Taruxui 23:15-32 in Susu

¹⁵ Awa, yakɔsi, wo tan nun Yuwifi kiitisae xa mangɛ mayandi a xa fa a ra alako wo xa a xa fe mato a fanyi ra. Na kui, muxu tan a faxama kira ra.»

¹⁶ Pɔlu maaginɛ xa di naxa na yanfɛ kolon. A naxa siga sɔɔri banxi kui, a naxa na birin masen Pɔlu bɛ.

¹⁷ Pɔlu naxa sɔɔri mixi kɛmɛ xunmati nde xili, a naxɛ, «Yi sɛgɛtala xanin sɔɔri mangɛ xɔn ma, alako a xa fe nde fala a bɛ.»

¹⁸ Sɔɔri kɛmɛ xunmati naxa sɛgɛtala tongo, a naxa a xanin sɔɔri mangɛ xɔn ma. A naxɛ, «Pɔlu, geelimani nan n xilixi, a naxa n mayandi a n xa fa yi sɛgɛtala ra i xɔn ma, a xa fe nde masen i bɛ.»

¹⁹ Sɔɔri mangɛ naxa sɛgɛtala tongo, e naxa e mamini. Mangɛ naxɛ, «I wama munse falafe n bɛ?»

²⁰ A naxa a yaabi, «Yuwifie bara lan a ma, e xa i maxandi i xa Pɔlu xanin Yuwifi kiitisae yire, alako e man xa maxɔrinyi nde ti a ma.

²¹ I naxa i tuli mati e ra, barima mixi tongo naani nun nde bara yanfɛ xiri a xun e ya ma. E bara e kali a e mu sese donma, e mu sese minma a fo e na Pɔlu faxa tɛmui naxɛ. Yakɔsi e bara gɛ e yailande, e fa i sago nan mamɛfe.»

²² Sɔɔri mangɛ naxa sɛgɛtala rabolo, a naxa tɔnyi dɔxɔ a ma, fa fala, a fe naxan falaxi a bɛ, a naxa na fala mixi yo bɛ.

²³ A naxa sɔɔri mixi kɛmɛ xunmati firin xili, a naxa a fala e bɛ, «Wo sɔɔri kɛmɛ firin yailan, sɔɔri soe ragie tongo solofere, nun xali woli kɛmɛ firin. Wo xa e yailan sigafe ra Sesare to kɔɛ ra.

²⁴ Wo xa soe nde yailan Pɔlu bɛ, alako a xa mangɛ Felisi li hɛɛri kui.»

²⁵ Sɔɔri mangɛ naxa yi fe sɛbɛ bataaxɛ ra.

²⁶ «N tan Kilɔdi Lisiya, i tan Mangɛ Felisi mafanxi, n bara i xɛɛbu.

²⁷ Yi xɛmɛ Yuwifie nan a suxuxi. E naxa wa a faxafe. N to a kolon a Rɔmaka na a ra, n nun sɔɔrie naxa fa, muxu naxa a ba e yi.

²⁸ N to wa a kolonfe e a suxuxi naxan ma, n naxa siga a ra e xa kiitisae yire.

²⁹ N naxa a li e a kalamuxi e xa sɛriyɛ xa fe nan ma, kɔnɔ a mu fe kobi yo rabaxi a lanma a xa faxa naxan ma, xa na mu a ra a xa sa geeli kui.

³⁰ N to bara a mɛ a Yuwifie bara gali malan a xili ma, n naxa a rasanba i ma keren na. N a kalamumae rakolonma e yɛtɛ kan xa sa a kalamu i xɔn a xa fe ra. Wo salamu.»

³¹ Sɔɔrie naxa Pɔlu tongo alɔ e yamarixi ki naxɛ. E naxa a xanin kɔɛ ra han Antipatiri.

³² Na kuye iba, sɔɔrie naxa gbilen sɔɔri banxi. Soe ragie naxa Pɔlu tongo.

¹⁵ عَوَ، يَكْسِ، وٌ تَن نُن يُوِقِ كِيتِسَيٍ شَ مَنفّ مَيَندِ عَ شَ قَ عَ رَ عَلَكٌ وٌ شَ عَ شَ قٍ مَتٌ عَ قَنيِ رَ. نَ كُي، مُشُ تَن عَ قَشَمَ كِرَ رَ.»

¹⁶ ثْلُ مَافِنّ شَ دِ نَشَ نَ يَنقّ كٌلٌن. عَ نَشَ سِفَ سْورِ بَنشِ كُي، عَ نَشَ نَ بِرِن مَسٍن ثْلُ بّ.

¹⁷ ثْلُ نَشَ سْورِ مِشِ كّمّ شُنمَتِ ندٍ شِلِ، عَ نَشّ، «يِ سّفّتَلَ شَنِن سْورِ مَنفّ شْن مَ، عَلَكٌ عَ شَ قٍ ندٍ قَلَ عَ بّ.»

