Taruxui 17:13-24 in Susu

¹³ Kɔnɔ Yuwifie Tɛsalonikikae to a kolon a Pɔlu na Ala xa wɔyɛnyi kawandife Beere taa fan, e naxa fa naa, e fa ɲama ya iso.

¹⁴ Awa, danxaniyatɔɛe naxa Pɔlu tongo keren na, e naxa siga a ra baa fɛ ma, kɔnɔ Silasi nun Timote naxa lu Beere taa.

¹⁵ Naxee Pɔlu mati, e naxa siga a ra han Atɛn. Na xanbi e naxa gbilen e ɲungui ra Silasi nun Timote xɔn ma, e xa Pɔlu li sinnanyi ma Atɛn.

¹⁶ Pɔlu nu Silasi nun Timote mamɛfe Atɛn. A bɔɲɛ naxa maɲaaxu a ra na taa xa kuyee xa fe ra.

¹⁷ Na kui, a naxa dɛ masara e nun Yuwifie ra, a nun mixie naxee gaaxuxi Ala ya ra salide kui. A man naxa wɔyɛn mixie ra a naralanma naxee ra malan yire taa kui lɔxɔ yo lɔxɔ.

¹⁸ Epikuri nun Sitoyisi karamɔxɔe naxa so wɔyɛnfe Pɔlu ra, e nu a fala, «Yi wɔyɛnla munse falafe?» Ndee to Pɔlu xui mɛ a Isa xa xibaaru masenma, a man nu fa marakeli fee falafe, e naxɛ, «A luxi nɛ alɔ a ala gbɛtɛe nan ma fee falama.»

¹⁹ Awa, e naxa a tongo, e naxa siga a ra Areyopago malan yire, e naxa a maxɔrin, «Yi lɔnni nɛɛnɛ i naxan masenma, muxu nɔma a kolonde di?

²⁰ Barima muxu fe nɛɛnɛ nan mɛfe yi ki, muxu wama na fasari nan kolonfe.»

²¹ Atɛnkae nun xɔɲɛe naxee sabatixi Atɛn, e nu darixi e tuli matife ra wɔyɛn nɛɛnɛ ra naxee masenma.

²² Pɔlu naxa ti Areyopago tagi, a naxa a fala, «Atɛnkae, n bara a to diinɛlae yati yati nan wo ra.

²³ N bara see to wo naxee batuma. N man bara sɛrɛxɛbade nde to, a sɛbɛxi naxan ma, ‹Ala naxan mu kolonxi!› Wo naxan batuma, a fa lu wo mu a kolon, n na nan ma fe masenfe wo bɛ.

²⁴ Ala naxan duniɲa daaxi, a nun se naxan birin na a kui, a tan naxan koore nun bɔxi Marigi ra, a mu sabatixi banxi kui mixi bɛlɛxɛ naxan nafalaxi.

¹³ كْنْ يُوِقِيٍ تّسَلٌنِكِكَيٍ تٌ عَ كٌلٌن عَ ثْلُ نَ عَلَ شَ وْيّنيِ كَوَندِقٍ بٍيرٍ تَا قَن، عٍ نَشَ قَ نَا، عٍ قَ حَمَ يَ عِسٌ.

¹⁴ عَوَ، دَنشَنِيَتْييٍ نَشَ ثْلُ تٌنفٌ كٍرٍن نَ، عٍ نَشَ سِفَ عَ رَ بَا قّ مَ، كْنْ سِلَسِ نُن تِمٌتٍ نَشَ لُ بٍيرٍ تَا.

¹⁵ نَشٍيٍ ثْلُ مَتِ، عٍ نَشَ سِفَ عَ رَ هَن عَتّن. نَ شَنبِ عٍ نَشَ فبِلٍن عٍ حُنفُي رَ سِلَسِ نُن تِمٌتٍ شْن مَ، عٍ شَ ثْلُ لِ سِننَنيِ مَ عَتّن.

¹⁶ ثْلُ نُ سِلَسِ نُن تِمٌتٍ مَمّقٍ عَتّن. عَ بْحّ نَشَ مَحَاشُ عَ رَ نَ تَا شَ كُيٍيٍ شَ قٍ رَ.

¹⁷ نَ كُي، عَ نَشَ دّ مَسَرَ عٍ نُن يُوِقِيٍ رَ، عَ نُن مِشِيٍ نَشٍيٍ فَاشُشِ عَلَ يَ رَ سَلِدٍ كُي. عَ مَن نَشَ وْيّن مِشِيٍ رَ عَ نَرَلَنمَ نَشٍيٍ رَ مَلَن يِرٍ تَا كُي لْشْ يٌ لْشْ.

¹⁸ عٍثِكُرِ نُن سِتٌيِسِ كَرَ مْشْيٍ نَشَ سٌ وْيّنقٍ ثْلُ رَ، عٍ نُ عَ قَلَ، «يِ وْيّنلَ مُنسٍ قَلَقٍ؟» ندٍيٍ تٌ ثْلُ شُي مّ عَ عِسَ شَ شِبَارُ مَسٍنمَ، عَ مَن نُ قَ مَرَكٍلِ قٍيٍ قَلَقٍ، عٍ نَشّ، «عَ لُشِ نّ عَلْ عَ عَلَ فبّتّيٍ نَن مَ قٍيٍ قَلَمَ.»

¹⁹ عَوَ، عٍ نَشَ عَ تٌنفٌ، عٍ نَشَ سِفَ عَ رَ عَرٍيٌثَفٌ مَلَن يِرٍ، عٍ نَشَ عَ مَشْرِن، «يِ لْننِ نّينّ عِ نَشَن مَسٍنمَ، مُشُ نْمَ عَ كٌلٌندٍ دِ؟

²⁰ بَرِ مَ مُشُ قٍ نّينّ نَن مّقٍ يِ كِ، مُشُ وَ مَ نَ قَسَرِ نَن كٌلٌنقٍ.»

²¹ عَتّنكَيٍ نُن شْحّيٍ نَشٍيٍ سَبَتِشِ عَتّن، عٍ نُ دَرِشِ عٍ تُلِ مَتِقٍ رَ وْيّن نّينّ رَ نَشٍيٍ مَسٍنمَ.

²² ثْلُ نَشَ تِ عَرٍيٌثَفٌ تَفِ، عَ نَشَ عَ قَلَ، «عَتّنكَيٍ، ﭑ بَرَ عَ تٌ دِينّلَيٍ يَتِ يَتِ نَن وٌ رَ.

²³ ﭑ بَرَ سٍيٍ تٌ وٌ نَشٍيٍ بَتُمَ. ﭑ مَن بَرَ سّرّشّبَدٍ ندٍ تٌ، عَ سّبّشِ نَشَن مَ، ‹عَلَ نَشَن مُ كٌلٌنشِ!› وٌ نَشَن بَتُمَ، عَ قَ لُ وٌ مُ عَ كٌلٌن، ﭑ نَ نَن مَ قٍ مَسٍنقٍ وٌ بّ.

²⁴ عَلَ نَشَن دُنِحَ دَاشِ، عَ نُن سٍ نَشَن بِرِن نَ عَ كُي، عَ تَن نَشَن كٌورٍ نُن بْشِ مَرِفِ رَ، عَ مُ سَبَتِشِ بَنشِ كُي مِشِ بّلّشّ نَشَن نَقَلَشِ.