Taruxui 4:12-31 in Susu

¹² Kisi mu sɔtɔma ndende ra fo a tan, barima xili gbɛtɛ yo mu na duniɲa, won kisima naxan saabui ra.»

¹³ E naxa kaaba Piyɛri nun Yaya xa limaniya ma, barima xarantaree nan nu e ra. E naxa a kolon e nu bara bira Isa fɔxɔ ra a nu na duniɲa ma tɛmui naxɛ.

¹⁴ Kɔnɔ xɛmɛ to nu tixi e sɛɛti ma, a yalanxi, e mu nɔ sese falade.

¹⁵ E naxa Piyɛri, Yaya, nun na xɛmɛ yaamari e xa mini Yuwifi kiitisae ya ma. E nu fa wɔyɛn e bore tagi.

¹⁶ E naxa e bore maxɔrin, «Won xa munse raba yi mixie ra? Darisalamukae birin bara a kolon e kaabanako xungbe nan nabaxi. Won fan mu nɔma na matandide.

¹⁷ Kɔnɔ alako yi fe naxa yensen yɛ mixie ra, won xa e ratɔn a xɔrɔxɔɛ ra, e naxa wɔyɛn Isa xili ra sɔnɔn.»

¹⁸ E naxa Piyɛri, Yaya, nun na xɛmɛ xili. E naxa wɔyɛn e bɛ a xɔrɔxɔɛ ra, a e naxa masenyi yo ti, e naxa mixi yo xaran Isa xili ra sɔnɔn.

¹⁹ Piyɛri nun Yaya naxa e yaabi, «Wo a mato, a lanma muxu xa bira wo tan nan fɔxɔ ra ba, ka Ala?

²⁰ Muxu mu nɔma dundude fe ma muxu bara naxan to, muxu bara naxan mɛ.»

²¹ E man naxa xaaɲɛ e ma, kɔnɔ ɲama birin to nu Ala matɔxɔma fe ma naxan bara raba, e mu nɔ lande a ma a lanma e xa e ɲaxankata ki naxɛ. E naxa e rabɛɲin.

²² Yi xɛmɛ naxan nayalanxi, a xa simaya nu bara dangi ɲɛ tongo naani ra.

²³ E to e bɛɲin, Piyɛri nun Yaya naxa siga e booree yire. E naxa fe birin yaba e bɛ sɛrɛxɛdubɛ kuntigie nun forie naxan fala e bɛ.

²⁴ E to na mɛ, e birin naxa e xui ite Ala ma ɲanige keren fari. E naxa a maxandi, «Marigi, i tan naxan koore daa, a nun bɔxi, a nun baa, a nun se naxan birin na duniɲa,

²⁵ i tan nan a fala Ala Xaxili Sɛniyɛnxi saabui ra, i xa konyi Dawuda dɛ ra, muxu baba, ‹Munfe ra sie bɔɲɛ texi fufafu? Munfe ra ɲamae matandi tife?

²⁶ Duniɲa mangɛe bara keli, xunmatie bara ti Marigi nun a xa Mixi Sugandixi kanke.›»

²⁷ «Nɔndi na a ra, Herode, Ponsi Pilati, xɔɲɛe, a nun Isirayila bɔnsɔɛe bara ti i xa konyi sɛniyɛnxi Isa kanke, i naxan sugandixi,

²⁸ alako e xa fe birin naba i singe nu bara natɛ tongo a nu lan naxan xa raba.

²⁹ Yakɔsi, Marigi, i xa a mato e xaaɲɛxi ki naxɛ. Sɛnbɛ fi i xa konyie ma, alako e xa nɔ i xa wɔyɛnyi masende limaniya ra.

³⁰ I bɛlɛxɛ itala, alako mixi xa rayalan, kaabanakoee nun tɔnxumae xa raba i xa konyi sɛniyɛnxi Isa xili ra.»

³¹ E to gɛ Ala maxandide, e nu malanxi dɛnnaxɛ, na naxa sɛrɛn. Ala Xaxili Sɛniyɛnxi naxa goro e birin ma. E naxa so Ala xa wɔyɛnyi masenfe limaniya ra.

¹² كِسِ مُ سْتْمَ ندٍندٍ رَ قٌ عَ تَن، بَرِ مَ شِلِ فبّتّ يٌ مُ نَ دُنِحَ، وٌن كِسِمَ نَشَن سَابُي رَ.»

¹³ عٍ نَشَ كَابَ ثِيّرِ نُن يَيَ شَ لِمَنِيَ مَ، بَرِ مَ شَرَنتَرٍيٍ نَن نُ عٍ رَ. عٍ نَشَ عَ كٌلٌن عٍ نُ بَرَ بِرَ عِسَ قْشْ رَ عَ نُ نَ دُنِحَ مَ تّمُي نَشّ.

¹⁴ كْنْ شّمّ تٌ نُ تِشِ عٍ سّيتِ مَ، عَ يَلَنشِ، عٍ مُ نْ سٍسٍ قَلَدٍ.

¹⁵ عٍ نَشَ ثِيّرِ، يَيَ، نُن نَ شّمّ يَامَرِ عٍ شَ مِنِ يُوِقِ كِيتِسَيٍ يَ مَ. عٍ نُ قَ وْيّن عٍ بٌرٍ تَفِ.