¹⁸ سْورِ كّمّ شُنمَتِ نَشَ سّفّتَلَ تٌنفٌ، عَ نَشَ عَ شَنِن سْورِ مَنفّ شْن مَ. عَ نَشّ، «ثْلُ، فٍيلِمَنِ نَن ﭑ شِلِشِ، عَ نَشَ ﭑ مَيَندِ عَ ﭑ شَ قَ يِ سّفّتَلَ رَ عِ شْن مَ، عَ شَ قٍ ندٍ مَسٍن عِ بّ.»

¹⁹ سْورِ مَنفّ نَشَ سّفّتَلَ تٌنفٌ، عٍ نَشَ عٍ مَمِنِ. مَنفّ نَشّ، «عِ وَ مَ مُنسٍ قَلَقٍ ﭑ بّ؟»

²⁰ عَ نَشَ عَ يَابِ، «يُوِقِيٍ بَرَ لَن عَ مَ، عٍ شَ عِ مَشَندِ عِ شَ ثْلُ شَنِن يُوِقِ كِيتِسَيٍ يِرٍ، عَلَكٌ عٍ مَن شَ مَشْرِنيِ ندٍ تِ عَ مَ.

²¹ عِ نَشَ عِ تُلِ مَتِ عٍ رَ، بَرِ مَ مِشِ تٌنفٌ نَانِ نُن ندٍ بَرَ يَنقّ شِرِ عَ شُن عٍ يَ مَ. عٍ بَرَ عٍ كَلِ عَ عٍ مُ سٍسٍ دٌنمَ، عٍ مُ سٍسٍ مِنمَ عَ قٌ عٍ نَ ثْلُ قَشَ تّمُي نَشّ. يَكْسِ عٍ بَرَ فّ عٍ يَءِلَندٍ، عٍ قَ عِ سَفٌ نَن مَمّقٍ.»

²² سْورِ مَنفّ نَشَ سّفّتَلَ رَبٌلٌ، عَ نَشَ تْنيِ دْشْ عَ مَ، قَ قَلَ، عَ قٍ نَشَن قَلَشِ عَ بّ، عَ نَشَ نَ قَلَ مِشِ يٌ بّ.

²³ عَ نَشَ سْورِ مِشِ كّمّ شُنمَتِ قِرِن شِلِ، عَ نَشَ عَ قَلَ عٍ بّ، «وٌ سْورِ كّمّ قِرِن يَءِلَن، سْورِ سٌي رَفِيٍ تٌنفٌ سٌلٌقٍرٍ، نُن شَلِ وٌلِ كّمّ قِرِن. وٌ شَ عٍ يَءِلَن سِفَقٍ رَ سٍسَرٍ تٌ كْي رَ.

²⁴ وٌ شَ سٌي ندٍ يَءِلَن ثْلُ بّ، عَلَكٌ عَ شَ مَنفّ قٍلِسِ لِ هّيرِ كُي.»

²⁵ سْورِ مَنفّ نَشَ يِ قٍ سّبّ بَتَاشّ رَ.

²⁶ «ﭑ تَن كِلْدِ لِسِيَ، عِ تَن مَنفّ قٍلِسِ مَقَنشِ، ﭑ بَرَ عِ شّيبُ.

²⁷ يِ شّمّ يُوِقِيٍ نَن عَ سُشُشِ. عٍ نَشَ وَ عَ قَشَقٍ. ﭑ تٌ عَ كٌلٌن عَ رْ مَكَ نَ عَ رَ، ﭑ نُن سْورِيٍ نَشَ قَ، مُشُ نَشَ عَ بَ عٍ يِ.

²⁸ ﭑ تٌ وَ عَ كٌلٌنقٍ عٍ عَ سُشُشِ نَشَن مَ، ﭑ نَشَ سِفَ عَ رَ عٍ شَ كِيتِسَيٍ يِرٍ.

²⁹ ﭑ نَشَ عَ لِ عٍ عَ كَلَمُشِ عٍ شَ سّرِيّ شَ قٍ نَن مَ، كْنْ عَ مُ قٍ كٌبِ يٌ رَبَشِ عَ لَنمَ عَ شَ قَشَ نَشَن مَ، شَ نَ مُ عَ رَ عَ شَ سَ فٍيلِ كُي.

³⁰ ﭑ تٌ بَرَ عَ مّ عَ يُوِقِيٍ بَرَ فَلِ مَلَن عَ شِلِ مَ، ﭑ نَشَ عَ رَ سَنبَ عِ مَ كٍرٍن نَ. ﭑ عَ كَلَمُمَيٍ رَكٌلٌنمَ عٍ يّتّ كَن شَ سَ عَ كَلَمُ عِ شْن عَ شَ قٍ رَ. وٌ سَلَمُ.»

³¹ سْورِيٍ نَشَ ثْلُ تٌنفٌ عَلْ عٍ يَمَرِشِ كِ نَشّ. عٍ نَشَ عَ شَنِن كْي رَ هَن عَنتِثَتِرِ.

³² نَ كُيٍ عِبَ، سْورِيٍ نَشَ فبِلٍن سْورِ بَنشِ. سٌي رَفِيٍ نَشَ ثْلُ تٌنفٌ.