيوّ قٍ نَن نَ، عَلَ شَشِلِ سّنِيّنشِ سَابُي رَ.

¹⁸ مِشِ نَشَن وَلِمَ عَلَ شَ مِشِ سُفَندِشِ بّ يِ مْولِ رَ، عَ رَقَنمَ نّ عَلَ مَ، عَ رَقَن مِشِيٍ قَن مَ.

¹⁹ نَ كُي، وٌن شَ قٍ بِرِن نَبَ عَلَكٌ لَنيِ شَ لُ وٌن تَفِ، وٌن شَ وٌن بٌرٍ شَ دَنشَنِيَ سّنبّ سٌ.

²⁰ عِ نَشَ عَلَ شَ وَلِ شُن نَكَنَ دٌنسٍ ندٍ شَ قٍ رَ. عَ نْندِ كِ مَ، دٌنسٍ بِرِن دَشَ، كْنْ عَ مُ لَن مِشِ يٌ شَ دٌنسٍ ندٍ دٌن نَشَن عَ نفَشَكٍرٍنيِ رَتَنتَنمَ.