¹⁶ عٍ نَشَ عٍ بٌرٍ مَشْرِن، «وٌن شَ مُنسٍ رَبَ يِ مِشِيٍ رَ؟ دَرِ سَلَمُكَيٍ بِرِن بَرَ عَ كٌلٌن عٍ كَابَنَكٌ شُنفبٍ نَن نَبَشِ. وٌن قَن مُ نْمَ نَ مَتَندِدٍ.

¹⁷ كْنْ عَلَكٌ يِ قٍ نَشَ يٍنسٍن يّ مِشِيٍ رَ، وٌن شَ عٍ رَتْن عَ شْرْشْي رَ، عٍ نَشَ وْيّن عِسَ شِلِ رَ سْنْن.»

¹⁸ عٍ نَشَ ثِيّرِ، يَيَ، نُن نَ شّمّ شِلِ. عٍ نَشَ وْيّن عٍ بّ عَ شْرْشْي رَ، عَ عٍ نَشَ مَسٍنيِ يٌ تِ، عٍ نَشَ مِشِ يٌ شَرَن عِسَ شِلِ رَ سْنْن.

¹⁹ ثِيّرِ نُن يَيَ نَشَ عٍ يَابِ، «وٌ عَ مَتٌ، عَ لَنمَ مُشُ شَ بِرَ وٌ تَن نَن قْشْ رَ بَ، كَ عَلَ؟

²⁰ مُشُ مُ نْمَ دُندُدٍ قٍ مَ مُشُ بَرَ نَشَن تٌ، مُشُ بَرَ نَشَن مّ.»

²¹ عٍ مَن نَشَ شَاحّ عٍ مَ، كْنْ حَمَ بِرِن تٌ نُ عَلَ مَتْشْمَ قٍ مَ نَشَن بَرَ رَبَ، عٍ مُ نْ لَندٍ عَ مَ عَ لَنمَ عٍ شَ عٍ حَشَنكَتَ كِ نَشّ. عٍ نَشَ عٍ رَبّحِن.

²² يِ شّمّ نَشَن نَيَلَنشِ، عَ شَ سِمَيَ نُ بَرَ دَنفِ حّ تٌنفٌ نَانِ رَ.

²³ عٍ تٌ عٍ بّحِن، ثِيّرِ نُن يَيَ نَشَ سِفَ عٍ بٌورٍيٍ يِرٍ. عٍ نَشَ قٍ بِرِن يَبَ عٍ بّ سّرّشّدُبّ كُنتِفِيٍ نُن قٌرِيٍ نَشَن قَلَ عٍ بّ.

²⁴ عٍ تٌ نَ مّ، عٍ بِرِن نَشَ عٍ شُي عِتٍ عَلَ مَ حَنِفٍ كٍرٍن قَرِ. عٍ نَشَ عَ مَشَندِ، «مَرِفِ، عِ تَن نَشَن كٌورٍ دَا، عَ نُن بْشِ، عَ نُن بَا، عَ نُن سٍ نَشَن بِرِن نَ دُنِحَ،

²⁵ عِ تَن نَن عَ قَلَ عَلَ شَشِلِ سّنِيّنشِ سَابُي رَ، عِ شَ كٌنيِ دَوُدَ دّ رَ، مُشُ بَبَ، ‹مُنقٍ رَ سِيٍ بْحّ تٍشِ قُقَقُ؟ مُنقٍ رَ حَمَيٍ مَتَندِ تِقٍ؟

²⁶ دُنِحَ مَنفّيٍ بَرَ كٍلِ، شُنمَتِيٍ بَرَ تِ مَرِفِ نُن عَ شَ مِشِ سُفَندِشِ كَنكٍ.›»

²⁷ «نْندِ نَ عَ رَ، هٍرٌدٍ، ثٌنسِ ثِلَتِ، شْحّيٍ، عَ نُن عِسِرَيِلَ بْنسْييٍ بَرَ تِ عِ شَ كٌنيِ سّنِيّنشِ عِسَ كَنكٍ، عِ نَشَن سُفَندِشِ،

²⁸ عَلَكٌ عٍ شَ قٍ بِرِن نَبَ عِ سِنفٍ نُ بَرَ نَتّ تٌنفٌ عَ نُ لَن نَشَن شَ رَبَ.

²⁹ يَكْسِ، مَرِفِ، عِ شَ عَ مَتٌ عٍ شَاحّشِ كِ نَشّ. سّنبّ قِ عِ شَ كٌنيِيٍ مَ، عَلَكٌ عٍ شَ نْ عِ شَ وْيّنيِ مَسٍندٍ لِمَنِيَ رَ.

³⁰ عِ بّلّشّ عِتَلَ، عَلَكٌ مِشِ شَ رَيَلَن، كَابَنَكٌييٍ نُن تْنشُمَيٍ شَ رَبَ عِ شَ كٌنيِ سّنِيّنشِ عِسَ شِلِ رَ.»

³¹ عٍ تٌ فّ عَلَ مَشَندِدٍ، عٍ نُ مَلَنشِ دّننَشّ، نَ نَشَ سّرّن. عَلَ شَشِلِ سّنِيّنشِ نَشَ فٌرٌ عٍ بِرِن مَ. عٍ نَشَ سٌ عَلَ شَ وْيّنيِ مَسٍنقٍ لِمَنِيَ رَ.